1. Nimakere ku Jukolosai 2:4, 8, Sitani ubeii nitimang’o?

SITANI ubemito wawek cen nimaru Yehova. Pi nitundo i lembakeca maeno, ebeii lee mandha niwilo ayi ma waparu ko lembe kara wacak paru lembe i kite m’ebemito. Ebetimo kero pare zoo pi niwondowa walub toke, pieno ebetio ku piny ma telo nen mwa.​—Som Jukolosai 2:4, 8.

2-3. (a) Pirang’o wiwa ucikere ngo niwil i kum cimowang’ ma nwang’ere i Jukolosai 2:8? (b) Wabineno lembang’o i thiwiwec maeni?

² Nyo wan de Sitani ubekiyowa akiya kara ewondwa? Eyo! Poi nia Paulo umio cimowang’ ma nwang’ere i Jukolosai 2:8 ni dhanu ma gitie juyic, ma gibino Jukristu ma juwiro ku tipo. (Kol. 1:2, 5) I rundi ma con eca Sitani ubed ukio Jukristu maeno akiya kara ewing wigi; tin eni dong’ ebekiyowa magwei. (1 Kor. 10:12) Pirang’o? Pilembe jubole iwi ng’om man ebetimo kero lee dit pi niwondo jurutic pa Mungu ma gigwoko bedoleng’ migi. (Nyu. 12:9, 12, 17) M’umedo maeno, i nindo maeni ma wabekwo i ie, jutimrac man jundra ‘gibesagri asaga.’​—2 Tim. 3:1, 13.

³ I thiwiwec maeni, wabineno nia Sitani betio nenedi kud “abombi” pi niwilo paru mwa. Wabing’eyo bende bodho adek m’etio ko ku “rieko” pi niwondowa. (Ef. 6:11) I thiwiwec m’ulubo ke, wabineno nia wacopo timang’o kara wawodh cen paru ma rac ma nyo Sitani udaru royo i wiwa. Re mi kwong’o, wakenen ayi ma Sitani ugam uwondo  ko nyithindho mir Israel i ng’ei ma gimondo i Ng’om mi Lembang’ola, man wanen ponji ma waromo kwanyu niai kud i lembene.

4-6. Nimakere ku Poi mi Cik 11:10-15, ugam ukwayu nyithindho mir Israel giponj ayi ma kani ma nyen mi fur kinde ma gitundo i Ng’om mi Lembang’ola?

⁴ Sitani utio ku rieko ma lee dit pi niwondo nyithindho mir Israel kara girwo ni mungu m’araga. Egam etimo nenedi? Eng’eyo nia gitie ku yeny mi cam, pieno eii nitio ku lembe maeno pi niketho gitim yeny pare. Kinde ma nyithindho mir Israel gimondo i Ng’om mi Lembang’ola, ugam ukwayu giponj ayi ma nyen mi furofur. Saa ma gibino i Misiri gibed gilongo pii mi kulo Nil pi nidwogo i podho migi. Ento i Ng’om mi Lembang’ola kulo ma dongo ubino mbe; koth ku thoi re m’ubed ucego cam. (Som Poi mi Cik 11:10-15; Isa. 18:4, 5) Pieno, ugam ukwayu nyithindho mir Israel giponj bodho ma nyen mi furofur. Re ebino lembe ma yot ungo igi, pilembe ju ma pol m’i kindgi ma ging’eyo lembe mi fur cuu giwok githo i langa.

⁵ Yehova ukoro ni dhanu pare nia ayi ma gibikwo ko udaru lokere. I ng’eye, edok emio igi cimowang’ moko ma copo nen ve nia urombo ngo ku lembe pa fur, eyero kumae: “Wukuru giwu, adundewu maru wondre, man wukier wutim ni mungu mange de, man wurwo igi.” (Poi. 11:16, 17) Pirang’o Yehova ucimo wang’ dhanu pare i kum rwo ni mungu m’araga, ma ke nwang’u ebino weco iwi bodho ma nyen ma gicopo furo ko fur e?

 ⁶ Yehova ung’eyo nia nyithindho mir Israel gicopo mito gicidh giponj bodho mi furofur i bang’ thek m’utwodogi. Nwang’u de andha thek maeno copo ponjo nyithindho mir Israel ku bodho mi fur, pilembe ging’eyo lembe m’uneno fur cuu dit; re ariti ubino nuti. Jurufur mi Kanan gibed giworo Bal man giyie lee mandha. Giyio nia Bal utie won polo man en re m’eketho koth cwii. Yehova umito ngo dhanu pare giyii vupo maeno. Re asu wang’ dupa dupa, nyithindho mir Israel gibed ging’io niworo Bal. (Wel 25:3, 5; Pok. 2:13; 1 Ub. 18:18) Andha Sitani utuc nimaku nyithindho mir Israel i awic pare.

7. Lembang’o m’uketho yioyic mi nyithindho mir Israel i amulaic kinde ma gimondo i Ng’om mi Lembang’ola?

⁷ Mi kwong’o, Sitani utio ku gin ma dhanu zoo gitie ku yenyne, niwacu koth ma copo yomo ng’om. Kubang’ oro i Ng’om mi Lembang’ola, koth ubed ung’idho wang’ acel acel niai i thum pa dwi mir ang’wen nicidho i dwi mir abung’wen. Pieno, kara nyithindho mir Israel gimediri nikwo man kara cam migi uceki, gibed gikuro koth m’ubed ucaku yor i dwi mir apar. Sitani ucwalu nyithindho mir Israel niyio nia ka gin de gicaku timo lemsuru mi thek m’udhokogi, cam migi bicek lee. Thekne gigam giyio nia kara mungu migi ukonj koth, ubekwayu giketim kit thier moko kokoro ni mungune. Pieno, Juisrael ma gibino mbe ku yioyic i Yehova giyio nia andha eno re m’utie yore ma copo ketho koth dwogo; e gicaku timo thier ni Bal.

8. Bodho mir arionde ma Sitani utio ko tie ma kani? Kekor.

⁸ Mir ario, Sitani ubecwalu dhanu i lembsasa mi tarwang’. Thek m’ubed uworo mungu m’araga gibed gitimo kura ma reco mandha i thier migi. Kurane moko ugam uketho i ie tarwang’ ma jumaco ku jumamon ubed utimo i hekalu. M’umedo maeno, gibed gitimo tarwang’ mon ku mon man co ku co ku kit lembsasa mange de; igi ebino lembe ma rac ungo. (Poi. 23:17, 18; 1 Ub. 14:24) Thekne giyio nia timo maeno re ma cwalu mungu migi niketho ng’om uceg igi cam. E nyithindho mir Israel ma dupa gimondo i kura mi tarwang’ mi thek m’utwodogi, pieno gicaku timo thier ni mungu m’araga. I andha, Sitani re m’ugam umakugi i awic pare.

9. Nimakere ku Hoseya 2:16, 17, Sitani utimang’o pi niketho wi nyithindho mir Israel uwil i kum Yehova?

⁹ Mir adek, Sitani ujwiyo wang’ nyithindho mir Israel kara wigi wil i kum Yehova. I rundi pa jabila Yeremia, Yehova uyero nia jubila mi ndra giketho wi dhanu pare uwil i kum Nyinge “pi Bal.” (Yer. 23:27) Ubenen nia nyithindho mir Israel gijigo nitio ku nying’ Yehova man gicaku lwong’e Bal, ma thelembene tie “Won piny” kunoke “Rwoth.” Lembuno uketho edoko tek ni nyithindho mir Israel ning’eyo tung’ tung’ i kind Yehova giku Bal, e gicaku jebo thier ma gitimo ni Bal ku thier ma gitimo ni Yehova.​—Som Hoseya 2:16, 17 man wec mi there.

10. Sitani ubetio ku bodho ma kani tin eni?

¹⁰ Tin bende Sitani ubetio ku bodho ma rom eno. Pi nimaku dhanu i awic pare, ebetio ku gin ma dhanu zoo gitie ku yenyne,  ebecwalu dhanu i lembsasa mi tarwang’, man ebejwiyo wang’ dhanu kara wigi wil i kum Yehova. Dong’ mi kwong’o, wakenen nia Sitani ubeketho wi dhanu uwil i kum Yehova nenedi.

11. Sitani ujwiyo wang’ dhanu nenedi kara wigi uwil i kum Yehova?

¹¹ Sitani ujwiyo wang’ dhanu kara wigi wil i kum Yehova. I ng’ei ma jukwenda pa Yesu githo, jumoko m’ubed uyero ya gitie jukwenda gicaku ponjo vupo. (Tic. 20:29, 30; 2 Tes. 2:3) Dhanu maeno ma gijai i kum yioyic, gitimo kero kara ku jung’ei Mungu mandha ma en acel kende. Ku lapor, giwodho nying’ Mungu ma dhe kud i Biblia migi man giwile ku nying’ mi dito, ma calu ve “Rwoth” ku nying’ne mange de. Eno uketho edoko tek ni dhanu ma somo Biblia ning’eyo tung’ tung’ ma tie i kind Yehova ku “Rwodhi” mange ma Biblia uweco pigi. (1 Kor. 8:5) Bende gilwong’o Yehova giku Yesu ceke nia “Rwoth,” uketho etie tek ni dhanu ning’eyo tung’ tung’ ma tie i kind Yehova giku Yesu. (Yoh. 17:3) Lembe maeno ma gijebo re m’ucaku the ponji mi Trinita, ma nwang’ere ngo nyanok de i Biblia. Pieno, dhanu ma dupa giyio nia etie lembe ma copere ngo ning’eyo Mungu. Eno tie vupo ma yawe mbe!​—Tic. 17:27.

12. Nimakere ku Jurumi 1:28-31 dini mi ndra ubemewo timo ma kani, man lembene ukelo matoke ma kani?

¹² Sitani ubecwalu dhanu i lembsasa mi tarwang’. I rundi mi nyithindho mir Israel, Sitani utio ku dini mi ndra pi nimewo lembsasa mi tarwang’. Tin eni de ebetimo lembe ma rom. Dini mi ndra uyio timo mi tarwang’ man giketho timone nen nia erac ungo. Lembuno ukelo matoke ma kani? Eketho dhanu ma dupa ma giyero nia gibetimo ni Mungu, giweko niworo cik ma kamaleng’ ma Mungu umio iwi kurajo. Jakwenda Paulo uweco pi matokene i barua m’ekiewo ni Jukristu mi Roma. (Som Jurumi 1:28-31.) I kind “gin ma maku ku jutim” ma Paulo uyero, moko tie lembsasa ceke mi tarwang’, man bende timo ribiri co ku co man mon ku mon. (Rum. 1:24-27, 32; Nyu. 2:20) Pieno, pire tie tek dit nia wamok i kum ponji ma kamaleng’ ma nwang’ere i Biblia.

13. Sitani ubetio ku bodho mange ma kani?

¹³ Sitani ubetio ku gin ma dhanu zoo gitie  ku yenyne. Wan ceke wabed wamito waponj bodho ma nyen pi nipong’o yeny mwa man mi juruot mwa. (1 Tim. 5:8) Wang’ ma pol ukwayu nisomo dharaza pi ninwang’u bodhone. Re mito wabed ku wang’wa; i ng’om ma dupa jubed juponjo awiya ku bodho kende ngo, ento bende ku rieko mi dhanu. Ku lapor, i somo moko jubed jucwalu awiya niyio nia Mungu mbe man nia kud giwor cik mi Biblia. Juponjo awiya nia ng’atu ma riek ucikere niyio nia piny ulokere aloka. (Rum. 1:21-23) Kit ponji ma kumeno ukoc bor ku “rieko pa Mungu.”​—1 Kor. 1:19-21; 3:18-20.

14. Rieko mi dhanu cwalujo i timo ma kani?

¹⁴ Rieko mi dhanu cwalujo nicayu cik pa Yehova man nijai i kum cikne. Kakare nicwalu dhanu giceg nying’ tipo pa Mungu, ecwalujo i timo ma Biblia ulwong’o nia “tic mi kum.” (Gal. 5:19-23) Bende edwoko dhanu jukuhaya man eketho dhanu ‘mariri gigi.’ (2 Tim. 3:2-4) Timo maeno ukoc bor ku kite mi jwigiri ma jurutic pa Mungu gicikiri nicego. (2 Sam. 22:28) Jukristu moko m’umiiri nisomo dharaza ma malu gicaku weko paru mi ng’om maeno umond i wigi, kakare niweko paru pa Mungu re m’utel wigi. Dong’ wakenen ariti ma lembe maeno copo kelo.

15-16. Lembe ma nyamego moko ukadhu kud i ie ubemio iwa ponji ma kani?

¹⁵ Nyamego moko m’utimo tic mi saa ceke pi oro ma kadhu 15 uyero kumae: “Calu m’abino Jamulembe m’ulimo batizo, abed asomo man awinjo pir ariti mi somo ma malu, ento abed adieng’ ungo ku juk maeno. Abed anwang’u nia jukne uneno an  ungo.” Lembuno uroye i ariti ma kani? Ekoro kumae: “Amiara zoo i somo, eno uketho acaku nwang’u ngo saa mi rwo ni Yehova calu m’abed atimo i wang’e; bende, somone ubed uola lee, uketho abed arweyo ngo lembanyong’a akeca, man abed ayiko ngo coko cuu. Kinde m’anyang’ nia ayi m’abemiara ko i somo ma malu ubenyotho winjiri para ku Yehova, anwang’u nia ukwayu ajig somone. E agam ajige.”

¹⁶ Somo ma malune ubedo ku matoke ma kani iwi paru pa nyamego maeno? Ewacu kumae: “Atie ku lewic niyero nia somo m’ang’io nisomo uketho acaku neno kwa kosa mi jumange, asagane mir umego ku nyimego. Abed amito gitim ira lembe ma gicopo ngo man abed akoyara cen kugi. Kara paru maeno uwok kud i wia, eting’o ira nindo ma lee dit. Lembe maeno m’akadhu kud i ie, ukonya ninyang’ nia etie rac dit nicayu juk ma Wegwa mi polo ubemio iwa nikadhu kud i dilo pare. Yehova ung’eya cuu nisagu m’ang’eyara ko an gira. Ka nwang’u awinjo dwande, nwang’u di peko maeno zoo umulo ngo kuma.”

17. (a) Ubekwayu wacung ma tek pi nitimang’o? (b) Wabineno lembang’o i thiwiwec m’ulubo?

¹⁷ Dong’ cung ma tek kara ng’om pa Sitani kud umeki i awic mi “lembrieko kud abombi” pare. Kud iwek Sitani uwondi. (1 Kor. 3:18; 2 Kor. 2:11) Kud iyii eketh wii wil i kum Yehova. Wor cik ma cuu ma Yehova umio iwi kurajo, man kud iwek Sitani ucweli nicayu juk ma Yehova ubemio. Dong’ iromo timang’o kan inwang’u nia rieko m’i ng’om maeni udaru guro ulage i wii? Thiwiwec m’ulubo binyutho ayi ma Lembe pa Mungu copo konyi ko niwodho kadok paru man timo m’udaru guro ulage “ma tek.”​—2 Kor. 10:4, 5.