1, 2. I oro 2018, coko ma kani ma bidikowa i ayi ma segi, man pirang’o? (Nen cal mir acaki.)

NINDO 31 mi dwi mir 3, oro 2018, dhanu milioni dupa bicokiri i wang’ ng’om zoo, i coko moko ma segi ma betimere wang’ acel kende kubang’ oro. I ng’ei mwony pa ceng’, Jumulembe pa Yehova gibidikiri karacelo ku dhanu mange dupa pi nipoi pi lam ma Yesu uthiero piwa. Kubang’ oro, Poi pi tho pa Kristu diko dhanu i ayi ma wang’u ijo, nisagu lembe mange ceke ma diko dhanu i ng’om.

² Yehova giku Yesu gibedo ku mutoro ma lee dit, kinde ma gibeneno dhanu milioni dupa ubecidho i coko maeno ma segi, i saa ma tung’ tung’ i gund ng’om ngung’. Biblia ukoro nia, “udul dhanu ma dit, ma ng’atu moko mbe ma copo kwanu, m’uai kud i thek ceke kubang’gi nzu man kud i suru ceke man kodhidhanu ku dhok,” gibekok ku dwal ma dit kumae: “Both ubed ni Mungu mwa m’ujany wi komker, man ni Nyathi Rombo.” (Nyu. 7:9, 10) Andhandha, etie mutoro ma dit nineno nia kubang’ oro i saa mi Poi pi tho pa Kristu, dhanu ma dupa gimio yung ni Yehova man ni Yesu pi lembe ma yawe mbe ma gitimo!

3. I thiwiwec maeni wabinwang’u dwokowang’ penji ma kani?

 ³ I thiwiwec maeni, wabinwang’u dwokowang’ penji ang’wen ma e: (1) Acopo yikara nenedi pi Poi pi tho pa Kristu kara anwang’ konyne? (2) Poi pi tho pa Kristu ketho dhanu pa Mungu ceke bedo i acel nenedi? (3) An ke acopo timo ang’o kara dhanu pa Mungu umediri nibedo i acel? (4) Nyo Poi pi tho pa Kristu ma tokcen bibedo nuti de? Ka eyo, ebibedo awene?

4. Pirang’o pire tie tek dit iwa nicidho i Poi pi tho pa Kristu?

⁴ Pirang’o pire tie tek dit iwa nicidho i Poi pi tho pa Kristu? Thelembe mi kwong’o utie nia nikadhu kud i coko re ma watimo thier ni Yehova. Pieno wang’ei nia Yehova giku Yesu giwil ungo nyanok de ku kero ma ng’atuman ubetimo kara kud ekos coko maeno ma pire tek akeca ma betimere kubang’ oro. Wabemito Yehova giku Yesu ging’ei nia wabibedo nuti i Poi pi tho pa Kristu, kadok watie ku macero moko de, ma re copo ng’olo ngo wang’wa magwei magwei ku cidho. Ka wabecokara nja, nwang’u wabenyutho nia coko mwa pire tek iwa, ento m’usagu zoo, nwang’u wabemio kaka ma Yehova ukieu ko nyingwa i “kitabu mi poi,” ma julwong’o bende “kitabu mi kwo.” Kitabu maeno tie ku nying’ dhanu ceke ma Yehova ubemito nia ginwang’ kwo ma rondo ku rondo.​—Mal. 3:16; Nyu. 20:15.

5. I kind yenga m’ubetelo Poi pi tho pa Kristu icopo ‘mulo ii giri’ nenedi?

⁵ I kind yenga m’ubetelo Poi pi tho pa Kristu, wacikara nikoyo saa wang’ ma pol pi nirwo man pi niparu kilili ka nyo kindwa ku Yehova utie ceng’ini. (Som 2 Jukorinto 13:5.) Jakwenda Paulo uyero ni Jukristu kumae: ‘Wumul [iwu] giwu, tek wuni i yioyic.’ Wacopo mulo iwa giwa nenedi? Waromo penjara kumae: ‘Nyo ayio andhandha nia dilo maeni kende re ma Yehova ung’io pi nitimo yeny pare? Nyo abed amiara zoo pi nirweyo man pi niponjo lembanyong’a? Nyo timo para ubenyutho andhandha nia wabekwo i nindo ma tokcen, man nia ajiki mi bimobim pa Sitani ni kago? Nyo atie ku genogen ma tek i Yehova man i Yesu, calu m’alar abino ko kinde ma fodi acaku timo ni Yehova acaka?’ (Mat. 24:14; 2 Tim. 3:1; Ebr. 3:14) Niparu kilili iwi dwokowang’ penji maeno bikonyowa ‘nimulo iwa giwa’ ka nyo andha watie i yioyic.

6. (a) Yo acel kende ma romo ketho wanwang’ kwo ma rondo ku rondo utie ma kani? (b) Jadit cokiri moko beyikere nenedi kubang’ oro pi Poi pi tho pa Kristu, man in ke icopo lubo lapor pare nenedi?

⁶ Kara iyikiri ma ber pi Poi pi tho pa Kristu, ubekwayu isom girasoma m’ukoro nia pirang’o coko maeno pire tek hai, man inyam i lembe m’ibesomone kilili. (Som Yohana 3:16; 17:3.) Yo tie acel kende ma romo ketho wanwang’ kwo ma rondo ku rondo: utie ning’eyo Yehova man nibedo ku yioyic i Wode ma Yesu. Pi niyikara ma ber pi Poi pi tho pa Kristu, wacopo ng’io niponjo thiwiwec ma bikonyowa kara wanwang’ara nia kindwa utie ceng’ini ku Yehova man Yesu. Umego moko m’udaru timo nindo dupa calu jadit cokiri betimo kumeno. Pi oro ma dupa ecoko Otkur ma Wiw ma tie ku thiwiwec m’ukoro iwi Poi pi tho pa Kristu, man m’uweco iwi mer ma Yehova giku Yesu ginyutho iwa. Kubang’ oro, i kind yenga m’ubetelo Poi pi tho pa Kristu, esomo kendo kendo thiwiwecne man eparu kilili nia pirang’o coko maeno pire tie tek akeca. Saa moko ebed emedo Otkur mange acel kunoke ario i kum m’edaru nicoko. Bende ebed esomo man enyamu i giragora ma jupangu pi Poi pi tho pa Kristu. Jadit cokiri maeno ukoro nia, nitimo kumeno bekonye niponjo lembe ma nyen kubang’ oro. Re m’usagu zoo, ponjine ketho mer pare ku Yehova man Yesu medere. Ka in de ibetimo ponji peri i kite maeno, mer peri ku Yehova man Yesu bimedere ameda. In de  ibidwoko foyofoc lee pi lembe ma Yehova man Yesu gitimo, man Poi pi tho pa Kristu bimio iri kony lee dit.

7. (a) I diewor mi Cemo mir uthieno pa Rwoth, Yesu urwo pi lembang’o? (b) Ang’o m’ubenyutho nia Yehova udwoko wang’ rwo pa Yesu?

⁷ I diewor ma Yesu gicamu i ie Cemo mir uthieno pa Rwoth wang’ ma kwong’a, etimo rwo moko ma segi. I rwone, eweco iwi bedo i acel migi giku Won, man erwo nia julubne bende gibed i acel calu ma gin giku Won de gitie i acel. (Som Yohana 17:20, 21.) Ma jiji mbe, Yehova udwoko wang’ kwac ma Wode m’emaru utimo. Poi pi tho pa Kristu diko Jumulembe pa Yehova nisagu coko mange ceke, man enyutho kamaleng’ nia gitie i acel. I nindo maeno, dhanu milioni dupa mi ng’om ma tung’ tung’ man mi rangi de ma tung’ tung’, gidikiri karacelo i tung’ ng’om ngung’ pi ninyutho nia giyio nia andha Yehova uoro Wode. I theng ng’om moko, dhanu mi rangi ma tung’ tung’ gimbe ku ng’iyo mi dikiri karacelo i coko mi dini; ka gidikiri ke, jumange paru nia etie rac. Re Yehova giku Yesu giparu ngo kumeno, ento gineno nia bedo i acel mwa i saa mi Poi pi tho pa Kristu utie lembe ma ber dit.

8. Yehova ular unyutho lembang’o ni Ezekiel?

⁸ Iwa wan ma watie dhanu pa Yehova, bedo i acel utie ngo lembe mi zungo. Yehova ular unyutho pi bedo i acel maeno i wec m’eyero ni Ezekiel. Eyero nia Ezekiel uting’ yen ario: acel “pi Yuda” m’ucelo ke ‘pi Yosefu,’ man edikgi karacelo kara gidok ni yen acel. (Som Ezekiel 37:15-17.) I Otkur ma Wiw mi dwi mir 7, oro 2016, i thenge mi “Penji mi jusom,” jukoro kumae: “Nikadhu kud i bang’ jabila Ezekiel, Yehova ular ung’olo nia dhanu pare gibidok i ng’om mi lembang’ola, man gibidikiri ni dhanu acel. Lembila maeno ular uewo bende nia dhanu ceke ma gibitimo ni Mungu i nindo mi kajikceng’, gibidikiri man gibidoko ni dhanu acel.”

9. Bedo i acel ma Ezekiel ular uewo benen nenedi kubang’ oro i saa mi Poi pi tho pa Kristu?

⁹ I acaki mi oro 1919, Yehova ucaku nicoko dhu Jukristu ma juwiro ku tipo nok nok, man nidikogi kendo i acel. Gibino calu yen ma “pi Yuda.” I ng’eye, jumange dupa ma gitie ku genogen mi kwo ma rondo ku rondo iwi ng’om, gicaku nidikiri karacelo ku ju ma juwiro ku tipo. Ju maeno ma gitie ku genogen mi kwo iwi ng’om, gicalu yen ma ‘pi Yosefu.’ Yehova ung’olo nia ebidiko yen ario maeno man ‘ebidwokogi yen acel’ i cinge. (Eze. 37:19) Pieno, ediko Jukristu ma juwiro ku tipo man ‘rombe mange,’ e gidoko ni “udul acel.” (Yoh. 10:16; Zek. 8:23) Tin eni udul ario eno ceke gidikiri man gibetimo ni Yehova karacelo. Rwoth migi utie acel, Yesu Kristu, ma i lembila pa Ezekiel Mungu ulwong’e nia, “Daudi ma jatic” pare. (Eze. 37:24, 25) Kubang’ oro kinde ma wacokara pi Poi pi tho pa Kristu, wabed waneno bedo i acel mir udul ario maeno calu ma Ezekiel ular uewo. Dong’ ng’atuman m’ikindwa copo timo ang’o kara wamedara nigwoko bedo i acel mwa?

10. Wacopo timo ang’o kara dhanu pa Mungu gimediri nibedo i acel?

¹⁰ Lembe mi kwong’o ma wacopo timo kara dhanu pa Mungu gimediri nibedo i acel, utie nitimo kero nibedo ku jwigiri. Kinde ma Yesu ubino iwi ng’om, eyero ni julubne nia gicikiri nijwigiri. (Mat. 23:12) Wang’ ma pol, dhanu mi ng’om maeni gineniri nia pigi tek nisagu jumange. Re ka wabejwigara, wabicayu ngo umego ma gibetelo wi cokiri man wabiworo telowic migi. Kumeno re ma cokiri copo bedo i acel. Ento m’usagu zoo, tek watie ku jwigiri wabinyayu anyong’a i Mungu pilembe ‘ejul kum jukuhaya, ento emio bero ni ju ma mol.’​—1 Pet. 5:5.

11. Niparu iwi mukati man divai ma jutio ko i Poi pi tho pa Kristu konyowa nenedi nibedo i acel?

 ¹¹ Lembe mir ario ma wacopo timo kara wabed i acel, utie niparu kilili nia mukati ku divai nyutho ang’o. Wacikara nitimo kumeno i wang’ Poi pi tho pa Kristu, re asagane uthieno mi cing’ nica. (1 Kor. 11:23-25) Mukati ma thobi mbe i ie nyutho kum Yesu m’umbe ku dubo m’ethiero ni lam. Divai ma kwar ke nyutho rimbe. Re ubekwayu ngo wajik kende kende ninyang’ i kum lembe ario maeni. Wacikara bende ning’eyo nia jamgony ma Yesu uthiero unyutho mer ma yawe mbe i ayi ario. Mi kwong’o, Yehova umio Wode piwa; mir ario, Yesu uthiero kwo pare piwa ma jucwale ngo acwala. Ka wabeparu iwi merne, eno bicwaluwa nimarugi. Pieno, mer ma wan ceke wamaru ko Yehova biketho bedo i acel mwa ubed tek.

12. Yesu unyutho nenedi i lapor pare nia Yehova ubemito watim kisa ni jumange?

¹² Lembe mir adek ma wacopo timo kara wabed i acel, utie nitimo kisa yot yot ni jumange. Tek wabetimo kumeno, nwang’u wabeneno jamgony ma Yesu uthiero ni gin ma pire tek, pilembe etie ukungu ma Yehova weko ko dubo mwa giwa. Pi ninyutho nia timo kisa tie lembe ma pire tek, Yesu umaku lapor p’ubimo moko ku jumiru pare. Wakwei isom Matayo 18:23-34, i ng’eye penjiri kumae: ‘Nyo abed atimo lembe ma Yesu uyero? Nyo abed aciro lembe man abed anyang’ kud umego ku nyimego? Nyo atie ayika saa ceke nitimo kisa ni ju m’utimo ira lembe ma rac?’ Wang’eyo nia dubo moko utie pek nisagu mange. Bende calu ma watie dhanu ma leng’ ungo, niweko dubo moko copo bedo iwa tek. Re lapor ma Yesu umaku ubeponjowa ku lembe ma Yehova ubemito watim. (Som Matayo 18:35.) Yesu unyutho kamaleng’ nia Yehova de bitimo ngo iwa kisa, ka watimo ngo kisa ni umego mwa, m’uloko cwinye i andha. Wacikara niparu kilili iwi lembe maeno. Dong’ kara wagwok bedo i acel mwa ma pire lith i iwa, man kara emedere, wacikara nitimo kisa ni jumange calu ma Yesu uponjo iwa.

13. Ka wabekwo ku kwiocwiny ku jumange, eno nyutho nia wabemito nibedo i acel. Nenedi?

¹³ Ka wabetimo kisa ni jumange, wabedo  ku kwiocwiny kud umego ku nyimego. Jakwenda Paulo uyero nia wacikara nitimo kero ma lee kara wabed i acel man kara wabed ku kwiocwiny i kindwa. (Ef. 4:3) Pieno, ka Poi pi tho pa Kristu udhingo, asagane uthieno ma jubetime i ie, par cuu mandha iwi kite m’ibed ikwo ko ku jumange. Penjiri kumae: ‘Nyo dhanu ceke m’ung’eya gibed gineno nia athung’o ngo ng’ecwiny i ia i kum ju m’utimo ira lembe ma rac? Nyo jumange de beneno nia atimo kero niketho kwiocwiny man nigwoko bedo i acel?’ Eno utie penji ma pigi tek m’ukwayu wapar cuu i wigi.

14. Wacopo ‘reyo lembe the tiedwa i mer’ nenedi?

¹⁴ Lembe mir ang’wen ma wacopo timo kara wabed i acel, utie ninyutho mer calu ma Yehova de nyutho. (1 Yoh. 4:8) Ukwayu ngo wayer nyanok de kumae: “Aromo bedo ku kwiocwiny kud umego, re acopo ngo nibedo ku mer ma ceng’ini kugi.” Ka wayero kumeno nwang’u wabelubo ngo juk pa Paulo, m’uwacu nia wabed dhanu ma ‘reyo lembe the tielo i mer ma ng’atuman reyo lembe ma kum wadi man kum wadi.’ (Ef. 4:2) Paulo uyero ngo kende kende nia wacikara, ‘nireyo lembe the tiedwa,’ ento eyero nia wacikara nitimo kumeno re “i mer.” Tung’ tung’ unuti i kind wec ario maeno. I cokiri pa Yehova, junwang’u kit dhanu ma tung’ tung’ ma Yehova utelo i bang’e. (Yoh. 6:44) Calu m’etelogi, eno nyutho nia eneno lembe ma beco dupa i igi. Ka Mungu ngi de umaru umego ku nyimego mwa, dong’ wan ke watie ng’a pi niyero nia wamarugi ngo? Pieno wacikara nimarugi calu ma Yehova ubemito.​—1 Yoh. 4:20, 21.

15. Wang’eyo nenedi nia Poi pi tho pa Kristu ma tokcen bibedo nuti?

¹⁵ Nindo moko wabitimo Poi pi tho pa Kristu wang’ ma tokcen. Wang’eyo lembuno nenedi? Paulo uyero ni Jukristu ma juwiro ku tipo nia ka gibepoi pi tho pa Kristu kubang’ oro, nwang’u ‘gibenyutho tho pa Rwoth cil m’ebino ko.’ (1 Kor. 11:26) Yesu bende uweco pi “bino” pare saa m’ebeewo lembila iwi nindo mi kajikceng’. Kinde m’ebeweco pi masendi ma dit m’udhingo kago eni, eyero kumae: “E giranyutha pa Wod dhanu bilund wok i polo: e can bilund nego suru ceke m’i ng’om, man gibineno Wod dhanu bebino wi afuru m’i polo ku tego ku dwong’ ma dit de. Man ebioro malaika pare ku dwand agwara ma dit, e gibicoko ju ma jugoyo nying’gi karacelo kud i the yamu ang’wen, kud i tung polo kun ku kun de.” (Mat. 24:29-31) Yesu “bicoko ju ma jugoyo nying’gi,” niwacu ebiting’o Jukristu ceke ma juwiro ku tipo ma gitie iwi ng’om, man gibiidho i polo. Lembe maeno bitimere nwang’u masendi ma dit udaru caku, ento nwang’u fodi lwiny mi Armagedon ucaku ngo. I saa mi lwiny maeno, Yesu karacelo ku ju ma juwiro ku tipo 144 000, gibikiedo lwiny i dhu ker mi ng’om maeni man gibiloyo. (Nyu. 17:12-14) Poi pi tho pa Kristu ma wabitimo wang’ ma tokcen i wang’ “bino” pare pi nicoko Jukristu ma juwiro ku tipo, bibedo Poi pi tho pa Kristu ma tokcen.

16. Pirang’o ukwayu itim tego nibedo nuti kokoro i Poi pi tho pa Kristu mi oro maeni?

¹⁶ Dong’ tim tego peri ceke kara ibed unuti kokoro i Poi pi tho pa Kristu ma bitimere nindo 31, mi dwi mir 3 oro 2018. Bende kwai Yehova ukonyi itim lembe m’ukwayere i bengi kara wan ma watie dhanu pare wamedera nibedo i acel. (Som Zaburi 133:1.) Nindo moko, wabicidho i Poi pi tho pa Kristu wang’ ma tokcen. Re ma fodi nindone utundo ngo, wan ceke wadik cingwa i kum bedo i acel mwa, ma nen kubang’ oro i saa mi Poi pi tho pa Kristu, man wanen bedo i acelne ni lembe ma pire tek.