Iwi lembe maeno, nico ku dhaku pare ma gitie Jukristu gicikiri nitimo gin gigi ng’iong’ic ma biketho gidong’ ku pidocwiny ma cuu. Pieno, gicikiri niyenyo man ning’eyo cuu mandha kite ma ayi maeno mi cero nyodo tio ko, man ning’eyo cik mir ukungu mi Biblia ma romo konyogi.

Yang’ con, Yehova ung’olo ni Adamu giku Eva, man i ng’eye ni Noa ku juruot pare kumae: “Wunyol, wumedru de.” (Thangambere 1:28; 9:1) Ento Biblia uyero ngo nia Jukristu gicikiri kokoro nilubo cik maeno. Pieno, ubekwayu nico ku dhaku pare re ma ging’ii ka nyo gibitio kud ayi moko mi cero nyodo pi nijigo wend awiya kunoke pi nikalu kind nyodo. Re, lembang’o ma tung’ tung’ ma gicikiri ning’io ie cuu iwang’ nitimo ng’iong’icne?

Ng’iong’ic ceke ma Jukristu ubetimo iwi cero nyodo ucikere nijengere iwi cik mir ukungu mi Biblia. Pieno re m’ukwayu ngo gitii nyanok de ku wodhoic ni ayi mi cero nyodo. Ic ma juwodho mi tek tek nyotho mugisa ma ka nwang’u juweko udongo, jucopo nyole ni dhanu. Bende, wodhoic utie timo m’ukoc bor dit ku lembe ma Biblia uyero iwi woro kwo. (Ai 20:13; 21:22, 23; Zaburi 139:16; Yeremia 1:5) Dong’ Jukristu gicopo neno nenedi ayi mi cero nyodo ma juroyo ko piny moko i usaunyodo pa dhaku (stérilet) ke?

Gazeti Otkur ma Wiw mi Français mi nindo 1, dwi mir 9, oro 1979 (mbaya mi 30-31) ugam uweco iwi lembuno. I saa maeca, stérilet ma dhanu mapol ubed utio ko, ubino mi plastik. Gazetine ukoro nia kite ma ayi maeno mi cero nyodo betio ko i kumjo ugam ung’eyere cuu cuu ngo. Jururieko mapol uyero nia ayi maenone ubed ucero piikum pa nico ku tundo ikum tongnyodo pa dhaku. Ka piikum pa nico utundo ngo ikum tongnyodo pa dhaku ke, ic de copo podho ngo.

 Re lembe moko ugam unyutho nia piikum pa nico saa moko copo kadhu asu ikum tongnyodo pa dhaku man mugisa romo caku. E ic m’uai upodho ma nyen ne copo caku nidongo yo woko mir usaunyodo, niwacu i jang usaunyodo [trompe de Fallope]. Ento ka icne ucidho pi nidongo kakare m’anzilo i die i usaunyodo, piny ma juroyo ca copo wok cere ku kwo keca, e icne gam nyothere. Eno copo bedo ve juwodho ic awodha. Gazetine udaru kumae: “Jakristu m’ubesayu andhandha ning’eyo nia nyo etie ber nitio kud ayi maeno mi cero nyodo, ucikere ninyamu i lembang’eya maeni cuu nimakere ku cik mir ukungu mi Biblia m’uweco iwi woro kwo, pilembe kwo tie leng’.”​—Zaburi 36:9.

Ento niai ing’ei ma juwodho Gazeti maeno i oro 1979, rieko mi ng’om umedere lee mandha i lembe m’uneno yath ku lembe mange de.

Ento niai ing’ei ma juwodho Gazeti maeno i oro 1979, rieko mi ng’om umedere lee mandha i lembe m’uneno yath ku lembe mange de.

Kawoni, kite ario mange mi piny maeno ma juroyo i usaunyodo udaru wok. Acel utie mi mola man jucaku tio kude lee akeca i États-Unis i oro 1988. Ma kucelo ke tie mi hormone man jucaku tio kude i oro 2001. Wakenen nia gitio nenedi i kum mon.

Mi mola: Calu ma walar wanyutho, stérilet cero piikum pa nico ku kadhu kud i usaunyodo pi nitundo ikum tongnyodo pa dhaku. M’umedo maeno, kan etie ma juyiko ku mola, mola mi kume ne bedo ni adra ni piikum pa nico, pieno eromo nege cen. * (Som korolembe m’i there.) Bende, eloko ayi mi die i usaunyodo.

Mi hormone: Kit stérilet ma kucelo utie kud ayi hormone ma rom ku ma nwang’ere i yath ma julwong’o pilil, ma mon copo mwonyo pi nicerogi ku nyodo. Etio i ayi ma rom ku ma con mi plastik ma walar wakoro pire, re bende eketho hormone i usaunyodo. Ikum mon moko, hormone ne cero tongnyodo migi nikek. Kan ekek ungo ke, ic de romo podho ngo. Bende, kit Stérilet maeni jwigo thithiri pa die i usaunyodo. * (Som korolembe m’i there.) M’umedo maeno, eketho bende piny ma nyafoth foth ma nwang’ere i dhu usaunyodo doko nwang’, pieno ecero piikum pa nico nimondo i usaunyodo.

Calu ma walar wakoro, ubenen nia kit stérilet ario maeno zoo giloko ayi mi die i usaunyodo. Eno ubenyutho nia ka tongnyodo pa dhaku uwok ucidh urombo ku piikum pa nico man gidoko ni ic, icne romo mondo i usaunyodo, re egalu ngo i ie, pilembe die i usaunyodone copo jole ngo maber. Eno romo ketho icne nyothere ma nwang’u fodi ecaku acaka. Re, jururieko giwacu nia lembuno timere wang’ acel acel mandha, man saa moko eromo timere ikum ju m’ubemwonyo pilil de.

Pieno, ung’eyere ngo cuu cuu nia stérilet mi mola kunoke mi hormone romo cero magwei tongnyodo pa dhaku nidoko ni ic kinde ma girombo ku piikum pa nico. Re, sayusac ma jururieko utimo ubenyutho nia stérilet ario maeno gitio andha i ayi ma jukoro malu eno, niwacu gicero tongnyodo pa dhaku nirombo ku piikum pa nico man nidoko ni ic, pieno wang’ acel acel mandha ka mon m’ubetio kugi romo nwang’u ic.

Nico ku dhaku ma gitie Jukristu man ma gibemito nitio ku stérilet pi nicero nyodo, gicopo weco ku dokter migi iwi lembene. Dokter ne re ma romo yero igi nia kit stérilet makani dhe m’utie i kaka ma gibekwo i ie, man ebinyutho bende igi bero kud ariti m’eromo kelo ikum dhaku. Gicikiri ngo niparu kunoke niweko ng’atu mange, kadok dokter de, nia uyer igi gin m’ukwayu gitim. (Jurumi 14:12; Jugalatia 6:4, 5) Eno tie ng’iongic ma nico ku dhaku pare gicikiri nitimo gin ario kendgi. Gicikiri nibedo ku lembakeca mi nyayu mutoro i Mungu man mi bedo ku pidocwiny ma cuu.​—Nen 1 Timoteo 1:18, 19; 2 Timoteo 1:3.