1. Alokaloka ma kani m’utimere i kind oro moko m’ukadhu?

NIAI con, dhanu ma pol ubed unwang’iri i dini moko kokoro, re i kind oro moko m’ukadhu ceng’ini eni alokaloka ma lee utimere. Tin wend dhanu ma gitie ngo jurudini ubemedere ameda. Ku lapor i ng’om ma dupa, dhanu ma pol giyero nia gitie ngo jurudini. *​—Mat. 24:12.

2. Pirang’o dhanu ma dupa giyero nia gitie ngo jurudini?

² Pirang’o dhanu ma dupa giyero nia gitie ngo jurudini? * Copere jumoko gibemiiri akeca niyenyo lembe ma mio igi mutoro, kunoke giketho wigi zoo i kum peko migi. (Lk. 8:14) Bende, dhanu moko ma gilar gibino jurudini, tin giloko yioyic migi nia Mungu mbe. Jumange giyero nia dini dong’ kakare kadhu kunoke nia kony pare mbe; giwacu bende nia dini beponjo lembe m’ukoc ku mi sians, man eyero ngo lembe ma tap. Saa moko nyo giwinjo jurimbgi kunoke juponji ubeyero nia kwo ulokere aloka, kunoke nyo gisomo lembene kaka moko, ento nyo fodi giwinjo ngo thelembe mandha ma romo cwalugi niyio nia Mungu nuti. Jumange ke ava dini uai i kumgi pilembe judong’ dini ubadhu cwinygi ku lem pa sente man ku sayu dito. I kabedo moko lundo, judongo pa gavmenti uketho cik m’ukwero tic moko mi jurudini.

3. Lembakeca mi thiwiwec maeni utie ang’o?

³ Yesu ung’olo iwa nia ‘waketh [dhanu m’i kind] thek ceke dok julub.’ (Mat. 28:19) Dong’ wacopo timo ang’o pi nikonyo dhanu  ma gijurudini ngo kara giponj nimaru Mungu man kara gidok julub pa Kristu? Wacikara ning’eyo nia kaka ma ng’atini udongo i ie copo ketho ejolo lembanyong’a, kunoke ekwere. Ku lapor, dhanu mir Europe gijolo lembanyong’a i ayi ma rom ungo ku dhanu m’uai i ng’om mir Asie. Pirang’o? I ng’om mir Europe, dhanu ma pol ung’eyo pi Biblia, man giyio nia Mungu re m’ucwio piny ceke. I Asie ke lundo dhanu ma nok kende re m’ung’eyo pi Biblia, ento ju ma pol uwinjo ngo pire awinja zoo de, man giyio ngo nia Jacwic utie. Pieno, lembakeca mi thiwiwec maeni utie nikonyowa kara wamul adunde dhanu ceke ma warombo kugi i lembanyong’a, kadok nwang’u giai kani kunoke gitie ku kit yioyic ma nenedi de.

4. Pirang’o ukwayu wabed ku nen ma ber?

⁴ Bed ku nen ma ber. Kubang’ oro, dhanu ma giyero nia gitie ngo jurudini gibedoko Jumulembe pa Yehova. Dhanune ma pol kura migi bino ber, man umbili mi jurudini ubed unyayu ng’ecwiny i igi. Jumange ke lundo gibino ku kura ma reco, re gitimo kero giweko kurane. M’umbe jiji, ku kony pa Yehova wabinwang’u “dhanu m’adundegi bedo ayika pi kwo ma rondo ku rondo.”​—Tic. 13:48, NWT; 1 Tim. 2:3, 4.

5. Ang’o ma becwalu dhanu nijolo lembanyong’a yot yot?

⁵ Bed dhanu ma ber man nyuth riekowang’. Wang’ ma pol, gin ma cwalu dhanu nijolo lembanyong’a yot yot, utie ayi ma wayere ko, ento ngo lembe ma wayero. Gibedo ku mutoro ka wabeweco i bang’gi i ayi ma ber, ku riekowang’wa man wabedieng’ kugi andhandha. Wadiyogi ngo adiya nia giwinj lembe ma wabeyero, ento wabed waii ninyang’ i paru ma gitie ko iwi dini. Ku lapor, jumoko bemaru ngo nia ng’atu m’uai kamange uwec kugi iwi lembe mi dini. Jumange ke giparu nia etie cuu ngo nipenjo paru pa ng’atini iwi lembe pa Mungu. Jumukende lundo lewic negogi ka dhanu ubeneno nia gibesomo Biblia ku jumange, asagane ku Jumulembe pa Yehova. Re kadok kumeno de, watimo kero ninyang’ i paru migi.​—2 Tim. 2:24.

6. Jakwenda Paulo ubed uwilo bodho pare nenedi, man wacopo lubo lapor pare nenedi?

⁶ Dong’ wacopo timo ang’o ka waneno nia ng’atini ubemito ngo walwong’ nying’ ma nia “Biblia,” “giracwia,” “Mungu” man “dini”? I saa ma kumeno, ukwayu wawil ayi mi weco kude calu ma jakwenda Paulo ugam utimo. Kinde ma Paulo ubino weco ku Juyahudi, eluro i lembe kugi nimakere ku Lembagora. Ento, kinde m’ebino weco ku jururieko ma gitie Jugiriki i Areopago, esomo ngo igi Lembagora. (Tic. 17:2, 3, 22-31) Wacopo lubo lapor pa Paulo nenedi? Kinde m’irombo ku ng’atu m’uyio ngo Biblia, kud inyuth ire nia lembe m’ibeyero uai i Biblia. Kan inyang’ nia ng’atini ubemito ngo dhanu mange unen nia ibesomo ire Biblia, yeny yore mange ma dhanu copo nyang’ ko ngo; ku lapor wusom kude i telefon, kunoke i jamtic mange mir elektronik.

7. Nimakere ku 1 Jukorinto 9:20-23, ukwayu watim ang’o pi nilubo lapor pa Paulo?

⁷ Bed ng’atu ma winjo jumange man ii ninyang’ i paru migi. Ukwayu watim kero ninyang’ i paru mi dhanu ma wabed warombo kugi i lembanyong’a. (Rie. 20:5) Wakewec kendo iwi lapor pa Paulo. Edongo i kind Juyahudi. Ento pi nirweyo lembanyong’a ni Thekdhanumange, ugam ukwayu nia etim alokaloka pilembe nwang’u dhanune ging’eyo ngo Lembagora, man ging’eyo ngo lembe lee iwi Yehova. Kara wanyang’ i paru mi dhanu mi kabedo ma warweyo i ie, saa moko copo kwayu watim sayusac kunoke wapenj kony i bang’ jurwei m’ung’eyo dhanu mi kabedone cuu.​—Som 1 Jukorinto 9:20-23.

8. Yo acel ma wacopo caku ko the wec ku dhanu iwi Biblia utie ma kani?

 ⁸ Lembakeca mwa utie nisayu ju “m’uromo.” (Mat. 10:11) Pi nitimo tic maeno cuu, yo acel utie nipenjo paru mi dhanu man niwinjogi kilili mandha. Umego moko mir Angleterre bepenjo paru mi dhanu m’erombo kugi iwi gin ma copo ketho kwo mi juruot bedo ku mutoro, iwi kite ma jucopo ponjo ko awiya, man iwi gin ma copo konyojo niciro lembe ma reco. I ng’ei m’ewinjo paru migi, eyero kumae: “Iparu ang’o iwi juk ma e ma jukiewo kawoni oro 2 000 udaru kadhu?” I ng’eye, esomo giragora moko m’elar eng’io cuu, m’umbe niyero nia esome niai kud i “Biblia.”

9. Wacopo konyo dhanu ma gibed gimaru ngo wawec kugi iwi lembe pa Mungu nenedi?

⁹ Kara wamul adunde dhanu ma gimito ngo wawec kugi iwi lembe pa Mungu, wacopo caku niweco kugi iwi lembe moko ma gimaru. Ku lapor, dhanu ma pol umaru giracwia. Pieno wacopo wacu igi kumae: “Saa moko nyo ing’eyo nia jururieko gibed giwodho piny ma pol pilembe giporo ba gin moko ma nwang’u dong’ unuti. Calu ve pi niyiko mikro, jururieko gibed giponjo kite ma ithjo tio ko, man pi niyiko kamera, gibed giponjo kite ma wang’jo tio ko. Ineno nenedi? Kinde ma jururieko gibeponjo kite ma ithjo man wang’jo tio ko pi niyiko piny moko, wacopo yero nia i andha gibeponjo bodhone i bang’ ng’a?” I ng’ei m’iwinje kilili, icopo medo kumae: “Wec ma jagorlembe moko ukiewo con utuc ninyang’a lee dit. Eyero kumae: ‘Ng’atu m’uguro ith, ebiwinjo ngo? Ng’atu m’utimo wang’, ebineno ngo? . . . En e ng’atu m’uponjo dhanu ku ng’eyong’eci?’ Jururieko moko giyio wec maeno man gituc niyio bende nia Jacwic utie.” (Zab. 94:9, 10) Wacopo nyutho ire video moko m’i jw.org^® i the thiwiwec “Interviews et témoignages,” thenge m’uwacu, “Points de vue sur l’origine de la vie.” (Yab thiwiwec PUBLICATIONS > VIDÉOS.) Kunoke wacopo mio igi nyathibuku, Nyo jucwio kwo acwia? (La vie a-t-elle été créée ?), kunoke nyathibuku, Penji abic m’ukwayu jupenjiri ko iwi kite ma kwo ucaku ko (Cinq questions à se poser sur l’origine de la vie).

10. Wacopo caku wec nenedi ku ng’atu moko m’ubemaru ngo nia juwec kude iwi lembe pa Mungu?

¹⁰ Dhanu ma pol gibed gimito nia kwo migi mi nindo m’ubino ubed ma ber. Ento jumoko cwinygi pido nia ng’om bithum kunoke nyo saa moko ve nia ebicopere ngo nikwo iwi ng’om. Umego moko ma tie jaliew mi twodiri i ng’om mi Norvège uyero nia dhanu ma  wang’ ma pol gibed gimito ngo nia juwec kugi iwi lembe pa Mungu gitie ayika niwinjo ka jubeweco kugi iwi lembe m’ubekadhu i ng’om. I ng’ei motho ng’atini epenje kumae: “Iparu nia ng’a ma copo yiko kwo mwa mi nindo m’ubino? Nyo tie judong gamba, jururieko mi ng’om maeni, kunoke nyo ng’atu moko mange?” I ng’ei m’ewinjo ng’atune cuu, esomo kunoke ekoro ire paru mi giragora m’uweco tap iwi kwo ma ber mi nindo m’ubino. Dhanu moko ka giwinjo lembang’ola mi Biblia ma nia ng’om bibedo nja ku nja man nia dhanu ma mol bikwo i ie rondo ku rondo, lembene telo nen migi.​—Zab. 37:29; Ekl. 1:4.

11. Pirang’o wacikara nitio ku bodho ma tung’ tung’? man nimakere ku Jurumi 1:14-16, wacopo lubo lapor pa Paulo nenedi?

¹¹ Wacikara nitio ku bodho ma tung’ tung’ pi niweco ku dhanu ma warombo kugi. Pirang’o? Pilembe dhanu ubed ukoc; lembe m’unyang’u ng’atu moko, romo foyo ngo i ng’atu ma kucelo. Ni jumoko etie rac ungo ka jucaku kugi wec wang’ acel iwi lembe pa Mungu kunoke iwi Biblia; jumange ke lundo kara giwinji, kwayu jular jucak kugi wec iwi lembe mange. Re kadok kumeno de, wacikara nitimo kero niweco ku kit dhanu ceke. (Som Jurumi 1:14-16.) Dong’ ukwayu wang’ei nia Yehova re ma ketho lemandha dongo i adunde dhanu ceke ma gimaru lembe m’atira.​—1 Kor. 3:6, 7.

12. Wacopo tio ku bodho ma kani pi nirweyo ni dhanu mir Asie ma fodi gisayu ngo ning’eyo nia Mungu nuti?

¹² Tin i kabedo ma pol, jurwei lembanyong’a ma dupa gibed girombo ku dhanu m’uai i Asie; i kindgi, jumoko uai i theng ng’om mir Asie ma gavmenti ukwero tic mwa i ie. I ng’om ma pol mir Asie, dhanu ma dupa fodi gimiiri ngo nikesayu ning’eyo ka nyo Jacwic unuti. Re jumoko m’i kindgi gimito ging’ei lembe ma nyen, pieno gijolo ponji mi Biblia; jumange ke ku kwong’a, ava mi ponjo lembe ma nyen bedo mbe i kumgi. Waromo timo ang’o pi nikonyogi? Jurwei moko ma ging’iyo lee i tic mi lembanyong’a gituc ninwang’u bodho moko ma konyogi niweco yot yot ku kit dhanu ma kumeno: gilar gicaku weco kugi iwi lembe mange, gidieng’ kugi, kan i ng’eye gikoro igi kite ma cik mir ukungu mi Biblia ukonyo kogi ninwang’u mutoro i kwo migi.

13. Girang’o ma copo cwalu dhanu nimaru Biblia? (Nen cal m’i ng’eye.)

¹³ Dhanu ma pol gibed gimaru Biblia pilembe etie ku juk ma tung’ tung’ mi rieko. (Ekl. 7:12) Nyamego moko mir adhura mi New York ma berweyo ni dhanu ma weco dhu Chinois uyero kumae: “Abed atimo kero ninyutho igi mer, man niwinjogi kilili. Kan arombo ku ng’atu moko ma fodi udwogo ma nyen, apenje kumae: ‘Ibetimo ang’o pi ning’iyo ku kwo mi ng’ombuni? Nyo idaru nwang’u tic moko? Nyo dhanu mi ng’ombuni gijoli ma ber?’” Saa moko bodho maeno mio ire kaka mi caku weco ku ng’atini iwi Biblia. Kan enwang’u nia wec ubemol ma ber i kindgi, emedo kumae: “Iparu nia wacikara nitimo ang’o kara wabed ku winjiri ma ber ku dhanu? Nyo aromo nyutho iri juk moko ma nwang’ere i Biblia? Eyero kumae: ‘Thekri mi dhau en e calu wodho pi: ka kumeno wek dhau ma fodi ali kuwok ungo.’ Nyo iparu nia juk maeni copo konyowa nikwo ma ber ku dhanu mange?” (Rie. 17:14) Niweco ku dhanu i ayi maeno romo konyowa ninwang’u ju ma gicopo maru niponjo lembe lee.

14. Umego moko mir Extrême-Orient betimo ang’o pi nikonyo dhanu ma giyio ngo nia Mungu nuti?

¹⁴ Dong’ ka ng’atini uwacu iwa nia en eyio ngo nia Mungu nuti, waromo yero ire ang’o? Umego moko m’ucaku rweyo lembanyong’a niai con ni dhanu ma gijurudini ngo i Extrême-Orient ukoro kumae: “I ng’ombuni ka ng’atu moko ubeyero nia ‘ayio ngo Mungu,’ nwang’u emito  yero nia eyio ngo mungu m’araga ma dhanu ma pol mi kabedo maeni woro. Pieno, abed acwaku paru migi nia andha mungu ma pol dhanu yiko gin, man gitie mungu mandha ngo. I ng’eye, asomo kugi Yeremia 16:20 m’uyero kumae: ‘Dhanu bitimo mungu ire gire, ma gi mungu ngo?’ E adok apenje kumae: ‘Wacopo ng’eyo tung’ tung’ i kind Mungu mandha ku mungu ma dhanu yiko gin nenedi?’ Awinje kilili mandha man asomo ire Isaya 41:23, m’uwacu kumae: ‘Wuyer pi gin ma bibino ma cen, kara wang’ei nia wu mungu.’ I ng’eye, anyutho ire lembila acel ma Yehova uyero pi nindo m’ubino.”

15. Lapor p’umego moko mir Asie ma yo nyangu ubemio iwa ponji ma kani?

¹⁵ Kenen bodho m’umego moko mir Asie ma yo nyangu betio ko kinde m’edok i liew. Ekoro kumae: “Asomo igi lembe mi rieko ma nwang’ere i Biblia, lembila m’udaru nipong’o, man cik m’ubetelo wi piny ma nwang’ere i kor polo man ma wi ng’om. I ng’eye, anyutho igi nia lembe maeno zoo ukonyowa ninyang’ kamaleng’ nia andha Jacwic utie man eriek lee dit. Kinde ma ng’atini umaku benyang’ nia andha Mungu copo bedo nuti, e acaku ninyutho ire gin ma Biblia ukoro iwi Yehova.”

16. Nimakere ku Juebrania 11:6, pirang’o ubekwayu juponj Biblia gibed ku yioyic ma tek i Mungu man iwi Biblia? Wacopo konyogi nenedi kara gibed ku yioyic ma tek?

¹⁶ Kinde ma wabeponjo Biblia ku dhanu ma gidongo i ng’om ma ju ma pol gitie ngo jurudini, wacikara nikonyogi saa ceke kara gibed ku yioyic ma tek nia andha Mungu nuti. (Som Juebrania 11:6.) Ukwayu wakonygi gibed bende ku yioyic iwi Biblia. Eno copo kwayu nia wabed wadwog iwi ponji moko wang’ dupa. Kubang’ ponjiman, kwayu wawec kugi iwi lembe m’ubenyutho kamaleng’ nia Biblia uai i bang’ Mungu. Ku lapor, wacopo weco kugi i adundo iwi lembila mi Biblia m’udaru pong’o, kite ma Biblia koro ko lembe mi sians man mi kpawa tap tap, kunoke kite ma Biblia konyo kowa kubang’ nindo.

17. Mer ma wamaru ko dhanu copo bedo kud adwogi ma kani i wigi?

¹⁷ Waromo konyo dhanu nidoko julub pa Kristu ka wabenyutho igi mer kadok gitie jurudini kunoke ngo. (1 Kor. 13:1) Kinde ma wabeponjo kugi Biblia, lembakeca mwa utie ninyutho igi nia Mungu umaruwa man ebemito nia wan de wamare. Kubang’ oro, dhanu ma dupa ma gilar gimaru ngo lembe mi dini, ku ju ma nwang’u gimaru lembene nok gibelimo batizo, pilembe giponjo nimaru Mungu. Pieno, bed ku nen ma ber iwi dhanu mi kwonde ceke, nyuth igi mer man dieng’ pigi. Winjgi, man tim kero ninyang’ i paru migi. Nikadhu kud i lapor peri, ponjgi gidok julub pa Kristu.