“Anwang’u nia kwo para zoo udoko ma leng’ man atie kud anyong’a.”​—VICTORIA TONG

• ORO MI NYOLIRI PARE: 1957

• NG’OM MA THUGI: AUSTRALIE

• KPAWA PARE: THINO M’UPONG’ KU PEKO

LEMBE M’AKADHU KUD I IYE:

Adongo i Newcastle, ma nwang’ere i New South Wales. An re m’atie kayu iwi awiya fwa abiro zoo. Wegwa bedo ng’atu ma kwiny man ma madhu kong’o lee man megwa de bedo kwiny. Mama bed’unyayu ret i kuma man ebed’eweco ira rac mandha. Saa ceke ebed’eyero ira nia abino nyathin ma rac man nia abiwang’ i nam mac. Wec meno ubed anyayu ndiri i iya lee.

Ret ma mama ubedunyayu i kuma saa ma pol uketho abed akeng’o somo. Kinde m’adoko ku oro 11, Leta ugama cen kud i bang’ junyodo para. Ma kwong’a eroya i somo pare man i ng’eye adok i kuva. Kinde ma oro para udoko 14, aringo cen kud i kuva. Calu m’amito ngo nidok i pacu, acaku nikwo i dhu ngudu mi Kings Cross, ma nwang’’ere i ng’et adhura mi Sydney.

Kinde m’abekwo i adhurane acaku nitiyo ku yath ma merojo, kong’o, acaku bende nineno pornografi man adoko won tarwang’. Re lembe moko acel m’akadhu kud i iye unyayu lworo lee mandha i iya. Abed abedo i kusika acel pa won ot moko ma junambu i iye dyewor. Uthyeno moko, ju ma co ario ubin’i bang’e. E won otne ora i kusika, re awinjo wec migi ceke. Ebino weco ku ju ma coone pi nilwora igi. Gipangu nia gibikana i meli moko mi ter man gibitera i Japan pi nitimo tic i ngandha moko kuca. Cwinya dhongo, man apyey woko e aringo pi nisayu kony.

Anwang’u jalwo moko m’ucidho nilyewo Sydney, e akoro peko para zoo ire m’ageno ko nyo ebimiyo ira sente moko. Kare nimiyo ira sente, ecidho kuda ka m’ebino bedo i iye kara ajom man acam piny moko. Calu ma lembe bedowotho ma ber, amoko keca magwey. I ng’ey oro acel kende ci wagamara kude.

KITE MA BIBLIA ULOKO KO KWO PARA:

Saa m’acaku niponjo Biblia ku Jumulembe pa Yehova, awinjara i ayi ma tung’ tung’ sana. Ng’eycwiny umaka kinde m’aponjo nia Sitani re ma nyayu lem ma rac; jubed juponjo saa ceke nia Mungu re m’uketho wabesendara. Saa m’anyang’ nia Mungu miyo ngo matira ni dhanu pi nisendiri i nam mac, cwinya gam’ukwiyo pilembe abepoy nia ponji mi nam mac unyayu lworo i iya pi nindo ma lee.

Kite ma Jumulembe pa Yehova giweko ko Biblia telo wigi i yub ceke ma gimaku uwang’u iya lee. Gikwo nimakere ku yiyoyic migi. Abino ng’atu ma tito i lem pare tek, re kadok nwang’u ayer ang’o kunoke atim ang’o de, Jumulembe pa Yehova gibed gikwo kuda ku mer man ku woro.

Anyego para ma tek zoo ubedo nia abed awinjara nia tija mbe. An gira de adagara lee dit, man amedo asu niwinjara kumeno kadok nindo ma dupa i ng’ey m’alimo batizo pi nidoko Jamulembe pa Yehova de. Ang’eyo nia amaru Yehova, ento agam ang’eyo bende andhandha nia en ecopo maru ngo nyanok de ng’atu ma ve an e.

Alokaloka moko utimbere i oro mir 15 i ng’ey m’alimo batizo. I saa mi korolembe moko i Ot Ker mi Jumulembe pa Yehova, jakorlembe uweco pi Yakobo 1:23, 24. Giragora maeno uporo Lembe pa Mungu ku kieu ma wacopo nenara i iye ayi ma Yehova neno kowa. Acaku nipenjara ka nyo piny m’abino neno i iya ukoc ku piny ma Yehova ubino neno. I acaki, ajay i kum paru ma nyen maeno. Amedara niparu nia nimara ubino nikwayu lembe ma dwong’ akeca i bang’ Yehova.

Nindo moko nyanok i ng’eye, asomo giragora moko m’uloko kwo para. Ubino Isaya 1:18, ka ma Yehova uyer’i iye kumae: “Wubin kawono, wu dhanu, man wayiku lembe m’i kindwa. . . . Kakok nwang’u dubo mu kwar ngbo de, gibidoko tar calu pei.” Awinjara ve nia Yehova ubino weco i bang’a, m’ewacu ko kumae: “Bin i bang’a, Vicky, wayik lembe m’i kindwa. Ang’eyi, ang’eyo dubo peri, ang’eyo adundeni​—man ameri.”

Diyewor ma cing’ nica, nindo kadhu ngo riu de i wang’a. Anyayu piem asu nia Yehova copo mara ngo, ento acaku niparu pi lam mi jamgony ma Yesu uthiero. E ndhundhu, paru moko bin’i wiya nia Yehova ucira pi nindo ma dupa, m’enyutho ko i yore ma dupa dit nia emara. Re, ve abedo yero ire kumae: “Mer peri fod’uromo ngo ku nitund’i bang’a. Lam ma Wodi uthiero de fodi copo daru dubo para ngo.” Ubedo ve nia abino riemo jamgony udoki cen i bang’ Yehova. Ento kawoni, kinde m’anyamu i lembe iwi giramia mi jamgony, acaku winjara nia Yehova umara.

BERO M’ANWANG’U:

Awinjara nia a leng’, a kwo, man a zoo. Gamiri para de udoko kud anyong’a, man atie ku mutoro mi tiyo ku lembe m’akadhu kud’i iye pi nikonyo jumange. Dong’ abewinjara ceng’ni magwey ku Yehova.