1. Nimakere ku Malaki 3:16, buku ma kani ma Yehova ucaku kiewo niai con, man ang’o ma n’i bukune?

 NIAI con Yehova ubekiewo buku moko ma segi. I bukune jukiewo nying’ dhanu dupa, nicaku i kum Abel * ma tie ng’atu ma kwong’a m’ugwoko bedoleng’ pare. (Luka 11:50, 51) Niai eca, Yehova umedo nying’ dhanu mange bende i bukune man nitundo tin nying’ dhanu milioni swa n’i iye. I Biblia julwong’o nying’ bukune i ayi ma tung’ tung’: “Kitabu mi poi,” “buku mi kwo,” man “kithabu m’adola mi kwo.” Ento i thiwiwec maeni wabilwong’e ni “buku mi kwo.”​—Som Malaki 3:16; Nyu. 3:5; 17:8.

2. Jukani ma nying’gi ukiewere i buku mi kwo, man wan ke nyingwa copo kiewere i iye nenedi?

² Buku maeno ma segi utie ku nying’ dhanu ceke ma gibeworo Yehova ku lworo ma thuth man ma gineno nyinge ni gin ma pire tek igi. Gitie ku kaka mi nwang’u kwo ma rondo ku rondo. Tin wan de jucopo kiewo nyingwa i bukune tek watie ku winjiri ma ceng’ini ku Yehova i ukungu mi lam mi jamgony pa Wode ma Yesu Kristu. (Yoh. 3:16, 36) Nik’ebed watie ku genogen mi kwo i polo kunoke iwi ng’om, wan ceke wabemito nyingwa ukiewere i bukune.

3-4. (a) Ka nyingwa ukiewere kawoni i buku mi kwo, nyo eno nyutho nia wabikwo rondo ku rondo? Kekor. (b)  Wabiweco iwi lembang’o i thiwiwec maeni ku m’ulubo?

 ³ Dhanu ceke ma nying’gi n’i buku mi kwo ma rondo ku rondo, nyo cwinygi tek nia nying’gine copo weyere ngo? Dwokowang’ penji maeni nwang’ere i wec ma Yehova uyero ni Musa m’ugorere i Ai 32:33. Ewacu kumae: “Ng’atu ma tek udubo ira, abikabu en kud i kitabu para.” Pieno, nying’ ma kawoni ubenwang’ere i bukune Yehova copo weyogi, kunoke ethumo wang’gi, calu ve fodi ekiewogi ku kalamu mi yen (crayon). (Nyu. 3:5, kmt.) Wacikara nitimo kero kara nyingwa ubed asu i buku eno nitundo ma jubikiewe magwei ku kalamu mi vino ma weyere ngo.

⁴ Lembuno copo ketho wapenjara ku penji dupa. Ku lapor, Biblia uyero ang’o pi dhanu ma nying’gi ukiewere i buku mi kwo ku ju ma fodi nying’gi ukiewere ngo i iye? Ju ma nying’gi ukiewere i buku maeno gibinwang’u kwo ma rondo ku rondo awene? Kadong’ ju m’ular utho ma fodi ginwang’u ngo kaka mi ng’eyo Yehova ke? Nyo ecicopere nia nying’gi de ukiewere i bukune? Wabinwang’u dwokowang’ penji maenogi i thiwiwec maeni ku m’ulubo.

JUKANI MA NYING’GI N’I BUKU MI KWO?

5-6. (a) Calu ma Jufilipi 4:3 uwacu, jukani ma nying’gi n’i buku mi kwo? (b) Nying’gi bikiewere mi magwei ke awene?

⁵ Jukani ma nying’gi ukiewere i buku mi kwo? Pi ninwang’u wang’ penji maeno, wabiweco iwi ungu mi dhanu abic ma tung’ tung’. Kud i kindgi, jumoko jukiewo nying’gi i buku mi kwo, jumange ke nying’gi mbe.

⁶ Ungu mi kwong’o utie dhanu ma  jung’iyogi pi nibimo karacelo ku Yesu i polo. Nyo kawoni jukiewo nying’gi i buku mi kwo? Eyo, nimakere ku wec ma jakwenda Paulo uyero ni ‘jutic wadi’ mi Filipi ma julwong’ogi pi nicibimo karacelo ku Yesu, ma kawoni nying’gi n’i buku mi kwo. (Som Jufilipi 4:3.) Ento kara nying’gi ubed asu i buku maeno mi lapor, gicikiri nigwoko bedoleng’ migi. I ng’eye, kinde ma gibinwang’u ayi ma tokcen i wang’ tho migi kunoke i wang’ masendi ma dit, kadong’ nying’gi bikiewere mi magwei i bukune.​—Nyu. 7:3.

7. Lembanyutha 7:16, 17 ubekonyowa nenedi ninyang’ pi saa ma jubikiewo mi magwei nying udul ma dit i buku mi kwo?

⁷ Ungu mir ario utie udul ma dit. Nyo gin de nying’gi ukiewere kawoni i buku mi kwo? Eyo. Nyo nying’gine bibedo asu i buku mi kwo nitundo i ng’ey both migi kud i lwiny mir Armagedon? Eyo. (Nyu. 7:14) Yesu uyero nia dhanu maeno ma gitie calu rombe, gibimondo “i kwo ma rondo ku rondo.” (Mat. 25:46) Ento ju maeno ma giboth kud i Armagedon gibinwang’u ngo ndhundhu kwo ma rondo ku rondo. Nying’gi bibedo asu i buku mi kwo ma nwang’u jukiewe ku kalamu mi yen. I the bimobim mi oro elufu acel, Yesu “bikwayugi man ebitelo wigi i bang’ pii mi kwo m’ubedhenyini.” Ju ma giworo telowic pa Kristu man ma junwang’u gigwoko bedoleng’ migi ni Yehova i nindo mi poko lembe ma tokcen, nying’gi bikiewere mi magwei i buku mi kwo.​—Som Lembanyutha 7:16, 17.

8. Jukani ma nying’gi ukiewere ngo i buku mi kwo, man ang’o ma binwang’ugi?

⁸ Ungu mir adek utie diegi, niwacu dhanu ma jubinyothogi i Armagedon. Nying’gi ukiewere ngo i buku mi kwo. Yesu uyero nia “gibicidho i nyoth ma rondo ku rondo.” (Mat. 25:46) Ku kony mi tipo ma leng’, Paulo de uyero nia “dhanu maeno gibinwang’u matira mi nyoth ma rondo ku rondo.” (2 Thes. 1:9; 2 Pet. 2:9) Bende, dhanu ma gidubo akakaka i kum tipo maleng’, gin de gibinwang’u ngo kwo ento nyoth ma rondo ku rondo. I andha, gibicer ungo. (Mat. 12:32; Mark. 3:28, 29; Ebr. 6:4-6) Wakewec kawoni iwi ungu ario m’udong’ ma gibicer iwi ng’om.

JU MA BICER

9. Calu ma junyutho i Tic mi Jukwenda 24:15, ungu ario ma kani ma bicer iwi ng’om, man tung’ tung’ ma kani m’utie i kindgi?

⁹ Biblia uweco iwi ungu mi dhanu ario ma gibicer ku genogen mi kwo rondo ku rondo iwi ng’om. Ungune tie mi “weg bedopwe” ku mi “weg bedopwe ngo.” (Som Tic mi Jukwenda 24:15.) “Weg bedopwe” utie ju m’utimo ni Yehova ku gwoko bedoleng’ kinde ma fodi gikwo. Ento “weg bedopwe ngo” utie dhanu ma gitimo ngo ni Yehova i wang’ tho migi. I andha, timo migi ma pol ubino tung’ ku mi weg bedopwe. Calu ma ungu ario eno ceke gibicer, nyo wacopo wacu nia nying’gi udaru kiewere i buku mi kwo? Pi nidwoko wang’ penji eno, wakewec iwi unguman ka kende.

10. Pirang’o “weg bedopwe” gibicer, man jumoko m’i kindgi bibedo ku rwom ma kani? (Nen bende “Penji mi jusom” m’uweco pi cer iwi ng’om i gazeti maeni.)

¹⁰ “Weg bedopwe” utie ungu mir ang’wen. Gin nying’gi ular ukiewere i buku mi kwo i wang’ tho migi. Nyo juruco nying’gi kud i bukune saa ma githo?  Ungo, pilembe i wang’ Yehova fodi “gikwo” asu. Yehova tie “Mungu mi ju m’utho ngo, ento mi ju ma kwo.” (Luka 20:38) Eno ubenyutho nia kinde ma weg bedopwe gibicer iwi ng’om, nying’gi binwang’ere i buku mi kwo kadok nwang’u fodi ekiewere ku “kalamu mi yen” de. (Luka 14:14) M’umbe jiji, jumoko m’i kind dhanu maeno ma bicer, binwang’u rwom mi bedo ni “judongomawijo i ng’om ceke.”​—Zab. 45:16.

11. “Weg bedopwe ngo” bibedo ku yeny mir ang’o kara nying’gi ukiewere i buku mi kwo?

¹¹ Wakewec dong’ iwi “weg bedopwe ngo” m’utie ungune mir abic. Saa moko nyo pilembe gigam ging’eyo ngo cik pa Yehova uketho gitimo ngo bedopwe i wang’ tho migi. Pieno nying’gi ukiewere ngo i buku mi kwo. Ento calu ma Mungu ucerogi, eno umiyo igi kaka ma kara nying’gi ukiewere i buku mi kwo. Dhanu maeno ma gi “weg bedopwe ngo,” gibibedo ku yeny mi kony ma lee, kum i wang’ tho migi, jumoko ubed utimo lembe ma reco apila. Pieno, gibibedo ku yeny ma juponj kogi kud ayi ma gikwo ko nimakere ku cik mir ukungu pa Yehova. Pi niponjogi, Ker pa Mungu bitelo wi program ma dit mi ponji iwi ng’om i ayi ma fodi utimere ngo niai con.

12. (a) Jukani ma biponjo ju ma gitie ngo weg bedopwe? (b) Lembang’o ma binwang’u dhanu ma bikwero nitiyo ku lembe ma jubeponjo kogi?

¹² Jukani ma biponjo ju ma gitie ngo weg bedopwe? Tie udul ma dit ku weg bedopwe ma bicer. Kara nying’ weg bedopwe ngo ukiewere i buku mi kwo, bikwayere nia gibed ku winjiri ma ceng’ini ku Yehova man githier kwo migi ire. Yesu Kristu karacelo ku ju m’ebebimo kugi, gibineno cuu mandha ayi ma weg bedopwe ngo gibejolo ko lembe ma jubeponjo kogi. (Nyu. 20:4) Ng’atu m’ukwero nijolo kony ma jubemiyo ire, jubikabe cen, kadok nwang’u oro pare udoko 100  de. (Isa. 65:20) Yehova ku Yesu, gitie ku copo mi neno lembe ma n’i adunde; gibiyiyo ngo ng’atu moko utim nyoth ki i ng’om ma nyen.​—Isa. 11:9; 60:18; 65:25; Yoh. 2:25.

CER MI KWO MAN MI POKOLEMBE

13-14. (a) I wang’e wabed wanyang’ nenedi i wec ma Yesu uyero ma nwang’ere i Yohana 5:29? (b) Lembang’o m’umito wang’ey iwi wec maeno?

¹³ Yesu bende uweco pi dhanu ma bicer iwi ng’om. Ku lapor, ewacu kumae: “saa ubebino ma dhanu ceke ma gin’i kabuli gibiwinjo dwande man gibiwok woko, ju m’utimo lembe ma beco ni cer mi kwo, ju m’utimo lembe ma reco ke ni cer mi pokolembe.” (Yoh. 5:28, 29) Eno Yesu umito yero ang’o?

¹⁴ I wang’e, wabed wanyang’ nia Yesu uweco iwi lembe ma ju m’ucer bitimo i ng’ey cer migi; ma nia jumoko ma bicer bitimo lembe ma ber, jumange ke bitimo lembe ma reco. Kadok kumeno, poy nia Yesu uwacu ngo nia ju ma gibicer kud i kabuli gibitimo lembe ma ber kunoke gibitimo lembe ma rac. Ento eweco iwi lembe m’udaru timere. Eweco pi ju “m’utimo lembe ma beco” man pi ju “m’utimo lembe ma reco.” Eno ubenyutho nia gitimo lembe eno nwang’u fodi githo ngo. Eno tie lembe ma kakare, pi kum jubiyiyo ngo ng’atu moko utim lembe ma rac ki i ng’om ma nyen. Lembe ma reco ma weg bedopwe ngo gitimo ucikere nibedo gin ma gitimo i wang’ tho migi. Dong’ wec ma Yesu uyero nia “cer mi kwo” ku “cer mi pokolembe” thelembene tie ang’o?

15. Jukani ma gibicer “cer mi kwo” man ke pirang’o?

¹⁵ Weg bedopwe ma gitimo lembe ma beco i wang’ tho migi, gibicer “cer mi kwo” pilembe nying’gi ular ukiewere i buku mi kwo. Eno ubenyutho nia cer mi “ju m’utimo lembe ma beco” ma jukiewo pire i Yohana 5:29 utie ma rom ku cer mi “weg bedopwe” ma juweco pire i Tic mi Jukwenda 24:15. Lembe maeno ma jukoro, urombo ku wec ma nwang’ere i Jurumi 6:7 m’uwacu: “Ng’atu m’utho, dubo pare udaru wekere.” Pieno, ka weg bedopwe githo Yehova weko dubo migi, ento ebipoy pi lembe ceke ma beco ma gitimo saa ma fodi gibino kwo. (Ebr. 6:10) Re bikwayere nia weg bedopwe ma gicer, gimediri nigwoko bedoleng’ migi kara nying’gi ubed asu i buku mi kwo.

16. “Cer mi pokolembe” ubenyutho ang’o?

¹⁶ Dong’ wacopo yero ang’o pi ju ma gitimo lembe ma reco i wang’ tho migi? Kadok nang’ juweko dubo migi kinde ma githo de, gitimo ngo ni Yehova saa ma gibino kwo. Nying’gi mbe i buku mi kwo. Pieno, cer mi “ju m’utimo lembe ma reco” utie ma rom ku mi “weg bedopwe ngo” ma jukiewo pire i Tic mi Jukwenda 24:15. Cer migi bibedo “cer mi pokolembe.” * Jubipoko lembe iwi ju ma gitie ngo weg bedopwe i ayi ma jubikeneno kogi pi kura timo migi. (Luka 22:30) Etie lembe ma biting’o kare pi nineno ka nyo giromo nia nying’gi umondi i buku mi kwo. Tek ju maeno ma gitie ngo  weg bedopwe giweko kit kwo migi ma rac man githieriri ni Yehova, kadong’ nying’gi bikiewere i buku mi kwo.

17-18. Bikwayu ju ceke ma bicer pi nikwo iwi ng’om gitim ang’o, man “tic” ma gitimo ma Lembanyutha 20:12, 13 uweco pire, utie tic ma kani?

¹⁷ Kadok nwang’u ju ma gicer gibed weg bedopwe kunoke weg bedopwe ngo de, bikwayere nia giwor cik ma nwang’ere i kitabu ma nyen m’adola ma jubiyabu i kind oro 1 000. Jakwenda Yohana ukoro gin m’eneno i ginmawokiwang’, ewacu kumae: “Aneno ju m’utho, ju ma dongo ku ju ma thindho gicungo i wang’ komker, man juyabu kithabu m’adola. Ento juyabu kithabu m’adola mange; en e kithabu m’adola mi kwo. E jupoko lembe mi ju m’utho nimakere ku gin m’ugorere i kithabu m’adola maeno calku tic migi.”​—Nyu. 20:12, 13.

¹⁸ Jubipoko lembe iwi ju m’ucer calku “tic” ma kani? Nyo ebibedo tic ma gitimo i wang’ tho migi? Ungo! Poy nia juweko dubo migi ma gilar gitimo i wang’ tho migi. Pieno, “tic migi” maeni ma gitimo copo bedo ngo tic ma gitimo ma fodi githo ngo. Ento ecikere nibedo tic ma gitimo nimakere ku ponji ma juponjo kogi i ng’om ma nyen. Kadok weg bedopwe ma calu ve Noa, Samwel, Daudi man Daniel, de jubiponjogi pi ning’eyo Yesu Kristu man nibedo ku yiyoyic i lam m’ethiero. Ka fodi jugini de bibedo ku lembe dupa m’umito juponj kogi, kadong’ ju m’utie ngo weg bedopwe ke!

19. Lembang’o ma binwang’u ju m’ukwero lembe ma jubeponjo kogi?

¹⁹ Lembang’o ma binwang’u ju m’ukwero lembe ma jubeponjo kogi? Lembanyutha 20:15 uwacu nia “ng’atu moko ci ma junwang’u nyinge ugorere ngo i buku mi kwo jubole i nammac.” Eyo, jubinyothogi mi magwei. Dong’ pire tie tek nia waketh nyingwa ukiewere i buku mi kwo man ebed asu i iye!

20. Tic ma kani mir anyong’a ma jubitimo i the bimobim mi oro elufu acel ? (Nen cal m’i ng’eye.)

²⁰ Bimobim mi oro elufu acel bibedo saa mir anyong’a ma lee dit! Ebibedo bende ku program ma dit mi ponji iwi ng’om i ayi ma fodi utimere ngo niai con. Re ebibedo bende saa ma jubikeneno ko kura timo mi weg bedopwe ku mi weg bedopwe ngo ceke. (Isa. 26:9; Tic. 17:31) Program mi ponji maeno biwotho nenedi? Thiwiwec m’ulubo bikonyowa ninyang’ i lembene man nibedo ku foyofoc pi yub maeno.