Penji mi Jusom
Penji mi Jusom
Nimakere ku cik ma Biblia umiyo iwi rimo, nen mi Jumulembe pa Yehova utie ang’o iwi kit thieth ma jutiyo i iye ku rimo pa jaratwoyo en gire?
Jakristuman ucikere ngo nijengere kende kende iwi paru pare en gire kunoke iwi lembe ma dokta pare ubekwayu i bang’e. Ento ukwayu enyang’ bende cuu i lembe ma Biblia ubeyero, kum eno tie lembe m’i kindgi ku Yehova.
Yehova ma tie ng’atu m’umiyo iwa kwo, ukwero nia kud jucam rimo. (Thangambere 9:3, 4) I cik ma Mungu miyo yang’ con ni nyithindho mir Israel, ekwayu ya jutii ku rimo i yore moko kende pilembe rimo en e kwo. Mungu ng’olo kumae: “Kum kwo mi ring’kum ni i rimo; man amie iwu wi pemblam kara utim adunya pi ng’eyong’ec mu.” Dong’ ka Jaisrael moko unego lei pir acama ke ecikere nitimo ang’o? Mungu uyero kumae: “Ebicwiro rimone woko, man ebiume kud utur.” * (Lembe mi Julawi 17:11, 13) Yehova udwogo iwi cik maeni kendo kendo. (Poi mi Cik 12:16, 24; 15:23) Buku moko (Soncino Chumash) m’ukoro lembe iwi Juyahudi uyero kumae: “Jucikiri ngo nijolo rimo, ento jucikiri nioye cen i ng’om pi ninyutho nia eromo ngo pir acama.” Jaisraelman ucikere ngo nijolo, nigwoko man nitiyo ku rim giracwiya moko ci kum Mungu re m’utie won kwo mi giracwiya ceke.
Niai ma Masiya tho, watie ngo dong’ i the Cik pa Musa. Re asu fodi Mungu neno rimo ni piny ma leng’. Tipo ma leng’ pa Mungu utelo wi jukwenda pi ninyutho ni Jukristu nia ‘gikoyiri cen kud i kum rimo.’ Jucikiri ngo nineno cik maeno ku tuko. Cikne pire bedo tek romo rom ku nikoyiri cen kud i kum lembsasa mi tarwang’ kunoke rwo ni ayi gin m’acwiya. (Tic mi Jukwenda 15:28, 29; 21:25) Timo mi miyo rimo man mi dwoko rimo i kumjo unyai lee niai i oro 1900. Ento Jumulembe pa Yehova ginyang’ nia timo maeno ukoc ku lembe ma Biblia uyero. *
Saa moko nyo dokta copo kwayu nia jular juwodh rimb jaratwoyo moko i wang’ ma jukake kara kinde m’ubekwayere nia jumed rimo i kum jaratwoyone i saa mi pala, jucopo dwoko rimbe gire. Ento timo maeno mi jolo man mi gwoko rimo pi nidodwoke i kumjo i ng’eye ukoc ku lembe ma Biblia yero i Lembe mi Julawi man i Poi mi Cik. Jucikiri ngo nigwoko rimo; ukwayu juoye cen—kara edok i bang’ Mungu, calu ekoebedo. I andha, tin dong’ Cik pa Musa umbe ku tego. Kadok kumeno de, Jumulembe pa Yehova giworo Cik mir ukungu pa Mungu ma nwang’ere i Cik pa Musane. E uketho gikeco migi ‘niceriri cen kud i kum rimo.’ Pieno, wamiyo ngo rimbwa ni jumange, kadok agwoka de wagwoko ngo rimbwa m’umaka ‘ucwir cen’, kum timo maeno ukoc bor dit ku cik pa Mungu.
Re i andha, utie ngo nia yore moko ci ma jutiyo ko ku rim jaratwoyo ukoc ku cik mir ukungu pa Mungu. Eno re m’uketho Jukristu ma pol giyiyo nia juwodh rimbgi moko pi pima, calu ma i ng’eye jubioyo rimo ma juwodhone cen. Saa mange dokta copo kwayu nia jutii ku rimb jaratwoyo i yore moko ma segi.
Ku lapor, i saa mir ayi kaku dhanu moko ma julwong’o hémodilution, jular juwodho rimo kud i kum jaratwoyo man judwoko rimo m’ujebere ku pii kakare. I ng’eye nyanok, judwoko rimbene ve i kume, kara rimbe dok kakare. Ayi thiethne mange julwong’o récupération du sang épanché. I kit thieth maeni, jujolo rimo m’ubecwir kud i kum jaratwoyo kinde ma jubekake, julwoke man i ng’eye judwoke kubang’e i kume kinde ma jubekake kunoke i ng’eye nyanok. Kit thieth mange de nuti. Calu ve kit thieth ma juketho ko rim jaratwoyo kadhu ko wang’ acel i macin moko ma timo ve watkum dhanu ma calu ve adunde, umbo kunoke rong’ini. Judwoko rimo m’uai kud i macinne i kum jaratwoyone. Ku kite mange, juciko rimb jaratwoyo mondo i macin moko ma julwong’o centrifugeuse pi niwodho ukudi cen kud i rimone kunoke pi niwodho theng rimone moko ma jucopo ciko i wathkum moko mange. Nimakere ku kit pima moko, juwodho kadhiri rimo moko kud i kum jaratwoyo man jujebe ku yath m’ukwayere, e i ng’eye judwoke i kum jaratwoyone.
Doktaman copo tiyo ku kit thieth maenonegi i ayi m’ukoc. Kadok kit thieth, kadi kit pima moko ma nyen de copo wok. Wape ku twero mi ng’iyo i kit thieth ceke man mi maku yub kaka ng’atini. Pieno, i wang’ niyiyo ayi moko mi kaku dhanu, pimo rimo kunoke kit thieth m’unyai kawoni, Jakristuman ucikere ning’eyo nia jubitiyo ku rimbe nenedi. I wang’ niyio kak, ecikere ninyang’ i bang’ dokta pare pi kite ma doktane upangu nitiyo ko ku rimbe. E i ng’eye, ukwayu emak yub nimakere ku lembe ma pidocwinye ubeyero. (Nen sanduku.)
Jukristu gicikiri nipoi saa ceke pi thieriri ma githieriri ko ni Mungu man pi lembang’ola ma giketho mi ‘mare kud adundegi ceke, ku ng’eyong’ec migi ceke, ku tego migi ceke, man ku pidoic migi ceke.’ (Luka 10:27) Jumulembe pa Yehova gikoc ku dhanu mange; gineno winjiri migi ku Yehova ni gin ma pire tek lee. Jamii kwo ukwayu nia dhanu ceke giketh genogen migi i rimb Yesu m’ucwir pigi. Biblia uyero kumae: “Nikadhu kud i bang’e [Yesu Kristu], wanwang’u gony ni kum jamgony nikadhu kud i rimbe, eyo, Mungu uweko kier mwa.”—Juefeso 1:7.
[Korolembe mi there]
^ par. 4 Profeser Frank H. Gorman ukiewo kumae: “Jutuc ninyany nia cwiro rimo i ng’om tie kite mi nyutho woro ma jutie ko i kum kwo pa lei. Enyutho bende nia jubeworo Mungu m’ucwiyo kwo ceke man m’ubemedere nigwoko kwone.”
^ par. 5 Ot Kur ma Wiw mi nindo acel mi dwi mir 7, 1951, mir Anglais, udwoko wang’ penji ma dongo dongo iwi lembe maeno. Ot Kurne nyutho nia pirang’o etie rac niciko rimo i kumjo man nimiyo rimo kara juciki i kum jumange.
[Sanduku/Cal]
ICOPO PENJIRI KU PENJI MA E
Ka jubiketho rimba uwok kud i kuma, ekadh kud i macin pi nidwogo i kuma, man kan ewok ecungo pi saa moko, nyo pidocwinya biyiyo ira ninene nia fodi etie asu rimba, ma bikwayu ngo nia juoye ‘woko i ng’omi’?
Nyo pidocwinya ma Biblia uponjo bisenda ngo, kinde ma juwodho rimba moko, juyike, judwoke kendo i kuma, i saa mi kit thieth moko?