1, 2. Pirang’o junyodo moko gicopo bedo ku lworo kan awiya migi ubemito nithiero kwo migi ni Yehova man nilimo batizo?

 DHANU dupa ma waponjo kugi Biblia gibetimo ng’iong’ic ma cuu akeca i kwo migi, niwacu gibethiero kwo migi ni Yehova man gibelimo batizo. Dupa m’ikindgi gitie aradu ma jutungogi i lemandha. (Zaburi 1:1-3) Kan itie janyodo ma Jakristu, ecicopere nia ibekuro kud ava, nindo ma nyathin peri ma nyaku kunoke ma co bilimo i ie batizo.​—Nen 3 Yohana 4.

² Re saa moko nyo lworo ubenegi pilembe nyo ineno aradu moko gilimo batizo, re i ng’eye gicaku bedo ku jiji nia nyo andha etie ber igi nikwo nimakere ku cik pa Mungu. Jumoko gitundo kadok niweko cokiri. Pieno, cwinyi copo nidieng’ nia saa moko nyathin peri de bicaku timo ni Yehova, ento i ng’eye ebibayu mer pare pi lemandha. Nyathin ne copo doko ve Jukristu moko ma yang’ con gibino i Efeso, ma Yesu uyero pigi kumae: “Iweko mer peri ma kwong’a.” (Lembanyutha 2:4) Dong’ icopo konyo nyathin peri nenedi kara mer pare umedere nibedo tek man kara  ‘edong pi both’? (1 Petro 2:2) Wacopo nwang’u ponji dupa niai kud i lapor pa Timoteo.

3. (a) Timoteo udoko Jakristu nenedi, man etimo ang’o ku lembe m’eponjo? (b) Paulo uyero nia Timoteo ukadhu kud i lembe adek makani m’uneno ponji?

³ Jakwenda Paulo ucidho i Lustra wang’ ma kwong’a i oro mi 47. Ecicopere nia Timoteo uwinjo pi ponji pa Yesu i saa maeno, ma nwang’u fodi etie aradu ma nok. Etio ku lembe m’eponjone, pieno kinde ma oro ukadhu ario, ecaku wotho karacelo ku jakwenda Paulo. Oro ma romo 16 i ng’eye, Paulo udok ukiewo ni Timoteo kumae: “Dong’ ibed ku lembe m’igamu ng’eyo con, ku maeni ma cwinyi kwio i kume (niwacu, ma juketho iyio), m’ing’eyo ko ju m’iponjo ng’eyo lembe i bang’gi; ya ugambre ma fodi i mukere ing’eyo lembagora ma leng’ [Lembagora mi Juebrania] ma copo dwoki riek [pi] both ma juboth ko ku yioyic ma ni kum Kristu Yesu.” (2 Timoteo 3:14, 15) I verse maeni, wabeneno nia Paulo uyero ya Timoteo (1) ung’eyo Lembagora ma leng’, (2) juketho eyio lembe m’eponjo, man (3) edoko riek pi both nikum yioyic i Kristu Yesu.

4. Ibed itio ku jamtic makani pi niponjo awiya peri? (Nen cal mir acaki.)

⁴ Calu m’itie janyodo ma Jakristu, ma jiji mbe ibemito nyathin peri ung’ei lembagora ma leng’, ma tin eni uketho i ie Lembagora mi Juebrania ku Lembagora mi Jugiriki mi Jukristu. Icopo ponjo kadok awiya ma thindho magwei de ning’eyo dhanu ma Biblia uweco i wigi, man lembe mange ma Biblia ukoro. Dilo pa Yehova uwodho jamtic dupa, calu ve buku, nyithibuku, man video ma tung’ tung’ ma junyodo gicopo ponjo ko awiya migi. Ikind jamtic maeno, makani ma nwang’ere i dhok peri? Nyathin peri ucikere ning’eyo lembe mi Biblia, kara ebed ku mer ma ceng’ini akeca ku Yehova.

5. (a) ‘Niketho ng’atini uyii’ thelembene tie ang’o? (b) Ang’o m’unyutho nia Timoteo utundo niyio lembanyong’a iwi Yesu?

⁵ Icopo ponjo awiya peri ning’eyo dhanu ma Biblia uweco i wigi, man lembe mange ma Biblia ukoro, re eno kende uromo ngo. Poi nia ‘juketho [bende Timoteo] uyio.’ Wec mi dhu Jugiriki ma Paulo utio ko i verse maeno, thelembene tie nikonyo ng’atini “ubed m’umbe jiji iwi lembe moko” kunoke nikonye “eyii lembe moko nia utie andha kumeca.” Timoteo ung’eyo Lembagora mi Juebrania ‘ugambre ma fodi e mukere,’ niwacu, niai ma fodi etie nyathin ma nok. Nok nok, jukonye etundo ninyang’ nia andhandha, Yesu utie Masiya. Yioyic pa Timoteo ubino tek mandha, uketho elimo batizo man edoko misioner calu Paulo, man gicaku wotho kude.

6. Icopo konyo awiya peri nenedi kara gibed ku yioyic ma tek i Lembe pa Mungu?

⁶ Icopo konyo awiya peri nenedi kara gibed ku yioyic ma tek calu Timoteo, man kara gitund ‘niyio’? Mi kwong’o, bed ng’atu ma ciro lembe. Kara ng’atini ubed ku yioyic ma tek, eting’o nindo ma lee. Man etie ngo nia pilembe in iyio lembe moko ci, nia dong’ awiya peri de biyio lembene. Kara nyathinman utund niyio ponji mi Biblia, ecikere nitio ku copo pare en gire pi ‘ning’io gin ma ber ku gin ma rac’ (Som Juebrania 5:14.) Calu m’itie janyodo, in re m’icikiri nitimo kero lee pi nikonyo awiya peri kara gibed ku yioyic ma tek, asagane tek gibepenjo penji. Wakenen ponji ma wacopo nwang’u niai kud ibang’ wego moko.

7, 8. (a) Wego moko ma Jakristu unyutho cirolembe nenedi kinde m’ebeponjo nyaku pare? (b) I saa makani m’ukwayu ibed ku cirolembe pi niponjo nyathin peri?

 ⁷ Wego moko ma nyinge Thomas, ma nyaku pare tie ku oro 11 uwacu nia saa moko nyakune bepenje kumae: “Nyo Yehova uketho piny uwotho lokere aloka gire kumeni kara kwo ubed unuti iwi ng’om?” bende, “Pirang’o wabed wamondo ngo i lemgamba calu jumange, ku lapor i lembe m’uneno kwir, pi niyiko lembe ubed ber m’usagu?” Saa moko, ebed ecerere ninyutho kende kende lembe m’ukwayu nyaku pare uyii. Thomas ung’eyo nia ka junyutho lembe acel kende ni ng’atini iwi ponji moko mi Biblia, eno copo ketho ngo etund niyio ponjine, ento ubekwayu eng’ei lembe dupa ma thindho thindho m’ucwaku ponjine nia tie lemandha.

⁸ Thomas ung’eyo bende nia kara eponj nyaku pare, ubekwayu ebed ku cirolembe. I andha, Jukristu ceke gicikiri nibedo ku cirolembe. (Jukorinto 3:12) Enyang’ nia kara ekony nyaku pare nitundo eyii ponji mi Biblia, ecopo ting’o nindo ma lee. Bende, ubekwayu gibed giwec kude wang’ mapol man gibed ginyam i lembe ma nyaku eno ubeponjo i Biblia. Thomas uyero kumae: “Waku min ot para, wabed wamito wang’ei nia nyo andha nyaku mwa ubeyio lembe m’ebeponjo i Biblia, man nia nyo ebenyang’ cuu, asagane kan ebeponjo lembe ma pigi tek akeca. Anyong’a negowa kan ebepenjo penji. Re cwinywa dieng’ kan ebeyio lembe moko m’umbe nipenjo penji.”

9. Icopo konyo nyathin peri nenedi kara eyii Lembe pa Mungu?

⁹ Ka junyodo gibenyutho cirolembe kinde ma gibeponjo awiya migi, eno biketho awiyane gibicaku nyang’ i ‘karamb lac ku kabor man kadongo ku kathuth’ mi yioyic. (Juefeso 3:18) Jucopo ponjogi nimakere ku oro migi man kite ma ginyang’ ko i lembe. Saa ma yioyic migi ubemedere nidoko tek, gibicaku koro pi lembe ma gibeponjone ni jumange m’umbe lworo, kadok ni awiya wagi mi somo bende. (1 Petro 3:15) Ku lapor, nyo nyathin peri copo koro ku Biblia, nia ka dhanu tho edoko nenedi? Nyo eyio nia lembe ma Biblia uyero tie lemandha? * (Som korolembe m’i there.) Poi nia, pire tie tek iri nibedo ku cirolembe kara itund nikonyo nyathin peri ubed ku yioyic ma tek i Lembe pa Mungu.​—Poi mi Cik 6:6, 7.

10. Lembang’o ma pire tek m’icikiri nitimo kara itund niponjo nyathin peri maber?

¹⁰ Bende, kara itund nikonyo nyathin peri ubed ku yioyic ma tek, in giri icikiri nibedo ire ni lapor maber. Mego moko ma nyinge Stephanie, ma tie kud anyira adek uwacu kumae: “Niai ma fodi awiya para githindho, abed apenjara dit kumae: ‘Nyo abed anyutho ni awiya para, thelembe m’uketho an ayio andhandha nia Yehova unuti, nia emaruwa man nia yo pare ceke utie atira? Nyo awiya para gibed gineno nia andha, an amaru Yehova?’ Acopo yenyo ngo nia awiya para giyii lembe moko ma fodi an gira de ayio ngo.”

11, 12. Rieko utie ang’o, man ang’o m’ubenyutho nia oro pa ng’atini nyutho ngo nia etie ku rieko?

¹¹ Waai niponjo nia Timoteo ubino, (1) ku ng’eyong’ec mi Lembagora man (2) ebino ku yioyic ma tek iwi lembe m’eponjo. Re jakwenda Paulo uyero bende nia lembagora ma leng’ copo dwoko Timoteo  ‘riek pi both.’ Thelembe mi wec maeno tie ang’o?

¹² Buku Étude perspicace des Écritures mir arionde, ukoro nia rieko uketho i ie “copo mi tio maber ku ng’eyong’ec man luro i lembe, pi niyiko lembe m’unyothere, niuc ikum ariti, nitundo ikum lembakeca moko, kunoke nikonyo jumange de gitim kumeno. Etie tung’ ku kasegu.” Biblia uyero nia “lemkasegu bedo atwia i adunde nyathin.” (Lembrieko 22:15) Calu ma rieko utie tung’ ku kasegu, eno nyutho nia rieko utie ayi ma jung’eyo ko nia ng’atini uteng’ini. Ka ng’atini ubedongo, eca nyutho ngo nia ebeteng’ini bende i thenge mi tipo; ng’atini teng’ini i thenge mi tipo, kan ebelworo Yehova man ebewore i lembe ceke.​—Som Zaburi 111:10.

13. Awiya gicopo nyutho nenedi nia gitie riek pi both?

¹³ Awiya ma giteng’ini maber i thenge mi tipo giweko ngo ava migi, kunoke atela tela mi jumange ‘uthorgi ku ku ku man uting’gi.’ (Juefeso 4:14) Ento “ng’eyong’ec migi bedo ayika mi ng’io gin ma ber ku gin ma rac.” (Juebrania 5:14) Eno ketho gitimo ng’iong’ic ma cuu, kadok i saa ma junyodo migi kunoke dhanu mange ma wang’gi teng’ini ubenenogi ngo. (Jufilipi 2:12) Kit rieko ma kumeno re ma pire tek pi ninwang’u both. (Som Lembrieko 24:14.) Dong’ icopo konyo awiya peri nenedi kara ginwang’ kit rieko maeno? Ukwayu iketh ging’ei nia lembe ma pire tek i kwo peri utie ang’o. Wec peri ku timo peri biketho gibing’eyo nia andha ibekwo nimakere ku cik mi Biblia.​—Jurumi 2:21-23.

14, 15. (a) Nyathin m’ubemito elim batizo ucikere ninyang’ cuu mandha iwi lembe makani? (b) Icopo konyo nyathin peri nenedi kara epar kilili iwi mugisa m’ebinwang’u tek ebeworo cik pa Mungu?

¹⁴ Kara ikony awiya peri gitund nibedo ku yioyic ma tek, ubekwayu inyuth igi gin maber ku gin marac, re eno kende uromo ngo. Icikiri bende nikonyogi ginyam i penji ma calu ve: ‘Pirang’o Biblia ukwero lembe moko ma nen ve gitie cuu? Pirang’o acopo yio m’umbe jiji nia cik mi Biblia tie saa ceke ku bero ira?’​—Isaya 48:17, 18.

 ¹⁵ Ka nyathin peri ubemito elim batizo, konye bende enyang’ cuu mandha iwi kit kwo ma ng’atini ucikere nibedo ko ing’ei limo batizo. Paru pare tie ang’o iwi kit kwone? Ebinwang’u bero makani? Ebimulere ku peko makani? Pirang’o bero m’ebinwang’u tie lee nisagu peko? (Marko 10:29, 30) Pire tie tek lee mandha nilar ketho nyathin unyang’ cuu iwi lembe maeno iwang’ limo batizo. Konye epar kilili iwi mugisa m’ebinwang’u tek eworo cik pa Mungu, man peko m’ebinwang’u tek ekadhu kud iwi cikne. Eno copo cwale niyio nia kan ebekwo nimakere ku cik mi Biblia, ebinwang’u bero saa ceke i kwo pare.​—Poi mi Cik 30:19, 20.

16. Janyodo copo timo ang’o ka nyathin pare m’ulimo batizo ucaku bedo ku jiji iwi lemandha?

¹⁶ Icopo timo ang’o ka nyathin peri ucaku nibedo ku jiji iwi lemandha ing’ei limo batizo? Saa moko, lembe mi ng’om copo caku telo nyathin peri ma co kunoke ma nyaku. Kunoke ecopo caku bedo ku jiji, nia nyo andha pire tie tek nitio ku cik mir ukungu mi Biblia i kwo pare. (Zaburi 73:1-3, 12, 13) Ayi m’ibiweco ko kude re ma biketho ebimedere nitimo ni Yehova kunoke ngo. Kud wuteluru ku nyathin peri iwi lembe maeno, kadok nwang’u etie nyathin ma nok kunoke nyo dong’ ebethik de. Ento nyuth ire nia imare, man nia ibemito ikonye.

17, 18. Janyodo copo konyo nyathin pare ma jiji umondo i ie iwi lemandha nenedi?

¹⁷ Nyathin m’ulimo batizo uthiero kwo pare ni Yehova. Eng’olo nia ebimare man ebikethe i kabedo ma kwong’a i kwo pare zoo. (Som Marko 12:30.) Yehova neno thieriri ni gin ma pire tek lee akeca, pieno wan de wacikara nineno thieririne ni gin mi tuko ngo. (Eklizia 5:4, 5) Keth nyathin peri de ung’ei lembuno. Re iwang’ nikonye, kelar isom man iponj lembe nikadhu kud i girasoma ma dilo pa Yehova uwodho. I ng’eye, wec kude i ayi ma yoo man i saa m’ukwayere; nyuth ire nia yub m’emaku pi nithiero kwo pare ni Yehova man nilimo batizo ubino yub ma lee dit, ma re bimio ire mugisa dupa.

¹⁸ Ku lapor icopo nwang’u juk mabeco i thum mi buku Les jeunes s’interrogent. Réponses pratiques, buku mi 1, i thenge ma jumedo ma thiwie tie “Les parents s’interrogent.” I thenge maeno, jumio juk ni junyodo nia ukwayu ngo gipar pio pio nia nyathin migi udaru kwero lemandha, ento gicikiri nisayu the tho ne. Saa moko nyo juwadi ubecwale nitimo lembe mareco, kunoke ekoso jurimo. Kunoke nyo ebeparu nia aradu wadi gibemediri i tic pa Yehova nisagu en. Thenge ma jumedone ukoro bende nia jiji maeno ubenyutho ngo nia dong’ nyathin udaru jai ikum yioyic peri. Wang’ mapol jiji eno beai kud i peko mange ma nyathin ubekadhu kud i ie. Thengene udok unyutho lembe ma janyodo copo timo pi nikonyo nyathin pare ma jiji umondo i ie iwi lemandha.

19. Junyodo gicopo konyo awiya migi nenedi kara gidok ‘riek pi both’?

¹⁹ Kan itie janyodo, ng’ei nia itie ku tic man rwom ma pire tek, mi tungo nyathin peri “i ponji man juk pa [Yehova].” (Juefeso 6:4) Calu ma waai waponjo, eno ubenyutho nia icikiri niponjo awiya peri ku lembe ma Biblia ubeyero man nikonyogi kara giyii lembe ma gibeponjone. Kinde ma yioyic migi bidoko tek, gibitundo nithiero kwo migi ni Yehova man gibitimo ire ku tego migi ceke. Dong’ wek Lembe pa Yehova, tipo pare maleng’ man kero m’ibetimo ukony nyathin peri kara edok ‘riek pi both.’