Biblia loko kwo

ANG’O dhe m’ucwalu Rastafara moko ninyaru yukwiye m’eng’ino man nikabu adegi m’ebedo ko i kum mundu? Kenen kilili mandha lembe m’ekoro.

“Atuc kadok niweko adegi m’abino ko i kum mundu.”​—HAFENI NGHAMA

ORO: 34

NG’OM MA THUGI: ZAMBIE

I WANG’E EBEDO: RASTAFARA

LEMBE M’AKADHU KUD I IYE: Anyolara i caka (kambi) moko mir uringng’wec i ng’om mi Zambie. Lwiny ugam uriemo mama kud i ng’om mi Namibie man ewok emondo i dilo moko ma julwong’o Organisation du Peuple du Sud-Ouest Africain (SWAPO), ma tie dilo m’ubed unyego i kum bimobim ma Afrique du Sud ubimo ko wi Namibie i saa maeca.

Pi oro 15 niai ma junyola, akwo i caka ma tung’ tung’ mir uringng’wec. Jugam jutito aradu m’i caka ma tung’ tung’ ma re zoo gitie i dilo mi SWAPO pi nitelo wi dikiri maeno m’ubenyego pi bedagonya. Lembgamba ugam unyang’ truk i wiwa man juponjowa nia wacikara nidagu mundu.

Kinde m’adoko ku oro 11, anwang’u nia mito adok Jakristu mi kanisa moko m’ubedo i caka keca. I kanisa eno junwang’u dhanu m’uai kud i dini mi Katolik, Prutanti, Anglikan ku mange de. Jakwac m’aweco ko ukwera nia kud atim lembuno nyanok de. Niai eca, acaku timo ngo ni Mungu moko acel de. Kinde m’adoko ku oro ma romo 15, acaku nimaru wer mi barastane man eno uroyo i iya pidoic mi nyego i kum masendi ceke m’ucol gibekadhu kud i iye. Lembuno cwala nimondo i dilo mi barasta. Awiyo wiya ma bor, acaku madhu marijuana, aweko camu ring’o man acaku kwayu pi gony mir ucol. Re asu amedara ku timo ma rac mi tarwang’ man mi neno film mi rop. Bende, dhoga bedo tang’ asu.

KITE MA BIBLIA ULOKO KO KWO PARA: I oro 1995, niwacu kinde ma adoko ku oro 20, acaku niparu pi lembe m’ukwayu atim i kwo para. Kan anwang’u buku moko ci ma barasta bed uwodho, aponje. Bukune moko ubed udok iwi lembe mi Biblia; ento lembe ma jukoro i iyene ubed unyang’a de ngo. E akeco nisomo Biblia an gira.

I ng’eye, jarimba ma rasta moko acel umiyo ira buku mi ponjo Biblia ma Jumulembe pa Yehova re m’uwodho. Aponjo bukune karacel ku Biblia ani kenda. I ng’ey lembuno, arombo ku Jumulembe pa Yehova, e amedo niponjo Biblia kugi.

Agam aweko madhu njai kadi marijuana man meth m’areri cen kadok nwang’ ugam ukwayu atim kero ma lee de. (2 Jukorintho 7:1) Ayiko kuma ma leng’, anyaru yuk wiya m’awiya cen, aweko nineno cal mi muneru man film mi rop man aweko niweco wec ma reco ceke de cen. (Juefeso 5:3, 4) Ma tokcen ne, akabu cen adegi m’abedo ko i kum mundu. (Tic mi Jukwenda 10:34, 35) Pi nitimo alokaloka maeno zoo ugam ukwayu nia athum cen the mizik ma cwaku paru mir akoyakoya mi rangi mi dend kum man nia awek nidikara ku jurimba ma con kum anwang’u nia gicopo tela adok kendo i timo ma dong’ aweko.

I ng’ey ma atimo alokaloka maeno ceke, acaku sayu ka Ot Ker mi Jumulembe pa Yehova. Kinde ma anwang’u, akwayu nia an de giwek amond i dini migine. E jutelo wi ponji para mi Biblia. Jufwa gibedo mbe kud anyong’a nyanok de i kuma kinde ma akeco nilimo batizo pi nidoko acel m’i kind Jumulembe pa Yehova. Mama uyero ira nia cika adok alim i dini mange kakare nilimo i dini mi Jumulembe pa Yehova. Nera moko m’ubed utimo tic i od tic ma malu pa gavmenti ubed uweco i wiya saa ceke pi dik ma abedikara ko ku Jumulembe pa Yehova.

Lembe m’ugam ukonya ninyego ku jai man cac ma tung’ tung’ ceke ubedo ponji ma anwang’u nikadhu kud i lapor pa Yesu, niwacu kite m’ebed ekwo ko ku dhanu mange. Kinde ma aneno nia gin ma Jumulembe pa Yehova gibeponjo urombo ku lembe ma Biblia ubeyero, anyang’ andhandha nia adaru nwang’u dini mandha. Ku lapor, Jumulembe pa Yehova girweyo lembanyong’a ni jumange calku ma Biblia ung’olo. (Matayo 28:19, 20; Tic 15:14) Bende, gimondo ngo i lembgamba.​—Zaburi 146:3, 4; Yohana 15:17, 18.

BERO MA ANWANG’U: Calu ma aponjo nikwo ku cik ma nwang’ere i Biblia, anwang’u bero dupa. Ku lapor, kinde ma aweko marijuana, dong’ anyotho ngo dolar dak swa ku bang’ dwi. Bende, dong’ aparu ngo lembe ve abelu. M’umedo maeno, wiya tiyo ma ber man leng’kuma de uyikere.

Kawoni anwang’u gin ma abed asayu niai ma a nyathin, niwacu ning’eyo ka ma kwo para cidho i iye man thelembe mandha i kwo. M’usagu zoo, anwang’u kare mi doko ku winjiri ma ceng’ini ku Mungu.​—Yakobo 4:8.