1, 2. Yehova nyutho berocwiny nenedi iwa?

YEHOVA tie Mungu ma won berocwiny. Gin moko ci ma watie ko uai i bang’e. En re m’etie won piny ceke ma pigi tek ma nwang’ere i ng’om, man etio ku pinyne pi niketho giracwia pare gikwo ma ber. (Zab. 104:13-15; Hag. 2:8) Biblia unyutho iwa kite ma con ebed etio ko ku piny pare ma pigi tek, pi nipong’o yeny mi dhanu pare i ayi mir udu.

² Ku lapor, Yehova umio mana man pii ni thek mir Israel, pi nindo 40 ma gitimo i langa. (Ai 16:35) Eno uketho gin acel de mbe m’urem igi. (Neh. 9:20, 21) Oro moko i ng’eye, Yehova umio copo ni jabila Elica, pieno eketho moo ma nok pa dhatho moko umedere lee dit. Giramia maeno m’uai i bang’ Mungu ukonyo dhathone niculo banja mi sente m’ubino i ie, re asu dong’ sente udong’ ma giromo kwo ko ku nyithindhe. (2 Ub. 4:1-7) Bende, ni kum tego pa Yehova, Yesu utimo udu m’enyayu ko cam, man bende sente, saa ma yenyne ubino nuti.​—Mat. 15:35-38; 17:27.

3. I thiwiwec maeni wabiweco iwi lembe ma kani?

³ Yehova romo ng’io nitio ku gin moko ci m’emaru kara ekony  giracwia pare. Re asu ebekwayu jurutic pare gimii piny moko ma kakorgi, pi nitielo tic ma dilo pare ubetimo. (Ai 36:3-7; som Lembrieko 3:9.) Pirang’o Yehova ubemito nia wamii ire piny mwa ma pigi tek ma de en re m’emio iwa? Jurutic pa Yehova mi rundi ma con gibed gitielo tic pare nenedi? Tin eni dilo pa Yehova tio nenedi ku sente ma jubemio ni giramia? I thiwiwec maeni wabinwang’u dwokowang’ penji maeno.

4. Ka wabetielo tic pa Yehova nwang’u wabenyutho ang’o?

⁴ Wabed wamio ni Yehova pilembe wamare lee dit. Ka wabeparu pi lembe ceke m’etimo iwa, adundewa pong’ hau ku mutoro. Ubimo Daudi de mutoro unege, kinde m’ebekoro pi piny ma jubino ku yenyne kara jugier hekalu. Daudi uwacu nia piny ceke uai i bang’ Yehova, man gin moko ci ma wamio ire ular uai de i bang’e.​—Som 1 Lemkei 29:11-14.

5. Biblia ubeponjowa nenedi nia nimio ku berocwiny utie thenge ma pire tek ma waworo ko Yehova?

⁵ Bende, wamio ni Yehova pilembe eno utie ayi ma wawore ko. I ginmawokiwang’ moko, Yohana uwinjo jurutic pa Yehova i polo gibeyero kumae: “Eromo kudi, Rwoth mwa man Mungu mwa, ya igam dwong’ man yung ku tego: kum icwio gin ceke, man gibedo nuti ni kum yeny m’iyenyo, gicwiri de.” (Nyu. 4:11) Andhandha, Yehova uromo ku dwong’ man yung ceke, pieno re ma wabemito wamii ire piny mwa ma pigi tek akeca. Yang’ con, Yehova ung’olo nikadhu kud i bang’ Musa, nia thek mir Israel gibed gitim agba wang’ adek i kind oro acel. I kind thier ma gibed gitimo i saa mir agba maeno, moko ubino nimio giramia ni Yehova. Jung’olo igi nia “ku giwok i wang’ Yehova ma cing’gi nanu.” (Poi. 16:16) Tin eni bende, giramia ma ku berocwiny utie thenge ma pire tek ma waworo ko Yehova. Eno nyutho nia wabetielo tic ma dilo pare ubetimo, man wabeneno ticne ni gin ma pire tek iwa.

6. Pirang’o etie lembe ma ber dit nia wabed wamii ku berocwinywa? (Nen cal mir acaki.)

⁶ Etie lembe ma ber dit nia wabed wamii ku berocwinywa, kakare nikuro kwa nia jumange re m’umii iwa. (Som Tic mi Jukwenda 20:35.) Kepar nia junyodo moko umio sente ma nok ni nyathin migi, re nyathin ne ulund uting’o kum sentene moko eng’iewo ko piny ni junyodo pare. Iparu nia junyodo pare gicopo winjiri nenedi? Kunoke kepar nia aradu moko ma jayab yo m’ubekwo yo pagi uting’o sente moko man emio ni junyodo pare, kara ukonygi ku pangu ot, kunoke ku ng’iewo cam. I andha, junyodo pare gigeno ngo piny pare, re gibijolo giramia pare. Pirang’o? Pilembe kumeno re ma nyathin unyutho foyofoc pi lembe ceke ma junyodo gitimo ire. Rom rom bende, Yehova ung’eyo nia etie lembe ma ber dit ka wabemio ire piny mwa ma pigi tek.

7, 8. Dhanu pa Yehova mi rundi ma con giweko lapor ma kani, i lembe m’uneno mio giramia (a) pi nitielo tic ma segi? (b) pi nitielo tic pare?

⁷ Biblia uyero nia dhanu pa Mungu mi rundi ma con gibed gimio giramia pi nitielo tic pare. Saa moko gibed gimio pi nitielo tic ma segi. Ku lapor, Musa umio amora i kum nyithindho mir Israel nia gimii giramia kara jugier ko hema. Oro dupa i ng’eye, ubimo Daudi de ukwayu nia dhanu gimii sente kara jugier ko hekalu. (Ai 35:5; 1 Kei. 29:5-9) I rundi p’ubimo Yehoac, julam gitio ku sente ma dhanu umio pi niyiko kum hekalu m’unyothere. (2 Ub. 12:4, 5) I rundi ma  kwong’a, Jukristu giwinjo nia ndru upodho i Yahudi, man umego gibino ku yeny mi kony. Pieno, Jakristuman ukeco nia ebioro piny moko ma kakore, ni umego ma kuca.​—Tic. 11:27-30.

⁸ Bende, dhanu pa Mungu gibed gimio sente pi nikonyo ju ma gibetelo wi tic pare. Ku lapor, i the Cik pa Musa, Julawi gibino mbe ku giralaga calu ma suru mange ubino ko. Pieno, Juisrael mange gibed gimio apaje mi piny migi ni Julawi. Eno ubed uketho Julawi gitimo tic migi cuu i hema. (Wel 18:21) Bende jumamon moko gitio ku piny migi ku berocwinygi pi nikonyo Yesu ku jukwenda pare.​—Lk. 8:1-3.

9. I rundi ma con dhanu ubed unwang’u sente ma gimio pi giramia i ayi ma nenedi?

⁹ Giramia ma dhanu ubed umio con gibed ginwang’e i ayi ma tung’ tung’. Ecicopere nia piny ma nyithindho mir Israel gimio kara jugier ko hema, ubino piny ma pigi tek ma giai ko i Misiri. (Ai 3:21, 22; 35:22-24) I rundi ma kwong’a, Jukristu moko ubed ulworo piny migi, calu ve podho kunoke ot, man gikelo sentene i bang’ jukwenda. I ng’eye, jukwenda gitio ku sentene pi nikonyo umego ku nyimego ma gibino ku yeny mi kony. (Tic. 4:34, 35) Jukristu mange ke ubed ukoyo sente moko segi wang’ ma pol, kara gibed gimie pi nitielo tic. (1 Kor. 16:2) Pieno ju ma gilony lee ku ju ma gijucan ma ngolo ngolo de gibed gimio piny moko.​—Lk. 21:1-4.

10, 11. (a) Wacopo lubo lapor mi berocwiny mi jurutic pa Yehova ma con nenedi? (b) Ibed ineno tielo tic mi Ker nenedi?

¹⁰ Tin eni, wan bende jucopo kwayu nia wamii giramia kara ukony tic moko ma segi. Saa moko nyo cokiri mwu upangu nia ukwayu juyik Ot Ker mwu, kunoke jugier ma nyen. Kunoke nyo ubekwayu juyik udi mi filial mwu. Wacopo bende nimio sente pi nitielo coko mwa ma dongo. Bende, saa moko nyo peko ma wok rek unwang’u umego mwa ma gini theng ng’om mange, man ubekwayu nia wakonygi. M’umedo maeno, giramia mwa konyo bende bamisioner, juyab yo ma segi, juliew mi twodiri, ju ma gibetimo i kabedo mwa ma dit, man ma gibetimo i filial ma tung’ tung’ i wang’ ng’om zoo. Cokiri mwu copo bende nioro giramia pi nikonyo tic mi giedo mi Udi Ker man mi Udi ma konyo pi coko ma dongo.

¹¹ Ng’atuman m’ikindwa copo mio piny moko pi nitielo tic ma dilo pa Yehova ubetimo i nindo maeni mi kajikceng’. Giramia ma pol jumange ng’eyo ngo wende. Ka waberoyo sente i sanduku mi Ot Ker, kunoke ka wabemio giramia nikadhu kud i jw.org, wayio ngo jumange ung’ei nia wamio adi. Dong’ kan ibeparu nia giramia peri tie nok dit man nia konyne mbe ke? Ng’ei nia giramia ma pol ma dilo benwang’u utie giramia ma thindho thindho ma jucoko dhoggi, ento utie ngo sente ma dongo m’uai i bang’ jumoko kende. Kadok umego mwa ma gitie ku sente ma nok magwei de gilubo lapor mi Jukristu mi Makedoni. Jukristu maeno gibino i ‘can piny ma apila,’ ento gikwayu nia juwek gin de gimii; e gimio ku berocwinygi.​—2 Kor. 8:1-4.

12. Dilo pa Yehova timo kero pi nitio nenedi ku giramia?

¹² Guriri m’utelowic tio ku giramia cuu mandha man ku rieko ma lee dit. (Mat. 24:45) Umego ma gitie i Guririne girwo pi nimaku yub ma cuu, man gipangu ma ber dit kite ma juromo tio ko ku sente mi giramia. (Lk. 14:28) I rundi ma con, jumaco ma gibed gineno wi giramia gibed gitio kude pi thier pa Yehova kende. Ku lapor, kinde ma  Ezra ubedok i Yerusalem, ubimo mi Perse umio mola ma kwar ku mola ma tar man bende piny mange ma pigi tek ma welne copo kadhu dolar milioni 100 tin eni. Ezra ung’eyo nia eno utie giramia m’ubimo umio ni Yehova. Pieno ekoro cuu mandha ni ju m’ubecidho ku giramiane, kite ma gibigwoke ko kinde ma gibekadhu kud i kind ng’om ma ariti ni ie. (Ezr. 8:24-34) Oro ma dupa i ng’eye, jakwenda Paulo ujoko sente pi nikonyo umego mi Yahudi ma gibino ku yeny mi kony. Umego m’eng’io pi nitero sentene gibino dhanu ma igi pido “kum gin m’ubedo [atira] i wang’ [Yehova] kende ngo, endre i wang’ dhanu bende.” (Som 2 Jukorinto 8:18-21.) Tin eni, dilo pa Yehova ubelubo lapor pa Ezra man pa Paulo, man ebetio cuu mandha ku giramia.

13. I kind nindo m’ukadhu ceng’ini eni, dilo pa Yehova utimo alokaloka ma kani?

¹³ Saa moko juruot gicopo timo alokaloka i kite ma gibetio ko ku sente migi, kara kud ginyoth sente nisagu ma gibenwang’u. Kunoke gicopo neno kite ma gibijwigo ko lembe ma pol i kwo migi kara gitim lee ni Yehova. Dilo pa Yehova de tie kumeno. I kind nindo m’ukadhu ceng’ini eni, jupangu lembe dupa ma nyen m’ukwayu nia jutim, eno uketho jutio ku sente lee nisagu ma jubenwang’u. Calu juruot, dilo ugam uyenyo yo mi jwigo wend sente ma jubetio ko, man edwoko tic udoko yot kara giramia ma wubemio ku berocwiny utim lembe dupa ma beco.

14-16. (a) Jubed jutio nenedi ku giramia ma wabemio? (b) Lembe maeno copo konyi in giri nenedi?

¹⁴ Dhanu ma dupa ma gitie i lemandha niai con, giwacu nia tin eni dilo pa Yehova ubemio piny dit nisagu m’iwang’e zoo. Tin eni watie ku jw.org man televizio mi JW. Bende watie ku Biblia, Lok mi ng’om ma nyen (Les Saintes Écritures. Traduction du monde nouveau) i dhok dupa dit. M’umedo maeno, coko ma dongo ma diko ng’om dupa utimere i oro 2014/2015, pi bang’ adek i adhura ma dongo 14 i wang’ ng’om zoo; jutimo cokone i bar mi mupira (stades) mir adhurane. Thiwie ubino, “Wamedara niyenyo mi kwong’o Ker pa Mungu!” Dhanu ceke ma gibino tie i coko maeno gibedo ku mutoro ma lee akeca!

¹⁵ Ju ma dupa m’ikindgi gikoro nia gitie ku foyofoc lee dit pi lembe ma dilo pa Yehova ubetimo. Ku lapor, umego moko giku  dhaku pare ma gibekwo i Asie gikiewo kumae: “Adhura ma wabetimo i ie tic pa Mungu utie nyanok. Eno uketho saa moko wanwang’ara nia watie kendwa, man wiwa wil nia tic pa Yehova ubetimere iwi ng’om ngung’. Re ka wabeneno program ma tung’ tung’ mi televizio JW, wapoi wang’ acel nia kara watie karacelo kud umego ku nyimego mi ng’om zoo. Umego ku nyimego ma watie karacelo kugi gimaru televizio JW lee mandha. Wang’ ma pol wabed wawinjo gibeyero nia, ka gineno program ma kubang’ dwi, ginwang’iri ceng’ini mandha kud umego mi Guriri m’utelowic. Kawoni gitie ku mutoro ma yawe mbe nibedo i dilo pa Mungu.”

¹⁶ I wang’ ng’om zoo, Udi Ker romo 2 500 ma jubegiero man ma jubeyiko. Umego ku nyimego mi cokiri moko ma nwang’ere i ng’om mi Honduras giwacu nia con gibed gileko aleka nia gibibedo ku Ot Ker, re kawoni dong’ gibeneno Ot Ker migi utie andha. Gikiewo kumae: “Watie ku anyong’a ma dit nibedo i kind dhanu pa Yehova i ng’om zoo, man nibedo i kind utumego mi ng’om ngung’.” Jumange dupa de gidwoko foyofoc ma rom kumeno kinde ma ginwang’u Biblia man girasoma mange i dhok migi mir anyoli, kinde m’umego ku nyimego ukonyogi i saa ma peko ma wok rek unwang’ugi, kunoke kinde ma gineno adwogi ma ber mi rweyo lembanyong’a i adhura ma dongo, man kaka ma dhanu bepong’ i ie i kabedo migi.

17. Wang’eyo nenedi nia Yehova ubekonyo dilo pare tin eni?

¹⁷ Dhanu ma pol ma gitie ngo Jumulembe pa Yehova, gicopo nyang’ ungo nia wabetimo lembe ceke ma waai wakwanu malu no ku giramia ma ku berocwiny. Nindo acel, jatelwic mi kampuni moko ma dit ucidh uliewo kakare moko ma jubed juwodho i ie buku mwa. Ezungo nia dhanu m’ubetimo tic kakeca zoo gimiiri gigi, man ticne ubetimere ku giramia ma ku berocwiny, man nia lembe mange ma watimo de mbe m’uberoyo sente. Eyero nia wabetimo lembe ma timere ngo. E wayio ire! Wang’eyo nia wabetimo lembe ceke ndhu ku kony pa Yehova kende.​—Yob 42:2.

18. (a) Mugisa ma kani ma wanwang’u ka wabemio giramia pi nitielo tic mi Ker? (b) Wacopo ponjo awiya mwa man ju ma nyen nenedi kara gin de gimii giramia?

¹⁸ Yehova umio iwa rwom man kaka mi tielo tic ma dit mi Ker. Eng’olo nia ka wabetimo kumeno, ebimio iwa mugisa. (Mal. 3:10) Eng’olo bende nia ka wabemio ku berocwiny, lembe bibedo iwa miero. (Som Lembrieko 11:24, 25.) Ewacu bende nia wabibedo kud anyong’a ka wabemio ku berocwinywa, pilembe “mio en e mugisa ma sagu gamu.” (Tic. 20:35) Nikadhu kud i wec man timo mwa, wacopo ponjo ni awiya mwa man ni ju ma nyen, ayi ma gin de giromo diko ko cing’gi i kum tic maeni, kara ginwang’ mugisa dupa.

19. Thiwiwec ma waai waponjo ukonyi nenedi?

¹⁹ Piny ceke ma watie ko uai i bang’ Yehova. Ka wabemio ire piny ma en re m’emio iwa, nwang’u wabenyutho nia wamare man wabefoyo lembe ceke m’ebetimo iwa. (1 Kei. 29:17) Kinde ma nyithindho mir Israel gimio giramia pi nigiero hekalu, ‘anyong’a unegogi, kum githiero ku berocwinygi, kum kud adundegi ma cuu githiero ku berocwinygi ni Yehova.’ (1 Kei. 29:9) Dong’ wan bende wamedara nimio kud anyong’a ni Yehova, gin ma en re m’emio iwa.