Biblia loko kwo

Ang’o dhe m’uketho jalwo moko udwogo i ponji mi dini ma jutunge ko ma ke, ekeeweko? Jalwo moko ma kindgi bino rac ku won ucaku neno Yehova nia tie won nenedi? Dong’ kesom lembe ma gin ario zoo gibetito.

“Abino ku yeny mi dwogo i bang’ Yehova.”​—ELIE KHALIL

ORO M’ENYOLERE I IYE: 1976

NG’OM M’ENYOLERE I IYE: CHYPRE

I WANG’E: WOD M’URWINYO

KWO PARA MA CON: Anyolara i ng’om mi Chypre ento re, alund adongo i Australie. Pilembe jurunyodo para gitie Jumulembe pa Yehova, gitimo gin moko ci kara maru pa Yehova man pa Biblia ma Lembe pare, ugur ulage i iya. Kadok kumeno de, kinde ma oro para udoko apar kumeni, acaku nijay. Ku diewor, ang’iyo nibekwalara niwok kud i ot pi cidho i bang’ awobi kud anyira ma de gibethik ve an. Wadoko jukwal muthukari man wamondo ma rac i lembe mange de dupa ma reco.

I acaki, kara kud anyay can i jurunyodo para, lworo uketho abed atimo lembuno kpo i amung’. Re, nok nok, abayu lworone cen. Dhanu ma atudo kugi mer, gibino ju ma oro migi ukadhu para lee dit, ma gimaru de ngo Yehova; e gigam gibedo kud atelatela ma rac i wiya. I ng’eye, agam ayero ni jurunyodo para nia dong’ an, ambe i dini migi. Ku cirocir, gitimo tego nikonya, re tho kero migi nica zoo, gisendiri ko mananu. E cwinygi ugam utur.

I ng’eye m’asaru cen kud i pacu, acaku nitiyo ku piny ma mero ryeko pajo (drog), calu nibepidho man nilworo njay i mukero ma lee dit. Kwo mir asara ku bayu saa i nambu ma drikadri ku diewor traka traka tie gin ma akwo akwoa ndruk i iye. Adoko bende ng’atu ma ng’ecwiny opo i iye nyaswaswa mandha. Ka tekene ng’atu moko utimo kunoke uyero ira lembe moko m’ufoyo wiya ngo ci, adoko ger kude mi tuko ngo; wang’ ma pol ke, akok iwiye man acanye lwek. I zoo, gin moko ci ma juponja ko nia Jakristu timo ngo, atimogi pet.

KITE MA BIBLIA ULOKO KO KWO PARA: Umadh njayne moko acel m’adoko jaramer pare ma ceng’ini magwei, won utho nwang’u podi e nyanok mandha. Wang’ ma pol ku diewor, wabed wanindo kwe wakude ma nwang’u wabewecera. I dieworne moko, ecaku bewodho paru ma besende man nikoro pi kit can m’etie ko i cwinye pilembe edong’ nyathikic. Calu ma niai m’abedongo adonga de nang’ dong’ ang’eyo pi genogen mi cer, acaku koro ire pi Yesu, nia ecero ju m’utho man ke nia, eng’olo ebitimo kumeno kendo i nindo m’ubino. (Yohana 5:28,29) Agam ayero kumae: “Kepar nia ibeneno wuru kendo! Ng’atu moko ci m’i kindwa copo kwo rondo ku rondo iwi ng’om i Paradizo.” Paru maeno umulo adundene lee dit.

I saa mange, jarimba nica uwodho paru iwi kajik ceng’ man pi ponji mi Trinita. Atiyo ku Biblia ma pare gire man anyutho ire giragora m’utuco lemandha iwi Yehova Mungu, Yesu man pi kajik ceng’. (Yohana 14:28; 2 Timoteo 3:1-5). Calu m’abemedara niweco pi Yehova ni jarimba nica, e an gira de, acaku bedieng’ pi Yehova lee.

E yo yo, re, nok nok; kodhi mi lemandha mi Biblia m’ubino benindo i adundena, ma jurunyodo para gitimo tego kpe nipidho i iya, ubin ucaku dongo. Ku lapor, saa moko, kinde m’abino madhu njai i ungu moko waku jurimba, rek kumeni, acaku paru lembe iwi Yehova. Ku dhoggi, ju ma pol m’i kind jurimba ne gibed giyero nia gimaru Mungu; ento re, kura migi ubino benyutho kamaleng’ nia i andha, gimare ngo. Pilembe abemito ngo atimara ve gin, e agam anyang’ i gin m’ukwayu atim. Abino ku yeny mi dok i bang’ Yehova.

Eyo, etie yot ni ng’atini ning’eyo gin m’umaku etim; ento, nitime lundo, utie lembe ma tek lee nisagu. Ebino yot nitimo alokaloka moko; pieno, m’umbe peko ma hai, aweko nitiyo ku piny ma mero ryeko pajo. Bende, alalu cen mer para ma con tup, man acaku niponjo Biblia ku jadit cokiri moko.

Kadok kumeno de, alokalokane mange lundo, timogi bino tek mandha. Akeca keca ne ke, nibimo wi kwinyo para. Saa moko, abed atimo ber pi kare moko ento re, lundo can tima lee dit tek apodho i timo para ma con ma reco. Ka tekene apodho i kura para ma con ma reco, kubang’ saane ceke, awinjara nia tija mbe. Ma cwinya tur lee, acidho i bang’ jadit cokiri ma wabino niponjo wakude Biblia. Jadit cokiri nica ubino ira dhanu ma ber, jacirlembe saa ceke man jamiijuk mandha. Nindo acel, i OtKur ma Wiw moko, eketho asomo pi bero m’abinwang’u ka tek aweko ngo lembe m’acaku. * Lembe ma tung’ tung’ m’acopo timo kinde ma ka ng’eicwiny uopo i iya de wagam waweco i wiye. Ku paru mi gazethi m’eno zoo i wiya, bende ku rwo mi tuko ngo i bang’ Yehova, nok nok, atuc nibimo wi kwinyo para. E i ng’eye, agam alimo batizo m’adoko ko acel m’i kind Jumulembe pa Yehova i dwi mir 4, oro 2000. Mutoro unego jurunyodo para i kite ma koro tek.

BERO M’AGAM ANWANG’U: Kawoni dong’ atie ku pidocwiny ma leng’ man akwiyacwiny i adundena, m’ang’eyo ko nia, dong’ piny ma mero ryeko pajo kunoke lembsasa mi tarwang’, dong’ aweko ninyotho ko kuma. I gin moko ci m’atimo, i kaka mi tic, i coko mi Jukristu kunoke i kit nambu moko ci, anwang’u nia atie jamutoro nisagu. Dong’ aneno kwo i ayi ma ber.

Pi jurunyodo para, abedwoko foyofoc ni Yehova; pilembe giol ungo ni ii kukonya. Abepoy bende pi wec pa Yesu ma e ma nwang’ere i Yohana 6:44: “Ng’atu moko mbe ma copo bino i bang’a ka Wego m’uora utele en ungo.” Atie kud anyong’a ma lee dit nia atuc nidwoko i bang’ Yehova, pilembe En gire re m’edwoga ku ng’eya i bang’e.

“Ava Wego bino nega lee.”​—MARCO ANTONIO ALVAREZ SOTO

ORO M’ENYOLERE I IYE: 1977

NG’OM M’ENYOLERE I IYE: CHILI

I WANG’E: JAGOY MIZIK M’UCWAKU ROP

KWO PARA MA CON: Mama re m’utunga i Punta Arenas, ma tie adhura moko ma ber mandha, i Amerika ma yo piny, ceng’ini ku thenge ma mbilimbili ma yo piny, kaka ma gengi mi Magellan ukadhu kud i iye. Kinde ma oro para udoko abic kumeni, e jurunyodo para gipokiri; lembuno uketho anwang’u nia juwenja. Abino kud ava wego lee dit.

Mama uponjo Biblia ku Jumulembe pa Yehova man ebed ecidho kuda i coko mi Jumulembe i Ot Ker. Re kadok kumeno de, agam amaru ngo nicidho i cokone, uketho wang’ ma pol i gengi acidho ma nang’ akun. Kinde ma oro para udoko 13, agam ajigo magwei nicidho i coko.

I kind saa nica, mer mi mizik umondo lee i iya man anwang’u nia atie jarabodhone de. Kinde ma oro para udoko 15 kumeni, nang’ dong’ agoyo kit mizik ma julwong’o heavy-metal man death-metal i foc mi mizik, i bar man i lembe moko ci ma segi ma coko lwak. Dik m’adikara ko ku jurubodho ma dongo mi mizik unyolo i iya ava mi goyo mizik ma pire yik. E amondo i kalasi moko mi mizik m’i the dero keca. Saa ma oro para doko 20, pi nimedo wi ponjiri para, acokara acidho i Santiago, ma tie adhura ma dit mi ng’ombuca. Re, asu awotho begoyo mizik i ungu mi heavy-metal man death-metal de.

I saa nino zoo, abed anwang’u kud i iya kuca nia ve akoso piny moko, uketho abed akicara kwa akica. Kara akeakwiy lak lembuno, abino ku jurimba moko adek ma coo, ma dong’ akwanugi ni jufwa ma zoo, m’acaku bemadhara man nibuko njay kugi. Kadok i kura wang’a de, abino kud ayi timo mi tegowic ma nen kamaleng’. Abed akendo bongu ma jurujuru ma col cuc, atungo yir tika, man yuk wiya de aweko uyung’ini ubed uwobo kago nitundo piny i piera buu.

Kura para uketho saa ma ma pol man ke iwi there wi there, wadhaw adhawa ku dhanu man abedo kwa i yakini ku polisi. Nindo acel, ma ke nang’ dong’ de adaru mer ku kong’o, atugo ali iwi ba masta moko adek ma gitie umadh njay, pilembe gibino nywara ku jurimba de. Ba masta nica ginyoba nyob ma rac dit cil m’i thum pa aline, adong’ ma gituro cogo mi dinga acel cen.

Lem ma rac magwei m’anwang’ara ko i kwo para, de jurimba ma ceng’ini re ma gitimo ira. Nindo acel, abin arubo nia, karaman pi oro ma dupa, jarimba moko mi tuko ngo, ubecuku weco ku nyaku m’aweco ko. Jurimba mange de gicuno iygi tup ira ma kun ke, nang’ ging’eyo ma ber nia waweco ku nyakune. Lembuno ufoyeco iya magwei!

E agam adok i Punta Arenas, kaka m’alar acaku i iye lemb goyo wer. Kuca, adoko japonjo mi wer man abed agoye bende re i orkestre para gira. Re, bende, awotho bemedara asu nigoyo man nimaku wer karacelo kud ungu mange mi heavy-metal man death-metal de. Ku keca re, m’agam arombo ku nyaku moko ma nyinge Sussan, ebino nyaku ma leng’ mandha man ebino ku oro kago 26 kumeni; e wacaku kwo wakude karacelo. I ng’ei nindo moko kuno, Sussan ubin unyang’ nia, karaman an ayiyo ngo ponji mi Trinita ma ke, min ulund uyiyo. E egam epenja kumae: “Ka kumeno ke dong’ lemandha tie ma kanine tapi?” Alund adwoko ire kumae nia nikoro cuu cuu ku Biblia re ma copo voya, ento re ang’eyo ma ber dit nia ponji mi Trinita utie ponji mi ndra. Kadok kumeno de, ang’eyo ng’atu ma copo koro pire ma ber mandha. Ayero ire nia ju ma copo nyutho ire lemandha niai kud i Biblia tie Jumulembe pa Yehova. E agam atimo gin moko ma nang’ dong’ atimo ngo pi oro dupa: arwo i bang’ Mungu man akwaye nia ekonya.

Nindo ma nok ing’eye ci, agam arombo ku ng’atu moko m’ubino nen calu jaramer pa dhanu, e apenje ka nyo etie Jamulembe pa Yehova. Kadok ubino ninen kamaleng’ nia kit kuma ma cuu ngo ca ubetime tung’ i kwo pare kuca de, re asu edwoko wang’ penji para iwi coko i Ot Ker zoo i ayi ma ber. Cwinya bino tek nia, rombo mwa ma rek nica ubino jibu mi rwo para. E agam acidho i OtKer re, kara ng’atu moko ci kud unyang’ kuda nia an de acidho, awok abedo i leni ne m’i ng’ey dhanu. Re asu de, ju ma pol gicaku nipoy i kuma pilembe i saa ma nang’ podi abino nyanok, abed acidho i coko. Anwang’u kwiyocwiny ma lee akeca pilembe giwok gijola man gigwaka ku mer ma lee dit akeca. Ebino tap ve adok yofwa. Kinde m’aneno jalwo ma wabed waponjo kude Biblia ma podi a nyanok ca, akwaye de mormor eca nia wacak niponjo kendo.

KITE MA BIBLIA ULOKO KO KWO PARA: Nindo acel, asomo Lembrieko 27:11 m’ubeyero kumae: “Woda, bed riek man nyai mutoro i adundena.” Lembuno uzungo iya zung mi tuko ngo nia dhanu ma dhanu e de copo nyayu mutoro i Jacwic mi ng’om ngung’. Agam anyang’ nia karaman Yehova ubino kit Wego m’abino nisayu i kwo para zoo.

Mito para zoo ubino nia dong’ anyay mutoro i Vwa mi polo man ke, atim yeny pare; ento re, pi oro ma dupa, nang’ dong’ adaru doko ng’eca mi meth mi piny ma mero ryeko pajo man pa kong’o. Atundo ninyang’ i ponji pa Yesu ma jugoro i Matayo 6:24, m’ubeyero nia: “Ng’atu moko mbe ma copo timo ni rwodhi ario.” Calu m’abeii nitimo alokaloka ma tung’ tung’, lembe mi 1 Jukorintho 15:33 ubedo ku matoke ma lee i wiya. Eyero kumae: “Dikiri ma judikiri ko ku ju ma pigi rac nyotho pi jo ma ber.” E anwang’u nia, ka tekene podi abedebara asu nicizo i kaka ma rom nica man abenyebara i kum dhanu de ma rom eca ci, kura para ma reco acopo weko ngo. Juk mi Biblia ubino ngbeng’. Kara ajig magwei piny ceke ma copo bedo ni awic ira, ubino kwayu amak yub ma tek mandha i kumgi.​—Matayo 5:30.

Maku yub pi niweko mizik ubino ira lembe ma tek nisagu mange zoo, pilembe amaru akeca ayi mizikne mi rop ma julwong’o heavy-metal, re ajigo niwinje. Ento re, adong’ abin agony ma kpo, nikum kony mi jurimba m’i cokiri. Meth m’ukadhu mukero man drog de ajigo. Kura mi bekendo kwa bongu ma col bii ma jurujuru ca ajigo cen, agam anyaru yuk wiya m’ugapere man yir tika de zoo cen. Kinde m’awodho paru mi nyaru yuk wiya cen ni Sussan, ava ma lee dit mi kenyang’ pi gin m’awok anwang’u i OtKer utuk i kume. Egam eyero ira kumae: “An de wabikecidho wakudi nikeneno nia lembang’o ma bekadhu i OtKerne.” Lembe m’ewok eneno kuca unyang’u wiye lee dit mandha uketho ecaku niponjo Biblia de ndhu ndhu eca. I ng’ei kare, wadog wagamara dong’ ma zoo ku Sussan. I oro 2008, walimo batizo, e wadoko Jumulembe pa Yehova. Watie ku mutoro pilembe wabetimo ni Yehova ma watie i acel ku mama.

BERO M’AGAM ANWANG’U: Avuth kud i the cing jurumer ma weg umbili man kud i mutoro mandha ngo. Kadok podi cil kawoni e de amaru mizik asu, re, dong’ alondogi alonda. Abed atiyo ku lembe ma tung’ tung’ ma akadhu kud i iye pi nikonyo jufwa man jumange, akecane ke, aradu. Abethaku akonygi ginyang’ nia, piny ma pol ma ng’om nini uthebo, gikegilar ginen ve gileng’ mandha, ento i ng’eye lundo, gitie “susu” kende kende.​—Jufilipi 3:8

I cokiri mi Jukristu adaru ninwang’u jurimo mandha, kaka ma mer kud akwiyacwiny mandha n’i iye. M’usagu zoo ke, i ng’eye alund adog anwang’u Vwa, nikadhu kud i coro kago ku Yehova.

[Korolembe mi there]

[Paru ma nwang’ere]

“Atuc nidwoko i bang’ Yehova, pilembe En gire re m’edwoga ku ng’eya i bang’e.”