1-2. (a) Nimakere ku Lembrieko 16:31, wacikara nineno ju m’utii nenedi? (b) I thiwiwec maeni wabidwoko wang’ penji ma kani?

 I ADHURA mi Arkansas, i ng’om mir États-Unis, park moko tiye ma juyiko ma ber mandha, ma dhanu beciliewo. I iye, jucopo nwang’u diama woko iwi ng’om. Ento diamane gimil ungo pilembe fodi julilogi ngo. Eno ketho dhanu ma pol ma ginene ginyang’ ungo nia eca tie diama, e gikadhu kud iwi lonyo maeno.

² I ayi moko, umego ku nyimego mwa ma gitii de gitie ve diama maeno; gitie lonyo ma pire tek lee. Biblia uporo lwar m’i wigi ku jamkermiwic. (Som Lembrieko 16:31; 20:29) Re wang’wa copo kadhu yot yot kud iwi lonyo maeno. Kan aradu ginyang’ nia ju m’utii pigi tie tek lee, gicopo nwang’u lonyo m’ukadhu lonyo m’i the ng’om i bang’gi. I thiwiwec maeni, wabidwoko wang’ penji adek ma e: Pirang’o ju m’utii gitie ve lonyo i wang’ Yehova? Pirang’o pigi tie tek lee i dilo pa Yehova? Wacopo timo ang’o ketho wanwang’ ponji kud i lapor migi?

3. Nimakere ku Zaburi 92:12-15, pirang’o weg bedopwe ma gitii pigi tie tek i Yehova?

³ Umego ku nyimego mwa ma giteng’ini kunoke ma gitii pigi tie tek lee i Yehova Mungu. Eneno gin ma ber m’upondo i igi, man eng’eyo kite migi ma beco. Anyong’a nege ka ju m’utii gibekoro ni aradu, rieko ma ginwang’u i kind oro ma dupa i tic ma beco ma gitimo ire. (Yob 12:12; Rie. 1:1-4) Yehova neno bende cirocir migi ni gin ma pire tek. (Mal. 3:16) Gikadhu kud  i peko dupa i kwo migi, re yiyoyic ma gitie ko i Yehova ucungo ma tek. Genogen migi mi nindo m’ubino utie tek niloyo ma gibino ko kinde ma fodi gicaku ponjo lemandha acaka. Man Yehova umarugi pilembe gibemediri nitwong’o pi nyinge “asu [kadok] i tio” migi.​—Som Zaburi 92:12-15.

4. Lembang’o ma copo tielo cwiny umego ku nyimego mwa ma gidaru tii?

⁴ Tek tiyo ucaku bemondo i kumi, ng’ey nia Yehova ubepoy i kum tic ceke m’igam itimo ire con. (Ebr. 6:10) Ibed itielo tic mi rweyo lembanyong’a kud amora, man lembe maeno unyayu anyong’a i Wegwa mi polo. Iciro peko ma dongo, kadok peko m’ubed uturo cwinyi de; iworo cik mir ukungu mi Biblia man icero ba cikne; itimo tic ma pigi tek i dilo pa Yehova cuu mandha, man iponjo jumange ku tic. Itimo kero peri ceke pi ning’iyo kud alokaloka ma tung’ tung’ m’ubed utimere i dilo pa Yehova. Itielo ju ma gibetimo tic mi saa ceke, man iwotho miyo amora i kumgi. Yehova Mungu umeri lee dit pilembe ibegwoko bedoleng’ peri. Eng’olo nia ‘ebikuno jumaleng’ pare ngo.’ (Zab. 37:28) Eng’olo iri bende kumae: ‘Abiyeyi cil kum lwar.’ (Isa. 46:4) Pieno, kud ipar nia calu m’idaru teng’ini kunoke idaru tii, dong’ piri tie tek ungo i dilo pa Yehova, piri tek lee dit!

5. Ju m’utii gicikiri ngo niwil i kum lembang’o?

⁵ Ju m’utii gicopo timo lembe dupa i dilo pa Yehova. Kadok tego ma gibino ko con udaru jwik de, re i kind oro ma lee ma gitimo, ging’eyo lembe dupa. Calu ma wabineno i lapor mi ju m’utii mi rundi ma con ku ma kawoni, Yehova copo medere nitiyo kugi i ayi ma tung’ tung’.

6-7. Kemii lapor mi ju m’utii moko ma Biblia uweco pigi, ma Yehova umiyo igi mugisa pilembe gitimo ire ku bedopwe.

⁶ I Biblia, wanwang’u lapor dupa mi ju ma gimediri nitimo ni Yehova kadok kinde ma gitii. Ku lapor, Musa ucaku timo calu jabila pa Yehova man jatelwic mi thek mir Israel nwang’u etie ku oro ma romo 80. Daniel de Yehova umedere nitiyo kude asu calu jabila kadok kinde ma oro pare ubino 90 ku wiye. Jakwenda Yohana ke tipo ma leng’ ukonye nikiewo  buku mi Lembanyutha nwang’u etie ku oro de 90 ku wiye.

⁷ Weg bedopwe mange de tie dupa ma pigi uyik ungo akeca, ma copere dhanu ubed udieng’ ungo kugi hai. Ento Yehova ung’eyogi man emiyo igi mugisa pi gwoko bedoleng’ migi. Ku lapor, Biblia uweco nyanok kende pi Simeon m’ubino “ng’atu ma pwe man ma lworo Mungu,” re Yehova ugam ung’eye man eyunge; eketho eneno Yesu kinde m’e mukere, man eewo lembila pi nyathin ne man pi min. (Luka 2:22, 25-35) Kepar bende pi dhatho ma nyinge Ana, m’ubino jabila ma dhaku. Oro pare ubino 84, re “ebed ekoso ngo hekalu.” Yehova umiyo ire sukulia pilembe eweko ngo nicidho i “coko;” eketho Ana de uneno Yesu kinde m’e mukere. Simeon giku Ana ceke pigi bino tek i Yehova.​—Luka 2:36-38.

8-9. Nyamego moko utimo ang’o i dilo pa Yehova kinde m’edoko dhatho?

⁸ Tin de umego ku nyimego m’utii tie dupa ma gibemiyo lapor ma beco ni aradu. Wakewec iwi lapor pa nyamego Lois Didur. Ecaku tic pa jayab yo ma segi i ng’om mi Canada nwang’u oro pare tie 21. I ng’eye, giku John ma won ot pare gitimo oro ma dupa i tic mi liew. I ng’eye, gitimo i Bethel mi Canada pi oro ma kadhu 20. Saa ma Lois udoko ku oro 58, jukwayugi giku John nia gicidh gitim i ng’om mi Ukraine. Saa maeno gitimo ang’o? Nyo giyero nia gin dong’ gitii ma giromo citimo ngo i ng’om mange? Ungo. Giyiyo or ma juoro kogi, man kuca juwok jung’iyo John nitimo i Komite mi filial. Oro abiro i ng’eye kinde ma John utho, Lois ung’iyo nia emedere asu ku tic pare. Kawoni Lois utie ku oro 81. Ebemedere asu nitimo cuu ni Yehova karacelo ku juruot mi Bethel mi Ukraine, man gimare lee.

⁹ Saa moko jucopo neno ngo montho ma calu Lois ku valer ma rom ma jubed juneno kogi ma fodi coggi kwo; ento bedo montho jwigo ngo valer migi. Nyimego ma gitielo weg udi migi i tic pa Yehova pi oro dupa, ma kawoni de gibemediri asu nicungo ma tek, Yehova nenogi ni dhanu ma pigi tek lee. (1 Tim. 5:3) M’umedo maeno, gibemiyo amora lee i kum aradu.

10. Umego Tony uweko lapor ma ber ma kani?

¹⁰ Umego ku nyimego dupa m’utii ma gidaru gonjo i pacu gitie bende lonyo mi tipo. Wakenen lapor p’umego moko ma nyinge Tony ma kawoni ubekwo kaka ma jugwoko ju m’utii i iye. Elimo batizo i dwi mir 8, oro 1942 i Pennsylvania, i États-Unis, nwang’u oro pare tie 20. Ndhundhu i ng’ei batizo pare, jung’olo nia emond i tic mir askari, ento ekwero; e jutwiye i kol pi oro ario ku nusu. Giku min ot pare Hilda giponjo awiya migi ario ung’eyo lemandha. Pi oro ma dupa, Tony utimo i cokiri adek calu janen wi tic mi judong cokiri (ma con eca jubed julwong’o nia surveillant-président),  man ebedo bende janen wi coko ma dongo mi twodiri. Ebed ecidh etelo wi coko man wi ponji mi Biblia i otkol. Kawoni oro pa Tony utie 98, re ebeweko ngo nitimo ni Yehova. Ebemedere asu nitimo ire ku tego pare ceke karacelo kud umego ku nyimego mi cokiri ma en’i iye!

11. Wacopo nyutho nenedi nia ju m’utii ma dong’ gigonjo i pacu pigi tie tek i iwa?

¹¹ Icopo miyo yung nenedi ni umego ku nyimego m’utii ma dong’ gigonjo i pacu? Tek ecopere, judong cokiri giromo konyogi nicidho i coko kunoke niwinjo cokone awinja, man nidikiri i tic mi rweyo lembanyong’a. Ng’atuman m’i kindwa copo nyutho nia ebedieng’ pigi nwang’u ebeliewogi kunoke ebeweco kugi ku yore mi video. Ubekwayu wadieng’ akecane pi ju m’utii ma kaka ma gibekwo i iye ni bor ku cokiri migi, kum ka waneno ber ungo, wiwa copo wil pigi. Ecopo bedo tek ni jumoko m’i kindgi nikoro iwa lembe migi kinde ma wabeweco kugi. Ento wabinwang’u bero lee tek wabekoyo saa ma wabepenjo kogi, man wabewinjogi kinde ma gibekoro pir anyong’a ma ginwang’u i dilo pa Yehova.

12. Waromo nwang’u umego ku nyimego ma nenedi i cokiri mwa?

¹² Waromo nwang’u nia karaman i cokiri mwa de ju m’utii unuti ma gitie iwa lapor ma beco. Nyamego moko ma nyinge Harriette utimo ni Yehova cuu mandha pi oro ma dupa i cokiri mi bang’gi i adhura mi New Jersey, i États-Unis. I ng’eye, gidok pi nikwo kaka mange giku nyaku pare. Umego mi cokiri m’edok i iye giting’o saa ma ging’eyiri ko cuu mandha kude, man ginwang’u nia etie igi lonyo. Ekoro igi lembe dupa iwi tic mi lembanyong’a m’egam etimo kinde m’eponjo lemandha i oro 1920, man lembene utielogi lee. Saa nica, ebed eweko ngo broso pare mi rudo lake kan ebewok i lembanyong’a, kum saa moko jucopo wok twiye rek. De andha i kind oro 1933, jutwiye wang’ ario man ebed etimo yenga acel acel i kol. Won ot pare ubino ngo Jamulembe, ento ebed ekonye lee. Kinde ma en’i kol, won otne ubed ugwoko awiya migi adek. Andhandha, ju m’utii ma gigwoko bedoleng’ migi calu Harriette giromo nia wamii igi yung!

13. Waponjo ang’o iwi kite ma ju m’utii pigi lith ko i dilo pa Yehova?

¹³ Umego ku nyimego mwa ma gitii pigi lith i Yehova man i dilo pare. Gigam gineno kite ma Yehova umiyo ko mugisa i ayi ma tung’ tung’ iwi dilo pare, man igi bende. Ginwang’u ponji dupa ma beco i kum kosa ma gitimo. Pieno, nen gi calu “kulo ma thuth mi rieko,” man twom ponji i bang’gi. (Rie. 18:4) Tek iting’o saa mi ng’eyogi cuu, yiyoyic peri bidoko tek man ibiponjo lembe moko acel ario kokoro i bang’gi!

14. Buku mi Poi mi Cik 32:7 ubecwalu aradu nitimo ang’o?

¹⁴ Nwang’ saa mi weco ku ju ma giteng’ini kunoke ma gitii. (Som Poi mi Cik 32:7.) I andha, nikum tiyo, saa moko nyo dong’ wang’gi neno piny nyaviavia, giconjo wotho yoo yoo, the lebgi udwalere, ento yor i adundegi gin aradu, man gitie ku “nying’ ma ber” i wang’ Yehova. (Ekl. 7:1) Poy pi thelembe m’uketho Yehova nenogi ni lonyo. Mediri nimiyo igi yung. Bed ve Elica. Emito pare ebed kago kud Eliya i nindo ma tokcen ma gitimo karacelo. Wang’ adek zoo Elica yero kumae: “Abiweki ngo.”​—2 Ub. 2:2, 4, 6.

15. Icopo penjo ju m’utii ku penji ma kani?

¹⁵ Pi ninyutho nia ibedieng’ pir umego ku  nyimego ma giteng’ini kunoke ma gitii, penjgi ku penji dupa pi nicwiyo lembe m’i igi. (Rie. 1:5; 20:5; 1 Tim. 5:1, 2) Icopo penjogi kumae: “Saa m’ibino aradu, igam ing’eyo nenedi nia inwang’u lemandha?” “Lembe m’ikadhu kud i iye ukonyi nenedi niketho kindwu udok ceng’ini ku Yehova?” “Ang’o m’uketho ibemediri nibedo ku mutoro i tic pa Yehova?” (1 Tim. 6:6-8) I ng’eye, cik ithi iwinj kpawa ma gibekoro iri.

16. Kan aradu ubeweco ku ng’atu m’uteng’ini gin ario ceke ginwang’u bero ma kani?

¹⁶ Kan aradu ubeweco ku ng’atu m’uteng’ini, gin ario ceke gitieliri i kindgi. (Rum. 1:12) Aradu, tek ibetimo kumeno, ibimedo foyofoc peri lee ni Yehova pi kite m’ebedieng’ ko pi jutic pare ma gimoko kii i kume, man ng’atu m’utii de binwang’u nia jubeyunge. Ebikoro iri kud anyong’a kite ma Yehova umiyo ko ire mugisa.

17. Pirang’o ju m’utii ma gimoko i kum Yehova gidoko leng’ kubang’ oro migi m’ubecidho?

¹⁷ Wang’ ma pol leng’o pa ng’atini thiro ka oro pare ubeng’adu, ento ju ma gimoko i kum Yehova gilund gidoko leng’ i wang’e nisagu, kubang’ oro migi m’ubecidho. (1 Thes. 1:2, 3) Pirang’o etie kumeno? Kum pi oro ma dupa, giweko tipo pa Mungu utwinyogi man ukonyogi nicego kite ma tung’ tung’. Tek wabenyebara i kum umego ku nyimego mwa ma giteng’ini, wabemiyo igi yung man wabeponjo lembe i bang’gi, e gibidoko iwa ni lonyo ma kaporne mbe.

18. Wabineno lembang’o i thiwiwec m’ulubo?

¹⁸ Cokiri doko tek ungo kwa nia pilembe aradu gibeneno ju m’utii ni dhanu ma pigi tek lee, ento ka judongone de gibecayu ngo aradu. I thiwiwec m’ulubo, wabineno kite ma ju m’utii gicopo nyutho ko nia aradu de pigi tek lee i cokiri.