1-3. (a) Nimakere ku Zaburi 5:4-6, Yehova neno timo ma reco nenedi? (b) Pirang’o “cik pa Kristu” ukwero magwei timo mi maku awiya?

YEHOVA MUNGU udagu magwei timo ma reco ceke. (Som Zaburi 5:4-6.) M’umbe jiji edagu lee dit timo mi maku awiya, pilembe etie dubo ma rac dit! Wa Jumulembe pa Yehova walubo lapor pare, pieno wadagu magwei maku awiya man wayio ngo nyanok de nia lembe ma kumeno utimere i cokiri mi Jukristu.​—Rum. 12:9; Ebr. 12:15, 16.

² “Cik pa Kristu” ukwero magwei timo mi maku awiya! (Gal. 6:2) Pirang’o wayero kumeno? Calu ma waneno i thiwiwec m’ukadhu, cik pa Kristu uketho i ie lembe ceke m’ebed eponjo nikadhu kud i wec man timo pare. Lembene ceke ucungo iwi mer man ecwalu dhanu nitimo bedopwe. Jukristu mandha gibeworo cik pa Kristu, pieno gitimo lembe ma ketho awiya ng’eyo nia jubegwokogi man jumarugi andhandha. Ento timo mi maku awiya utie rac dit, pilembe eketho ginwang’iri nia jubegwokogi ngo man jumarugi de ngo.

³ Lembe mi can utie nia, maku awiya pi nitimo kugi tarwang’ udaru mew calu thong’om man edaru mulo kum Jukristu mandha bende. Pirang’o? Pilembe tin eni “dhanu ma rac ku ju ma girambri,” gipong’ lee man gicopo mondo bende i cokiri. (2 Tim. 3:13) Thelembe mange utie nia, dhanu moko ma giwondo wang’jo nia gin de gibetimo ni Yehova gicaku mondo i timo ma reco m’ucewo ava mi tarwang’ i kumgi man lembene ucwalugi  nimaku awiya. Dong’ wakenenu nia pirang’o maku awiya utie dubo ma rac dit. Bende, wabiweco iwi lembe ma judong cokiri giromo timo ka ng’atu moko upodho i dubo ma kumeno, niwacu i mak ma ku kero man lembe ma junyodo gicopo timo pi nigwoko awiya migi. *

4-5. Pirang’o nimaku awiya utie nitimo dubo i kumgi?

⁴ Ka jumaku nyathin moko, lembene sende pi oro ma lee i ng’eye. Eno nyayu can i kume, i kum ju m’ugwoke; niwacu wedi pare man bende umego ku nyimego i cokiri. Timo mi maku awiya utie dubo ma pek dit.

⁵ Maku awiya utie nitimo dubo i kumgi. Ninyayu can man peko i kum ng’atini utie nitimo ire dubo. Calu ma wabineno i thiwiwec m’ulubo, ka ng’atu moko umaku nyathin nwang’u etimo nyathin ne rac dit. Nyathin ugene, re eng’io nitimo nyathin maeno rac akakaka. Timo maeno ketho nyathin nwang’u nia etie ngo agwoka, pilembe judie nitimo lembe moko m’awiya ucikiri ngo nitimo. Wacikara nigwoko awiya i kum timo ma rac maeno, bende ukwayu wakony man wajuk cwiny awiya ma jugam judiogi nitimo kugi lembe ma kumeno.​—1 Tes. 5:14.

6-7. Pirang’o maku awiya utie nidubo i kum cokiri man ni judongo pa gavmenti?

⁶ Maku awiya utie nidubo i kum cokiri. Ka ng’atu moko mi cokiri umaku nyathin moko, eno kelo acidi iwi cokiri. (Mat. 5:16; 1 Pet. 2:12) Etie lembe mir acidi ma lee dit ka juwinjo nia ng’atu moko mi cokiri umaku nyathin, pilembe milioni dupa mir umego ku nyimego ‘gibeii aiia’ nitimo lembe ma yungo nying’ Yehova. (Yud. 3) Pieno, ka ng’atu moko utimo lembe maeno ma rac m’ukelo acidi iwi cokiri man ekwero niloko cwinye, jukoye cen kud i cokiri.

⁷ Maku awiya utie nidubo ni judongo pa gavmenti. Jukristu gicikiri ‘nibedo wor the tego ma ni i wigi.’ (Rum. 13:1) Waworo judongo pa gavmenti nwang’u wabeworo cik ma giketho. Ka ng’atu moko mi cokiri uturo cik pa gavmenti, ku lapor emaku nyathin, eca edubo i kum gavmenti. (Nen bende Tic mi Jukwenda 25:8.) Judong cokiri gimbe ku twero mi mio matira ni ng’atu m’uturo cik pa gavmenti. Pieno ka ng’atu moko mi cokiri umaku nyathin, gicero ngo bang’e, ento giweko judongo pa gavmenti umii ire matira. (Rum. 13:4) Jadubo ucikere nikayu gin m’ecoyo.​—Gal. 6:7.

8. Yehova neno dubo ma ng’atu moko utimo ni wadi nenedi?

⁸ Maku awiya utie nidubo ni Mungu. (Zab. 51:4) Ka ng’atu moko utimo dubo ni wadi, nwang’u edubo bende ni Yehova. Ku lapor, Cik ma Mungu mio ni nyithindho mir Israel uyero nia ka ng’atu moko ukwalu piny kunoke uwondo wadi, nwang’u “ekadhu ku wi cik pa Yehova.” (Law. 6:2-4) M’umbe jiji, ka ng’atu moko mi cokiri umaku nyatin moko, eca nwang’u edubo ni Yehova, pilembe evugo nyatin ne. Nyathin ung’iyo kude re en edwoko ng’iyone ni mer, eno ketho nyathin nwang’u nia ng’atu m’ecopo geno dong’ umbe. Ka ng’atu moko ma tie jaratic pa Yehova umaku nyathin, eno kelo acidi iwi nying’ Yehova. Pi thelembe maeno re ma wacikara ning’eyo nia maku awiya utie nitimo dubo ma lee ni Mungu, man ukwayu ngo wawek ng’atu m’utimo lembene.

9. Dilo pa Yehova uwodho telowic ma kani m’ujengere iwi Biblia iwi maku awiya, man pirang’o?

⁹ I kind oro dupa, dilo pa Yehova uwodho lembe ma tung’ tung’ ma wacikara ning’eyo iwi  maku awiya. Ku lapor, Otkur ma Wiw man Cew! (Réveillez-vous !) ma tung’ tung’ unyutho kite ma ng’atu moko ma jumaku copo ii ko ku can ma lembe maeno royo i cwinye. Ekoro bende lembe ma jumange gicopo timo pi nikonyo man nijuko cwiny ju ma jumaku, man ekoro bende lembe ma junyodo gicopo timo pi nigwoko awiya migi. Bende dilo pa Yehova umio telowic m’ucungo iwi Biblia pi nikonyo judong cokiri kara ging’ei gin ma gicopo timo ka ng’atu moko umaku nyathin. Dilone beng’io wang’ ma pol i telowic m’emio ni judong cokiri iwi kite ma gicopo yiko ko lembe ma kumeno, man saa moko etimo alokaloka i telowicne. Dilo pa Yehova timo lembe maeno ceke kara judong cokiri gitii saa ceke ku cik pa Kristu man gitim lembe ku mer man ku bedopwe i saa ma dubo moko ma pek utimere.

10-12. (a) Kinde ma judong cokiri gibeyiko lemb dubo ma pek, gicikiri nipoi i kum lembang’o man lembakeca migi ucikere nibedo ang’o? (b) Nimakere ku Yakobo 5:14, 15, judong cokiri giii nitim ang’o?

¹⁰ Kinde ma judong cokiri gibeyiko lembe moko m’uneno dubo ma pek, gicikiri nipoi nia cik pa Kristu ubekwayu gitel wi cokiri ku mer man gitim lembe m’atira i wang’ Mungu. Eno ketho ging’io i lembe ma tung’ tung’ kilili mandha, kinde ma giwinjo nia ng’atu moko utimo dubo ma pek. Lembakeca mi kwong’o mi judong cokiri utie niyungo Yehova man nigwoko nyinge bed leng’. (Law. 22:31, 32; Mat. 6:9) Lembe mange ma pire tek ma judong cokiri gidieng’ i kume utie, nikonyo umego ku nyimego kara gibed ceng’ini ku Yehova, bende nijuko man nitielo cwiny ng’atu ma jumaku.

¹¹ M’umedo maeno, tekene ng’atu m’utimo dubone utie ng’atu moko mi cokiri, judong cokiri gitimo kero ning’eyo ka nyo eloko cwinye; ka ginwang’u nia eloko cwinye, gikonye kara eyik winjiri pare ku Yehova. (Som Yakobo 5:14, 15.) Jakristu m’uweko ava kume ucwale nitimo dubo ma pek, utie ve ng’atu m’ubetwoyo. Eno nyutho nia i saa maeno winjiri pare ku Yehova utie cuu ngo. * Pieno, wacopo poro judong cokiri ku munganga, niwacu gicopo tuc nikeyo “kum ng’atu ma kume lith [ng’atu m’utimo dubo].” Judong cokiri gicopo tio ku juk mi Biblia pi nikonye eyik winjiri pare ku Mungu, re kara gikonye, kwayu ng’atune uyew dubo pare ku cwinye ceke.​—Tic. 3:19; 2 Kor. 2:5-10.

¹² Andhandha judong cokiri gitie ku tic ma pek. Gimaru cokiri lee, pilembe Mungu umio igi rwom mi gwoko dhanu pare man mi timo igi lembe ku mer man ku bedopwe. (1 Pet. 5:1-3) Gimito umego ku nyimego ubed museme i cokiri. Pi thelembe maeno, ka giwinjo nia ng’atu moko utimo dubo ma pek, m’uketho i ie maku awiya, gimaku ngo ng’om. Gitimo ang’o? Wakeng’ii i penji ma tung’ tung’ ma nwang’ere i acaki mir  udukuwec mir 13,  15, man  17.

13-14. Nyo judong cokiri giworo cik mi ng’om m’ukwayu nia junyuth ni judongo pa gavmenti pi mak ma ku kero? Kekor.

 ¹³ Nyo judong cokiri giworo cik mi ng’om m’ukwayu nia junyuth ni judongo pa gavmenti ka jumaku nyathin? Eyo. I ng’om moko, cik ukwayu nia ka ng’atu moko uwinjo nia jumaku nyathin moko, ukwayu enyuth lembene ni judongo pa gavmenti. Judong cokiri ma gitie i ng’om ma kumeno, giworo cikne. (Rum. 13:1) Cik maeno uturo ngo cik pa Mungu. (Tic. 5:28, 29) Pieno, ka ng’atu moko unyutho ni judong cokiri pi mak ma ku kero m’umulo kum cokiri, gilwong’o biro mi filial ndhundhu pi ning’eyo gin m’ukwayu gitim pi niworo cik pa gavmenti iwi maku awiya.

 ¹⁴ Kinde ma judong cokiri gibeweco ku nyathin ma jumaku, ku junyodo pare kunoke ku ng’atu mange m’ung’eyo lembene, ukwayu gipoi wigi nia gitie ku twero mi nyutho lembene ni judongo pa gavmenti. Dong’ ka ng’atu ma jubedoto nia umaku nyathin utie umego kunoke nyamego man lembene umew i kind dhanu, nyo Jakristu m’udwoko lembene ucikere niparu nia en re m’ekelo acidi iwi nying’ Mungu? Ungo. Ng’atu m’umaku mak re m’ukelo acidi iwi nying’ Mungu.

15-16. (a) Nimakere ku 1 Timoteo 5:19, pirang’o kwayu niwinjo jumulembe ario i wang’ niketho Komite mi pokolembe? (b) Judong cokiri gitimang’o ka giwinjo nia ng’atu moko mi cokiri umaku nyathin?

 ¹⁵ I wang’ ma judong cokiri giketh Komite mi pokolembe, pirang’o ukwayu kokoro gilar giwinj jumulembe ario? Pilembe etie lembe m’atira ma Biblia ubekwayu. Ka judoto ng’atu moko nia etimo dubo ma pek, ma ke en ebeyio ngo dubo parene, i wang’ niketho Komite mi pokolembe, kwayu judong cokiri gilar giwinj jumulembe ario. (Poi. 19:15; Mat. 18:16; Som 1 Timoteo 5:19.) Nyo eno ubenyutho nia i wang’ nidwoko ni judongo pa gavementi nia ng’atu moko umaku nyathin de ukwayu jumulembe ario? Ungo. Pilembe cik maeno uneno ngo dwoko lembe m’uturo cik pa gavmenti.

¹⁶ Ka judong cokiri giwinjo nia ng’atu moko mi cokiri umaku nyathin, gitimo kero nilubo cik mi ng’om m’ukwayu nia junyuth lembene ni judongo pa gavmenti. I ng’eye, gitimo sayusac mii iwi lembene man giluro ie nimakere ku Biblia; ka gineno nia nyo gicopo ketho Komite mi pokolembe. Mi kwong’o, judong cokiri giweco ku ng’atu ma jubedotone ka nyo andha etimo dubo. Kan ekwero, e giwinjo jumulembe ario m’ung’eyo lembene. Ka jumulembe ario, m’acel utie ng’atu m’udote pi nyathin m’emaku kawoni, ma kucelo ke udote nia elar emaku nyathin moko i wang’e, lembe maeno copo cwalu judong cokiri giketho Komite mi pokolembe. * Ka jamulembe mir arionde mbe, eno nyutho ngo nia ng’atu m’ukelo adote ubecwayu ndra. Kadok junwang’u ngo jumulembe ario pi nituco nia ng’atu moko umaku nyathin moko de, judong cokiri ging’eyo nia ng’atu ma jubedotone utimo lembe moko ma rac mandha m’unyayu can i jumange. Judong cokiri gibimediri asu nimio kony ni ju ma lembene unyayu can i igi man nijuko cwinygi. M’umedo maeno, gibedo ku wang’gi nigwoko cokiri i kum ng’atu moko ci ma copo maku awiya.​—Tic. 20:28.

17-18. Komite mi pokolembe timo tic ma kani?

 ¹⁷ Komite mi pokolembe timo tic ma kani? Wec ma nia “pokolembe” ubenyutho ngo nia judong cokiri gipoko lembe kunoke gimaku kaka gavmenti. Ka gavmenti unwang’u nia ukwayu gimii matira ni ng’atu m’umaku nyathin pilembe eturo cik, judong cokiri gicero ngo bang’e, ento giweko lembene i cing judongo pa gavmenti. (Rum. 13:2-4; Tit. 3:1) Judong cokiri ging’io ka nyo ng’atu m’utimo dubo ma pek copo medere nibedo i cokiri kunoke ngo.

¹⁸ Kinde ma judong cokiri gitie i Komite mi pokolembe, tic migi utie niyiko lembe m’unyotho winjiri pa ng’atini ku Mungu man kud umego ku nyimego. Gitio ku Biblia pi ning’io ka nyo ng’atu m’umaku nyathin uloko cwinye kunoke ngo. Kan ekwero niloko cwinye, gikoye kud i cokiri man gimio atwong’a i cokiri nia ng’atune dong’ etie ngo Jamulembe pa Yehova. (1 Kor. 5:11-13) Ento tekene eloko cwinye, ecopo medere nibedo i cokiri. Re judong cokiri gibinyutho ire nia ecopo nwang’u ngo rwom nyanok de i  cokiri pi oro ma dupa, kunoke pi dong’ kwo pare zoo. Calu judong cokiri gibedieng’ lee pi bedomoth mir awiya, i amung’ gicopo poyo junyodo i cokiri nia gibed ku wang’gi kan awiya migi unyebiri i kum ng’atu ma kumeno. Kinde ma judong cokiri gibenyutho lembe maeno ni junyodo, ukwayu kud ginyuth igi nying’ dhanu ma ng’atune ugam umaku.

19-22. Junyodo gicopo timang’o pi nigwoko awiya migi? (Nen cal m’i ng’eye.)

¹⁹ Ng’atu mi kwong’o m’utie ku tic mi gwoko awiya utie ng’a? Utie janyodo. * Janyodo ucikere ning’eyo nia awiya pare gitie giramia m’uai i bang’ Mungu, niwacu gitie “musolu pa Yehova.” (Zab. 127:3) Yehova umio iri tic mi gwoko awiya peri. Dong’ icopo timang’o pi nigwokogi i kum dhanu ma maku awiya?

²⁰ Mi kwong’o, sai ning’eyo bodho mi ju ma maku awiya. Yeny ning’eyo lembe iwi dhanu ma bemaku awiya man bodho ma gitio ko pi niwondo wang’gi. Bed ku weng’i i kum ng’atu moko ci ma copo maku awiya kunoke lembe ma copo kelo ariti i kumgi. (Rie. 22:3; 24:3) Ng’ei nia wang’ ma pol jamak awiya utie ng’atu ma nyathin ung’iyo kude man m’egeno.

²¹ Mir ario, bed iwec thwolo thwolo ku nyathin peri. (Poi. 6:6, 7) Eno kwayu nia ibed iwinj awiya peri kilili mandha saa ma wubeweco kugi. (Yak. 1:19) Ng’ei nia nyathin ma jumaku lworo nikoro lembene ni ng’atu moko ci. Ecopo bedo ku lworo nia ng’atu moko mbe ma biyio lembe m’ebekoro, kunoke nyo etie ku lworo pilembe ng’atu m’umake uyero ire nia kan enyutho lembene ni jumange, ebitime rac. Kan ineno ve nia lembe moko ma cuu ngo utimere i kum nyathin peri, kwii kumi man penje yoo ma ber ekekor iri man winj lembe m’ebeyero.

²² Mir adek, ponj awiya peri. Kor ni awiya peri lembe ma gicikiri ning’eyo iwi ribiri. Re kore igi nimakere ku oro migi man kor igi lembe ma gicopo nyang’ i ie. Ponjgi ku lembe ma gicopo yero man ma gicopo timo ka ng’atu moko ubemulo kumgi i ayi ma cuu ngo. Tii ku lembe ma dilo pa Yehova uwodho pi nigwoko awiya peri.​—Nen sanduku “ Ponjiri man ponj awiya peri.”

23. Wabed waneno maku awiya nenedi, man wabidwoko wang’ penji ma kani i thiwiwec m’ulubo?

²³ Wa Jumulembe pa Yehova wang’eyo nia maku awiya utie dubo ma rac dit man etie lembe m’uturo cik pa gavmenti. Calu ma cik pa Kristu re m’ubetelo wiwa, wa Jumulembe pa Yehova wacero ngo ba ng’atu m’umaku nyathin ento waweko eyei ter mi dubo pare. Dong’ wacopo timang’o pi nikonyo umego kunoke nyamego moko ma jugam jumaku? Thiwiwec m’ulubo bidwoko wang’ penji maeno.