NYAMEGO moko ma jayab yo ma nyinge Sylviana ma oro pare 27 uyero kumae: “Kinde m’awinjo lembe ma beco ma jurimba m’ucidh urweyo kaka ma yeny utie lee i ie gikoro, an de amito nia abil kit anyong’a ma ginwang’u.” Emedo kumae: “Re lworo ubino nega nia acopo romo ngo nitielo tic mi rweyo lembanyong’a kaka ma yeny tie lee i ie.”

Nyo in de itie ku kit pidoic ma rom ku pa Sylviana? Nyo in de ibemito icidh irwei lembanyong’a mi Ker kaka ma yeny tie lee i ie, re ibepenjiri ka nyo ibiromo? Ka kumeno, cwinyi kud utur! Umego ku nyimego dupa de ginwang’iri i wang’ peko m’ubino nicerogi ku timo tic mi rweyo lembanyong’a lee, ento ku kony pa Yehova givoyo pekone. Pi ning’eyo kite ma Yehova ukonyo ko jumoko m’ikindgi, wabiliewo Madagascar ma tie cula ma dit mir ang’wen i ng’om zoo.

I kind oro apar m’ukadhu, jurwei man juyab yo ma gitie kud amora, ma wendgi ukadhu 70, giai kud i ng’om ma tung’ tung’ 11 * gicidho pi nirweyo lembanyong’a i kabedo maeno mir Afrika, kaka ma dhanu ma pol winjo i ie lembe pa Mungu man woro i ie Biblia. Bende, jurwei ma dupa mi Madagascar de giweko kabedo migi man gidok i theng culane ma tung’ tung’ pi nirweyo lembanyong’a. Wakewec iwi jumoko m’ikindgi.

Louis giku dhaku pare Perrine ma oro migi 30 ku wiye, giai kud i France gicidho i Madagascar. Nwang’u pi oro ma dupa gibino ku paru mi dok i ng’om mange kara girwei lee, ento Perrine ubino ku jiji. Perrine ukoro kumae: “Lworo ubino nega nicidho kaka ma fodi atundo ngo i ie. Cwinya de ubino dieng’ nia wabeweko wedi mwa, cokiri mwa, ot mwa, kakare ma tung’ tung’ ma wang’iyo i igi man tic mwa. Andhandha, lworo ubino cera ku timo lembe dupa, man ugam ukwayere nia awodh lworone cen kud i ia.” Perrine ugam unwang’u tegocwiny, pieno i oro 2012, gicidho giku Louis i Madagascar. Ewinjere nenedi i ng’ei yub maeno ma gimaku? Ekoro kumae: “Kan abeparu pi lembuno, aromo yero nia ebino lembe  m’utielo yioyic mwa lee akeca, nineno kite ma Yehova ukonyowa ko i kwo mwa.” Louis de umedo kumae: “Wabino ku mutoro ma lee dit nineno nia juapar ma waponjo kugi Biblia gibino i Poi pi tho pa Kristu ma kwong’a ma watimo i Madagascar!”

Ang’o m’utielo cwinygi kara gimed asu ku tic migi saa ma ginwang’iri ku peko? Gikwayu Yehova nikadhu kud i rwo nia emii igi tego ma gitie ku yenyne pi niciro. (Flp. 4:13) Louis ukoro kumae: “Waneno kite ma Yehova udwoko ko wang’ rwo mwa, man kite m’emio ko iwa ‘kwiocwiny pa Mungu.’ Eno umio iwa kaka mi ketho wiwa i kum mutoro ma wabenwang’u nikadhu kud i tic mwa. Bende, jumer mwa m’udong’ i pacu gibed gioro iwa barua i yo ma tung’ tung’ pi niketho cwinywa kara kud wavoci.”​—Flp. 4:6, 7; 2 Kor. 4:7.

Yehova umio mugisa lee dit ni Louis giku Perrine nikum cirocir ma ginyutho. Louis uyero kumae: “I dwi mir 10, oro 2014, julwong’owa i France i somo mi Jukristu ma gigamiri. * Somo maeno ubino giramia m’uai i bang’ Yehova ma wiwa copo wil ko ngo.” I ng’ei somo, juruot maeno gibino ku mutoro kinde ma juorogi gidok kendo i Madagascar.

I oro 2010, Didier giku dhaku pare Nadine giai kud i France gidok i Madagascar nwang’u gitie ku oro 50 ku wiye. Didier ukoro kumae: “Watimo tic pa jayab yo nwang’u fodi wan aradu man i ng’eye wanyolo awiya adek, jumaco ario ku nyaku acel. Kinde ma awiyane udongo, wapimo nineno ka nyo wacopo cidho nirweyo i ng’om mange.” Nadine uyero kumae: “Kinde m’aparu nia wacipokara kud awiya mwa, jiji umondo i ia, re awiyane giyero iwa kumae: ‘Ka wudok i ng’om mange pi nirweyo kaka ma yeny utie lee i ie, anyong’a binegowa piwu!’ Wec mir awiya eno ugam utielo cwinywa, e wacidho i Madagascar. Kadok nwang’u kawoni wabekwo ngo ceng’ini kud awiya mwa de, re anyong’a ubenegowa pilembe wabed waweco kugi wang’ ma pol.”

Ponjo dhok mi Malgache ubino lembe ma yot ungo ni Didier giku Nadine. Nadine uyero m’ebevonjo kumae: “Watie ngo awiya ma oro migi 20.” Dong’ gitimo nenedi ke? Mi kwong’o gidok i cokiri mi dhok mi Français. I ng’eye kinde ma ginwang’u nia gitie ayika man gitie ku saa lee pi niponjo dhok mi Malgache, gigam gidok i cokiri mi dhokne. Nadine ukoro kumae: “Dhanu ma dupa ma wabed wanwang’u i tic mi rweyo lembanyong’a gimaru niponjo Biblia. Wang’ ma pol giparu nia wabino i bang’gi pi niliewogi. Ku kwong’a, abed aneno ve etie lembe ma copo timere ngo. Amaru nitimo tic pa jayab yo i kabedo maeni. Kan aceu kugweno, ayero yor i ia kumae: ‘Atie ku mutoro pilembe abecirweyo lembanyong’a tin!’”

Didier de ubepoi kinde m’ecaku ponjo dhok mi Malgache aponja. Ekoro m’ebevonjo kumae: “Nindo moko abino telo wi coko, re anyang’ ungo nyathuthuthu de i dwokowang’ penji m’umego ku nyimego gibemio. Ka ng’atu moko udwoko wang’ penji, ayero para kende kende nia ‘Afoyo.’ E i ng’ei m’afoyo dwokowang’ penji pa nyamego moko, dhanu m’ubedo yor i ng’eye gicaku gwelo ira nia edwoko vii. E wang’ acel anyutho umego mange m’udok uculo tap; maeca re anwang’u nia edwoko cuu.”

I coko ma dit mir adhura mi oro 2005, Thierry giku dhaku pare Nadia gineno tuko m’anena ma thiwie bino, “Keth lembakeca ma mio yung ni Mungu.” Tuko maeno m’uweco iwi lapor pa Timoteo umulo adundegi lee akeca, man umio igi ava ma lee dit mi cidho nirweyo lembanyong’a mi Ker kaka ma yeny mi jurwei tie lee i ie. Thierry ukoro kumae: “Kinde ma tukone uthum, saa ma dong’ wabepadu cingwa, aloko wang’a i bang’ dhaku para man apenje kumae, ‘Wan ke wabecidho kani?’ Eyero nia en de ebeparu lembe ma rom.” Ndhundhu i ng’ei ma gidok kud i coko, gicaku paru lembe ma giromo timo pi nitundo i lembakeca migi. Nadia ukoro kumae: “Wacaku jwigo piny mwa nok nok nitundo edong’ ma romo sakoc ang’wen!”

I oro 2006 gicidho i Madagascar, man ginwang’u mutoro i rweyo lembanyong’a niai ma fodi gicaku acaka. Nadia uyero kumae: “Kite ma dhanu ujolo ko rwonglembe umio iwa mutoro lee dit.”

Re i ng’ei oro 6, juruot maeno ginwang’u peko moko. Min Nadia ma nyinge Marie-Madeleine m’ubino i France, upodho e cinge utur man enwang’u ret i wiye de. Nadia giku won ot pare gicidh giweco ku munganga m’ubethiedho Marie-Madeleine man gipenje ka nyo gicopo dok ku min ne i Madagascar. Kadok nwang’u oro pare 80 de, re eyio kud anyong’a nidok kugi. Marie-Madeleine uwinjere nenedi nikwo i ng’om mange? Eyero kumae: “Saa moko ebed ebedo ira tek ning’io ku lembe, re kadok nwang’u aromo timo ngo lembe zoo de, pira tie tek i cokiri. Bende anyong’a ubenega pilembe dwogo m’adwogo ko i bang’ nyaku para giku won ot pare uketho gibemediri asu ku tic migi.”

Wakewec kawoni iwi umego ma nyinge Riana, ma oro pare 22, m’udongo i pacu ma julwong’o Alaotra Mangoro, yo nyangu mi Madagascar, kakare ma cam cek lee i ie. Ebino riek i somo, pieno emito ecidh emed somo ma malu. Re kinde m’ebeponjo Biblia, paru pare ulokere. Ekoro kumae: “Agam atimo kero kara adar somo mi diere, man ang’olo ni Yehova nia tek anwang’u diplom ci, abicaku tic pa jayab yo.” Kinde ma Riana unwang’u diplom, egam etimo calku lembe m’eng’olo. Edok i bang’ umego moko ma jayab yo man enwang’u tic moko mi saa ma nyanok, e ecaku tic pa jayab yo. Riana uwacu kumae: “I kind yub ceke m’adaru maku, maeni usagu mange ceke.”

Re wat pa Riana ginyang’ ungo nia pirang’o ekwero nisomo somo ma malu. Ekoro kumae: “Umin vwa giku wang’umira gicega nia amed somo ma malu. Re amito ngo lembe moko nyanok de ucera ku tic pa jayab yo.” Yor i wang’e de nwang’u Riana ubed umito ecidh erwei kaka ma yeny mi jurwei utie lee i ie. Dong’ ang’o mange m’uketho emedere asu ku tic pa jayab yo ke? Ekoro kumae: “Jukwo ubin ukwalu piny yo fwa man gicoko piny para ma pol. Kwo m’utimere ne uketho apoi pi wec ma Yesu uyero nia wukan ‘piny m’akana mu i polo.’ E amaku yub nia ukwayu atim kero para ceke pi nisayu lonyo mi tipo.” (Mat. 6:19, 20) E edok i theng cula mi Madagascar yo piny i kilometre 1300 ku pacu ma thugi. I kabedo maeno, ceng’ rieny hai, man piny de uthwo. Dhanu ma gikwo i kabedone thek migi julwong’o Antandroy. Pirang’o eng’io nidok i kabedo maeno?

Dwi acel i wang’e ma fodi jukwalu ngo piny, Riana ucaku ponjo Biblia ku jumaco ario mi thek mi Antandroy. Eponjo wec moko mi dhok migi ma julwong’o Tandroy man ecaku paru pi dhanu ma dupa mi thek maeno ma fodi giwinjo ngo nyanok de rwonglembe mi Ker. Eyero kumae: “Akwayu Yehova ukonya kara adok i kabedo ma juweco i ie dhok mi Tandroy.”

Re ndhundhu saa ma Riana utundo kaka m’edok i ie, enwang’ere i wang’ peko moko. Tic m’eromo timo pi ninwang’u sente ubino mbe. E jalwo moko uyero ire kumae: “Pirang’o ibino kuni? Dhanu ma keni gibed gicidh gisayu tic kaka m’iai i ie!” I ng’ei yenga ario, Riana uai kud i kabedo maeno ma sente acel de mbe i kume, man ecidho i coko ma dit mir adhura m’ebepenjere nia dong’ ecopo timo ang’o. I nindo ma tokcen mi coko, umego acel ubin uroyo piny moko i jeba mi koti pa Riana. Ubino sente ma romo dwoke i kabedo ma thek mi Antandroy ni ie, man m’ecopo wok caku ko the kuloka moko ma nyanok mi lworo cak. Riana uyero kumae: “Yehova ukonya tap i saane. Kawoni dong’ aromo medara nikonyo dhanu mange ma fodi giponjo ngo lembe iwi Yehova!” I cokiri bende tic ubino dupa dit m’ukwayu jutim. Riana  umedo kumae: “Jubed jumio ira korolembe mi dhanu ceke wang’ ario i kind dwi acel. Yehova ubino tenda nikadhu kud i dilo pare.” Tin eni de, Riana ubemedere asu nirweyo rwonglembe mi Ker ni dhanu ma pol ma weco dhok mi Tandroy ma gibemito ging’ei lembe iwi Yehova.

Yehova ung’olo nia ebimio mugisa ni dhanu ceke ma gibemito gitim ire. (Isa. 65:16) Ka wabetimo kero pi nivoyo peko m’ubecerowa ku timo tic mi rweyo lembanyong’a lee, emio iwa mugisa. Wakedok iwi lapor pa Sylviana, ma waweco pire i acaki mi korolembe maeni. Ebino ku lworo nia ecopo romo ngo nidok kaka ma yeny mi jurwei utie lee i ie. Pirang’o ebino ku paru maeno? Ekoro kumae: “Atie abala, tienda ma yor acwic ukadhu ma yor acam. Pieno kan abewotho abed adok i ng’eta acel, eno ketho aol pio.”

I oro 2014, Sylviana giwinjiri giku nyamego Sylvie Ann, ma tie jayab yo m’aradu mi cokiri migi man gidok i pacu moko ma nwang’ere i kilometre 85 ku pacu ma thugi. Kadok ginwang’u peko de, re Sylviana utundo i kum lembakeca pare, man eno ubino mugisa ma lee dit ire! Ekoro kumae: “I ng’ei oro acel kende m’atimo tic i kabedo ma nyen m’acidho i ie, mego moko m’aradu, ma nyinge Doratine m’aponjo kude Biblia ulimo batizo i coko ma dit mi twodiri.”

Yehova ung’olo ni jurutic pare ceke kumae: “Abimio iri tego; eyo, abikonyi.” (Isa. 41:10) Wec mir umego ku nyimego ma gicidho kaka ma yeny mi jurwei utie lee i ie ubenyutho nia, ka ng’atuman ubetimo kero pi nivoyo peko ma copo cere ku rweyo lembanyong’a lee, lembang’ola maeno timere andhandha i kwo pare. Bende, ebedo ku mer ma thuth karacelo ku Yehova. M’umedo maeno, ka wabemiara giwa ku berocwinywa i kabedo ma wabekwo i ie kunoke i ng’om mange, nwang’u wabeyikara pi tic dupa ma bitimere i ng’om ma nyen. Didier ma waai waweco pire uyero kumae: “Nitimo tic kaka ma yeny mi jurwei lee i ie, ubetendowa pi nindo m’ubino!” Dong’ wek jurwei ma dupa gimiiri gigi, kara gicak ninwang’u ng’iyo niai kawoni!