JUYERO nia etie rwo ma jutero nikadhu rwo mange ceke mi Jukristu. Tek etie lemandha kunoke ngo de, rwo mi lapor ma Yesu nyutho​—ma saa moko julwong’o Rwo pa Rwoth konuke Wegwa ma n’i Polo—​tie rwo ma ju ma pol ginyang’ ungo i iye. Milion dupa mi dhanu tero wec mi iye ndhu malumalu kumeni kubang’ceng’, saa moko nyo wang’ dupa dupa kubang’ nindo. Ento Yesu mito ngo nia jutii ku rwo maeno kumeno. Wang’eyo lembuno nenedi?

Tap i wang’ ninyutho rwo maeno, Yesu yero kumae: “Kinde m’iberwo, kud idwog iwi lembe acel wang’ dupa.” (Matayo 6:7) Nyo Yesu weco tung’ ku lembe m’etimo m’enyutho ko wec m’ulubere ma jucikiri nimaku ku wic man ma jucikiri nibedwogo i wiye? Ungo nyanok de! Ento, Yesu ponjowa ku lembe ma maku warwo i wiye, man enyutho iwa kamaleng’ gin ma pigi tek ma wacikara nipoy pigi kinde ma waberwo. Dong’ wakewec cuu iwi lembe ma eyerone. Rwone nwang’ere i Matayo 6:9-13.

Ku wec maeno Yesu poyo wi julub pare nia rwo ceke cikiri nicidho i bang’ Won ma Yehova. Nyo ing’eyo pirang’o pi nying’ Mungu tie tek lee man pirang’o ukwayu ebed leng’?

Niai i acaki mi dhanu, nying’ Mungu ma leng’ ucidere. Jakwor pa Mungu ma Sitani uyero nia Yehova tie javupo, Jabim ma jakec m’umbe nyanok de ku twero mi bimo wi giracwiya pare. (Thangambere 3:1-6) Ju dupa giyiyo lembe ma Sitani yero, e giponjo nia Mungu tie ng’atu ma ng’ic, ma cwinye rac, man m’umaru niculo kwor kunoke gikwero magwei nia En re m’etie Jacwic. Ju mange tuc kadok ninyego i kum nyinge ngi de, ku niwodho nying’ ma Yehova cen kud i lok moko mi Biblia man gikwero nitiyo ku nying’ne de.

Biblia ubenyutho nia Mungu bidaru lembe ma reco ceke. (Ezekiel 39:7) E ebipong’o yeny peri ceke man ebidaru peko peri de ceke. Ebitimo nenedi? Wec m’ulubo e mi rwo pa Yesu uculo wang’ penji maeno.

I nindo ma tin, juponji mi dini ginyambiri lee dit ku ponji iwi Ker pa Mungu. Ento, calu ju m’ubino winjo Yesu ging’eyo, jubila pa Mungu ewo oro ma dupa i wang’e nia Masiya, ma Jalar ma Mungu ng’iyo, utie ku copo mi bimo wi Ker ma copo kelo alokaloka wi ng’om. (Isaya 9:6, 7; Daniel 2:44) Ebiketho nying’ Mungu dok leng’ kinde m’ebiwodho vupo pa Sitani zoo thendhere kamaleng’ man kinde m’ebikabu Sitani cen ku tic pare zoo. Ker pa Mungu bidaru lwiny, remo, ndru​—man kadok tho de. (Zaburi 46:9; 72:12-16; Isaya 25:8; 33:24) Kinde m’iberwo nia Ker pa Mungu bin, nwang’u ibekwayu nia lembakeca maeno ceke pong’.

Wec pa Yesu eno ubenyutho nia yeny pa Mungu bitimere andhandha i ng’om calu m’ebetimere i polo ka ma Mungu ni iye. Gin moko acel de mbe m’ucero yeny pa Mungu i polo; kuca, Wod Mungu ukiedo lwiny dhu Sitani ku ju pare zoo, man ebologi piny i ng’om. (Lembanyutha 12:9-12) Kwac mir adek maeni mi rwo pa Rwoth, calu bende kwac ario m’i wang’e, ubekonyowa niketho wiwa zoo i kum piny ma pire tek​—yeny mwa giwa ngo, ento pa Mungu re. Yeny pare re ma miyo bero m’usagu zoo ni giracwiya ceke. Eno uketho kadok Yesu ma ng’atu ma leng’ de uyero ni Won kumae: “Yeny peri utimere en, para re ngo.”​—Luka 22:42.

I ng’eye, Yesu nyutho nia wacopo bende nirwo pi yeny mwa giwa de. Etie rac ungo nyanok de ka wabekwayu Mungu pi piny ma watie ku yenyne pi kwo mwa ma kubang’ ceng’. I andha, tek watimo kumeno nyutho nia Yehova re m’utie ng’atu ma “miyo kwo man yuyo ku piny ceke ni dhanu zoo.” (Tic mi Jukwenda 17:25) Biblia unyutho nia etie wego ma jamer m’anyong’a nego kinde m’ebemiyo ni nyithinde piny ma gitie ku yenyne. Calu janyodo ma ber, ebimiyo ngo ni nyithinde piny ma copo ngo nikonyogi.

Nyo watie ku yeny mi kisa? Ju dupa tin nyang’ ungo nia dubo tie ang’o man gidwoko dubo ni lembe mi tuko kumeni. Ento Biblia ubeponjo nia dubo re m’utie acaki mi peko mwa ceke, pilembe en re m’eketho dhanu gibetho. Calu wanyolara ni judubo, wan ceke wadubo wang’ ma pol, man genogen mwa mi kwo pi nindo ma dupa ujengere ndhu i wi kisa pa Mungu. (Jurumi 3:23; 5:12; 6:23) Etie lembe mi kethocwiny ni nyang’ nia Biblia ubeyero kumae: “In, E Yehova, i ber man ibedo ayika mi weko dubo.”​—Zaburi 86:5.

Nyo ibeneno de nia itie ku yeny mi gwok pa Mungu? Ju dupa gikwero niyiyo nia “ng’atu ma rac,” niwacu Sitani, unuti. Ento Yesu ponjo nia Sitani nuti andha, man etuc nilwong’e de nia “jabim mi ng’om maeni.” (Yohana 12:31; 16:11) Sitani daru wingo wi ng’om maeni zoo m’ebetelo wiye, man ebemito ewing wii in de, pi niceri nidoko ku winjiri ma ceng’ni akeca ku Wuru ma Yehova. (1 Pethro 5:8) Ento, Yehova tek nisagu Sitani bor dit man etie kud ava mi gwoko ju ceke ma gimare.

Korolembe maeni m’adundo iwi lembe ma dongodongo ma nwang’ere i rwo pa Yesu mi lapor, uweco ngo iwi lembe ceke ma nwang’u jucopo weco pigi niai kud i rwo maeni. Poi nia 1 Yohana 5:14 uyero iwa iwi Mungu kumae: “Gin moko ci ma tek wabekwayu i bang’e nimakere ku yeny pare, ewinjowa.” Dong’ kud ilwor nia tij peko peri mbe ma nia irwo pigi i bang’ Mungu.​—1 Pethro 5:7.

Dong’ kawoni, wacopo yero ang’o iwi saa man kaka mi rwo? Nyo gin de pigi tie teki?