Biblia loko kwo

Ang’o m’ukonyo jalwo moko mi ng’om mi Slovénie kara ewek nimadhu kong’o m’akeca? Wakenen gin m’eyero.

“Abino ve kathini ma kong’o romo pong’o ngo iye.”​—LUKA ŠUC

ORO MI LONYIRI PARE: 1975

NG’OM MA THUGI: SLOVÉNIE

CON EBEDO: WON ANDREJ KONG’O

LEMBE MA AKADHU KUD I IYE: Anyolara i Ljubljana ma tie adhura ma dit mi Slovénie. Akwo ma ber mandha nitundo ma adoko ku oro ang’wen. Re ku lemarac, baba udeyere. I ng’ei lembe maeno, ugam ukwayu nia mama utim tic ma tek pi ninwang’u cam iwa wakud umira ma jadit.

Kinde ma adoko ku oro 15, adok i paneya i ba wang’umira. Calu ma jurimba ma pol zoo gibed gikwo ceng’ini keca, kwo yo pa wang’umirane ubed unyang’a mi tuko ngo. Ng’atu m’ubed udiya de mbe. Kinde ma oro para udoko 16, acaku dikara ku ju ma madhu kong’o nja ku bang’ thum pa yenga. Atungo yuk wiya udongo ma bor, acaku nikendara ve adui man i ng’eye acaku bende nitiyo ku yath ma merojo.

Kadok abed atiyo ku yath ma tung’ tung’ ma merojo de, re kong’o re ma abed amadhu lee dit pilembe ebed enyang’a nisagu. Nindo ukadhu lee ngo ci acaku madhu kende kende ngo ver moko, ento cupa acel ku wiye wang’ acel. Kan amer no, akanu wang’ mero parane ma ng’atu ma nyang’ de mbe. Ndhu ng’wic kong’o m’uwok kud i dhoga re ma ketho junyang’ nia amadhu kong’o. Re ng’atu acel de mbe m’ung’eyo nia abed amadhu kadi cupa ma kadhu abic mi bier ma nwang’u ajebo ku kong’o mange ma lakgi tek akeca.

Abed amadhu kong’o nikadhu jurimba wang’ ario. Re wang’ ma pol de an re ma abed amakugi ka gibethambini kinde ma wabedwogo kud i disko. Ento nindo acel jarimba acel uyero lembe moko m’udong’ i iya. Eyero ira nia a ve kathini moko ma there jik ungo man ma kong’o romo pong’o ngo iye. I dhu Slovenian jutiyo ku wec maeno pi niweco pi ng’atu ma madhu kong’o nikadhu ju mange ceke. Wec m’eno ucobo adundena lee dit.

Acaku niparu pi kite m’abino kwo ko i saa maeno. E anwang’u nia tija mbe nyanok de. Udog ubedo ve gin m’abetimo i kwo para zoo tie gin ma iye nanu.

KITE MA BIBLIA ULOKO KO KWO PARA: I kind nindo maeno, jalawobi moko ma wasomo kugi uloko kwo pare; edoko dhanu ma mol mi tuko de ngo. Nindo moko alwong’e kara wakebed kude nyanok i saa mi yom pilembe amito dit nia ake anyang’ i gin m’ukonye nitimo alokaloka maeno. Eyero ira lembe dupa. E eyero ira bende nia ecaku ponjo Biblia ku Jumulembe pa Yehova. Enyutho ira kadok kum lembe m’ebino ponjone moko. Ento, calu ma i dongo para zoo ang’eyo ngo lembe pa Mungu kadok nyanok de, lembe m’enyuthone zoo uwok ira nyen. E an de acaku cidho i coko mi Jumulembe pa Yehova man acaku bende niponjo Biblia.

Ponji mi Biblia uyabu wiya i kum lemandha dupa ma tie ku tego man ma miyo amora i kumjo. Ku lapor, aponjo nia wabekwo i nindo ma Biblia ulwong’o nia “kajik ceng’.” (2 Timoteo 3:1-5) Bende, aponjo nia ceng’ini eni Mungu bikabu ju ma reco cen kud iwi ng’om man ebiketho ju ma beco bikwo rondo ku rondo kud anyong’a i ng’om m’udoko ni paradizo. (Zaburi 37:29) E kuma ugam ucek pi niweko lembe ceke ma reco kara an bende atuc ninwang’ara i kind ju ma beco eno ma binwang’u bero dupa.

Kinde m’akoro lemandha mi Biblia ni jurimba, ju ma dupa m’i kindgi gicaku ninywara. Timo migi eno uketho anyang’ i kum lembe moko ma nwang’u wiya tundo ngo i kume. Anyang’ nia gitie ngo jurimo mandha. Karaman de mer ma amer ko kugi re m’uketho amondo i kong’o. Gin migi gikiyo thum pa yenga akiya pi nimer.

Athumo the mer ma kugi cen man adog atheyo mer ma nyeny man ma teng’ojo ku Jumulembe pa Yehova. Abed anwang’u tielocwiny lee dit ka wabedo kugi, pilembe gimaru Mungu andhandha man gi ii bende nikwo nimakere ku cik pa Mungune. E yo yo, aweko kura m’abino ko mi moko kong’o amoka ca cen.

BERO M’ANWANG’U: Kawoni dong’ ambe ku yeny pa kong’o pi niwinjara ma ber. Abefoyo Yehova lee dit pi lembene. Ang’eyo ngo nia ka nwang’u fodi nitundo tin de abemedara asu ku timo ma reco ma abino ko ca nwang’u kwo para nenedi tin. Ento kwoni anyang’ andhandha nia kwo para tie ma ber.

I kind oro abiro m’ukadhu, anwang’u rwom mi timo i Bethel mi Jumulembe pa Yehova mi ng’om mi Slovénie. Atuc ninwang’u anyong’a mandha i kwo niai m’ang’eyo Yehova man ma abetimo ire.