SAA moko jubed jutio ko. Wakenen lapor acel. Poi mi Cik 24:14, 15 uyero kumae: “Kud isend jamiru ma mi sukulia ma jacan man jacanpiny, tek ebedo kind utumeru, kadi kind umondo peri ma gini i ng’om peri . . . emaru ywak i wii ba Yehova, man ebed ni dubo iri.”

Jugam junwang’u girakiewa iwi kit ywak ma kumeno ceng’ini kud adhura mi Ashdod i wang’ oro 600 W.R.M. Jukiewe iwi adekle, copere pi jafurpodho ma saa moko nyo udaru ngo nicoko dhu mwoka i mukero ma nwang’u ecikere nicoko. Jukiewo wecne ni guverner kumae: “Nindo moko i ng’ei ma jaratic peri [jafurpodho] udaru coko dhu mwoka ma jukayu, Hoshayahu ma wod Shobay ubino man eting’o bongu pa jaratic peri. . . . Juwada ceke ma wabino kayu mwoka wakugi i ceng’ ma tek gibituco . . . nia ayero lemandha. Akoso ngo. . . . Akweyi, guverner, keth judwog bongu pa jaratic peri, kisa meki i kuma! Kud ibed ling’ ni jaratic peri ma jumayu bongu pare.”

Jakor kpawa moko ma nyinge Simon Schama uyero nia ywak maeno “ubenyutho ngo iwa kende kende pi kwac pa jafurpodho, m’ubekwayu ya judwog [bongu pare]. Ebenyutho bende nia jafurpodho ung’eyo lembe moko mi cik mi Biblia, asagane cik ma nwang’ere i Lembe mi Julawi man i Poi mi Cik, m’uyero nia kud jusend jucan.”