DHANU ceke bemito gibed ku mutoro. Re wabekwo i nindo mi kajikceng’, man ng’atuman ubekadhu kud i peko “ma ciro tek.” (2 Tim. 3:1, NWT) Jumoko mutoro thum i igi pilembe jubesendogi mananu, giberemo, tic uwekogi, kunoke nyo ng’atu moko ma gimaru lee utho. Jumange ke gikoso mutoro pilembe lemoko uwok i kwo migi m’unyayu adieng’a kunoke can i igi. Kadok jurutic pa Yehova de cwinygi copo tur, man nok nok gicopo bayu anyong’a migi. Ka kit lembe maeno uwok iri, iromo timo ang’o kara inwang’ mutoro kendo?

Pi ninwang’u dwokowang’ penji maeno, ubekwayu mi kwong’o wakeng’ei nia mutoro mandha tie ang’o, man jumoko gitimo ang’o kara gimediri nibedo ku mutoro kadok i saa mi peko. I ng’eye, wabineno nia wacopo timo ang’o kara wamedara nibedo ku mutoro man niketho esagere asaga.

Mutoro mandha ukoc ku mutoro ma nyamalu malu. Kepar lembe ma e: Ng’atu m’umadhu kong’o umer, copo ng’iero swa. Ento ka kong’o thum kud i wang’e, ng’ierone de thum, man enwang’u nia peko pare utie kakare. Eno nyutho nia ebino ku mutoro ma kadhu akadha, ento mandha ngo.​—Rie. 14:13.

Tung’ ku maeno, mutoro mandha ai kud i adunde, man enen ka wanwang’u piny moko kunoke wageno lembe moko ma ber. Ng’atu ma jamutoro mandha bedo kud anyong’a, nik ebed i saa mi peko kunoke ngo de. (1 Tes. 1:6) I andha lembe moko copo nyayu can i iwa, re asu waromo bedo ku mutoro. Ku lapor, jufwodo jukwenda pilembe gibino rweyo pi Yesu. Ento “giai kud i dilo, ma anyong’a negogi kum jukwanu ya giromo sendri ma jujwigo kogi kum nying’ maeni.” (Tic. 5:41) Anyong’a negogi ngo pilembe ya jufwodogi, ento pilembe gigwoko bedopwe migi ni Mungu.

Mutoro tie ngo gin ma junyolo ko ng’atini anyola, kunoke ma bino gire kumeni. Pirang’o? Pilembe mutoro utie acel m’i kind thenge mi nying’ tipo maleng’ pa Mungu. Tipo maleng’ copo konyowa nironyo “ng’atu ma nyen,” m’uketho i ie bende mutoro. (Ef. 4:24; Gal. 5:22) Bende tek watie ku mutoro, ebibedo yot iwa ninyego ku peko mwa.

Yeny pa Yehova ubino nia lembe ma beco re m’utimere iwi ng’om, ento ungo lembe ma reco ma wabeneno tin e. Re kadok dhanu gibetimo lembe ma reco de, mutoro thum ungo kud i Yehova. Biblia uyero nia, “tego man mutoro gini i kakare.” (1 Kei. 16:27) M’umedo maeno, lembe ma beco ma jurutic pare ubetimo nyayu mutoro lee i ie.​—Rie. 27:11.

Wanyutho nia wabeii nilubo lapor pa Yehova, nwang’u wan de mutoro ubethum ungo i iwa kinde ma lembe utimere ngo i ayi ma nwang’u waparu. Kakare nibedo ku koo koo  akeca, ukwayu waketh wiwa iwi bero ma wabenwang’u kawoni, man wakur kud ava, lembe ma beco mi nindo m’ubino. *​—Som korolembe m’i there.

I Biblia, junwang’u lapor mi dhanu dupa ma gibedo asu ku mutoro kadok nwang’u gibino ku peko dupa de. Ku lapor, Abraham umedere asu nibedo ku mutoro, kadok kinde ma kwo pare ubino i ariti, man kinde ma dhanu mange gibesende. (Tha. 12:10-20; 14:8-16; 16:4, 5; 20:1-18; 21:8, 9) Ang’o m’ukonye? Eketho wie zoo iwi genogen pare mi kwo mi nindo m’ubino i ng’om ma nyen, i the Ker pa Masiya. (Tha. 22:15-18; Ebr. 11:10) Yesu uyero kumae: ‘Wegwu ma Abraham anyong’a nege kum [genogen ma nia] ebineno ceng’ para.’ (Yoh. 8:56) Wacopo lubo lapor pa Abraham, nwang’u wan de wabeparu iwi anyong’a ma wabinwang’u i nindo m’ubino.​—Rum. 8:21.

Paulo giku Sila de gimediri asu nibedo ku yioyic ma tek man gibayu ngo mutoro migi kadok gikadhu kud i peko dupa. Ku lapor, i ng’ei ma jufwodogi ku rac man jubologi i kol, ‘girwo giwero wer de ni Mungu.’ (Tic. 16:23-25) Gitundo niciro, pilembe giweko ngo niparu iwi lembang’ola pa Mungu mi nindo m’ubino. Bende, ging’eyo nia gibesendiri pilembe gitie julub pa Kristu, eno re m’umio igi mutoro. Wacopo lubo lapor pa Paulo giku Sila nwang’u wan de wabeparu iwi bero ma wanwang’u tek wabetimo ni Mungu ku bedopwe.​—Flp. 1:12-14.

Tin bende, watie ku lapor dupa mir umego ku nyimego ma gimediri nibedo ku mutoro kadok i saa mi peko. Ku lapor, i dwi mir 11, oro 2013, wavuvu ma tek mandha ma julwong’o Haiyan, unyotho udi mi Jumulembe pa Yehova ma wendgi kadhu 1 000 i ng’om mi Philippines. Umego George, ma ot pare unyothere zoo i adhura mi Tacloban uwacu kumae: “Kadok piny mir umego unyothere zoo de, re gitie ku mutoro. Etie tek nikoro mutoro ma watie ko.” Ka wabeparu iwi lembe ma Yehova utimo iwa, man wabedwoko ire foyofoc, wabimedara nibedo ku mutoro kadok i saa mi peko ma yawe mbe de. Dong’ lembang’o mange ma Yehova timo iwa ma ketho wabedo ku mutoro?

Thelembe ma dit ma ketho wabedo ku mutoro utie mer mwa ma ceng’ini ku Yehova. Wang’eyo nia etie Ubimo mi polo ku ng’om zoo. En re m’etie Wegwa, Mungu mwa, man Jarimbwa!​—Zab. 71:17, 18.

Bende, watie kud anyong’a pilembe Yehova umio iwa kwo, man copo mi foyo ku kwone. (Ekl. 3:12, 13) Calu ma en re m’epeyowa i bang’e, wacopo ning’eyo yeny pare piwa man ning’eyo ayi m’ukwayu wakwo ko. (Kol. 1:9, 10) Re dhanu ma dupa ging’eyo ngo nia thelembe mi kwo tie ang’o. Paulo unyutho tung’ tung’ maeno kumae: “Gin ma wang’ fokuneno ngo, ku ma ith de fokuwinjo ngo, ma fokumondo de i adunde dhanu ngo, gin ceke ma Mungu yiko ni ju m’umare. Ento Mungu nyuthogi iwa ku Tipo.” (1 Kor. 2:9, 10) Andha, ninyang’ i yeny pa Yehova man i lembakeca pare ketho wabedo ku mutoro.

Yehova utimo iwa lembe mange ma lee. Eketho tin eni dubo mwa copo wekere. (1 Yoh. 2:12) Emio iwa genogen mi kwo ma rondo ku rondo ma wabinwang’u iwi ng’om ma nyen kago eni. (Rum. 12:12) Kadok kawoni de, Yehova ubemio iwa jurimo dupa ma beco ma wacopo dikara kugi pi niwore. (Zab. 133:1) Bende ebegwokowa kud i kum Sitani ku pajogi. (Zab. 91:11) Ka wabeparu saa ceke iwi lembe ma beco ma Yehova ubetimo iwa, mutoro binegowa dong’ magwei.​—Flp. 4:4.

Nyo mutoro ma dong’ Jakristu utie ko copo sagere asaga de? Yesu uyero kumae: “Giki maeni ayero iwu, kara anyong’a para bed i iwu, kara anyong’a mu de pong’.” (Yoh. 15:11) Eno ubenyutho nia mutoro mwa copo medere ameda. Wacopo poro mutoro mwa ku mac. Ka wabemito mac ugagini, wacikara nimedo yen i wang’e. Kepoi i kum lembe ma e: Tipo maleng’ konyowa nibedo ku mutoro. Pieno, tek wabemito wabed ku mutoro lee, ukwayu wamedara nikwayu tipo pa Mungu nikadhu kud i rwo. Ukwayu bende wamedara ninyamu i lembe mi Biblia, pilembe tipo maleng’ re m’uyuyo i wie.​—Zab. 1:1, 2; Lk. 11:13.

Gin mange ma bikonyowa nibedo ku mutoro lee, utie nitimo saa ceke lembe ma nyayu anyong’a i Yehova. (Zab. 35:27; 112:1) Pirang’o? Biblia uyero nia jucwiowa kara ‘walwor Mungu, man walwor lembang’ola pare; kum maeni en e gin m’umaku piny cuu ni dhanu.’ (Ekl. 12:13) Mungu ucwiowa kara watim yeny pare. Pieno ka wabetimo ni Yehova, wabinwang’u mutoro lee mandha i kwo mwa. *​—Som korolembe m’i there.

Ka wabemedo mutoro mwa, wabinwang’u bero mange dupa. Ku lapor, anyong’a binego Yehova lee i kumwa ka wabemedara nitimo ire ku mutoro, kadok i saa mi peko. (Poi. 16:15; 1 Tes. 5:16-18) Bende, ka watie ku mutoro mandha, wabiparu ngo nia nibedo ku giki mi kum dupa re ma tie gin ma pire tek i kwo. Ento wabitimo kero nimiara lee i tic mi Ker pa Mungu. (Mat. 13:44) Pieno ka wabeneno bero mi miiri mwa i tic pa Yehova, mutoro bilund negowa nisagu; bende wabiwinjara ma ber mandha, man lembene binyayu mutoro i jumange de.​—Tic. 20:35; Flp. 1:3-5.

M’umedo maeno, ka watie ku mutoro lee, kumwa de bibedo ma leng’. Biblia uyero kumae: “Adunde mi mutoro en e yath ma ber.” (Rie. 17:22) Jararieko moko ma timo sayusac iwi lembe m’uneno leng’kum i somo ma malu mi Nebraska i États-Unis, uyero wec m’urombo ku lembe mi Biblia, ewacu kumae: “Kan itie ku mutoro i kwo peri tin eni, kumi copo bedo ma leng’ i nindo m’ubino.”

Pieno, kadok wabekwo i nindo ma rac ma lembe tie tek i ie de, tipo maleng’ copo ketho wabedo ku mutoro mandha tek waberwo, wabeponjo lembe pa Mungu man wabenyamu ie. Bende, wabinwang’u mutoro lee ka wabeketho wiwa i kum lembe ma beco ma Yehova ubetimo iwa tin eni, ka wabelubo lapor mi yioyic mi jumange man ka wabemiara nitimo yeny pa Mungu. Kumeno re ma wabibilo lembe ma nwang’ere i Zaburi 64:10, m’uyero kumae: “Anyong’a binego ng’atu ma pwe ni kum Yehova, man ebipondo i bang’e.”