Kinde ma Yesu ubino i ng’om, ekwanyu tap tap kite pa Won man ayi pare mi timo lembe. Ewacu kumae: “Atimo ngo gin moko ku paru para gira; ento calu ma Wego uponja, abeyero lembe maeni . . . Saa ceke atimo lembe ma nyayu anyong’a i iye.” (Yohana 8:28, 29; Jukolosai 1:15) Lembene nen kamaleng’ i kite m’ebed etiyo ko ku dhanu ma mon, kite m’ebed edieng’ ko pigi; eno unyutho kamaleng’ kite ma Mungu dieng’ ko bende kadok ku mon ma coggi tho.

Nimakere ku wec ma nwang’ere i Injili, jururieko ma pol gibed giparu nia nen pa Yesu iwi mon tie lembe mir acidi, ya erombo ngo ku kite ma jubed jutiyo ko ku mon kinde ma jubekiewo Injili akiewa. Pirang’o kumeno? Nyo ponji parene romo miyo bedagonya ni dhanu ma mon asu tin?

Yesu ubed uneno ngo mon ni jamtic moko mi timo ribiri kumeni. Judong dini mi Juyahudi gibed giparu nia bedo ku winjiri ma ceng’ini ku ng’ati mi kit cwic m’ukoc romo kelo kende kende ava ma rac. E niai eca jubed juneno mon ni gin ma bidho jo, gibino mbe ku twero mi weco ni co i kind lwak kunoke ma wigi tie ngo aboya. M’umedo maeno, Yesu ung’olo ni dhanu ma co nia gicikiri nidiyo wi ava migi man nitiyo ku mon ku woro kakare nidunyogi cen kud i kind lwak.​—Matayo 5:28.

Yesu uyero bende nia: “Ng’atu ma tek ulalu gamiri ku dhaku pare man egamu mange, nwang’u etimo abor yor i bang’ dhaku pare.” (Marko 10:11, 12) Ekwero cen paru mi Judong’ dini mi Juyahudi m’ucwaku nia nico ulal gambiri ku dhaku pi “thelembe moko ci.” (Matayo 19:3, 9) Ni Juyaudi ma co, kura mi timo abor ubino lee. Judongo migi ubed uyero nia nico romo timo ngo abor ni dhaku pare; ento dhaku re ma romo kwale! Korolembe moko mi Biblia uyero kumae: “Lembe ma Yesu uketho ko nia mon de jutii ko rom calu co e udodo mon (umedo kilo i mon).”

Bero mi ponji pare tin: I cokiri mi Jukristu ma gitie Jumulembe pa Yehova, mon dikiri umbe peko karacelo ku ju ma co. Pieno, gimbe ku lworo ma nia gibinen tung’ kunoke nia tijgi mbe; pilembe dhanu ma co ma Jukristu ii nitiyo ku “mon dongo calu mego, mon ma nyir calu nyimego, ma nwang’u etie ku timo m’umaku piny yor i bang’gi.”​—1 Timoteo 5:2.

Yesu unwang’u saa mi ponjo mon. M’uweko paru mi Juyahudi ma gibed gicayu dhanu ma mon, Yesu uponjogi man emiyo amora i kumgi nia ginyuth lembe ma gibeponjo i timo. Kinde m’ebino cero ba Maria nia juwek ewinji ponji, Yesu unyutho kamaleng’ nia dhaku kakare tie ngo kende kende i mafika. (Luka 10:38-42) Lembe ma Nyamin Maria ma nyinge Martha udwoko ni Yesu i ng’ey tho pa Lazaru unyutho nia en de enwang’u bero i ponji pa Yesu.​—Yohana 11:21-27.

Yesu ubed uneno ngo ku tuko lembe ma mon uyero. I rundi maeca, mondi Juyahudi ceke ung’eyo nia kara juruot peri kwo ku mutoro ukwayu ibed ku wodi ma riek, man ka nang’ ecopere ebed Jabila. Kinde ma dhaku moko ukok nia: “Dhaku m’uyeyi i iye man m’idhoth i kore e jamutoro!” Jesu utiyo ku kare maeno pi nikoro ire lembe moko ma ber. (Luka 11:27, 28) Kinde ma Yesu unyutho ire nia woro Mungu re ma pire tie tek, egwelo ire lembe ma pire tek nisagu lembsuru m’ubino nuro mon.​—Yohana 8:32.

Kite ma ponji pare nwang’u ko kaka tin: Ju ma miyo ponji i cokiri mi Jukristu gijolo dwoko wang’ penji mi nyimego i cokiri. Ginyutho woro ni nyimego m’uteng’ini pilembe gitie “ku timo mi dhanu ma woro Mungu,” ka gitie kendgi man kadok niai kud i lapor migi. (Tito 2:3) Ju ma miyo ponjine gigenogi bende pi ponjo dhanu ku lembanyong’a mi Ker pa Mungu.​—Zaburi 68:11; nen bende sanduku “ Nyo Jakwenda Paulo ukwero mon kud uweci?”.

Yesu udieng’ pi jumamon. I rundi ma con, jubed judieng’ ku jumaco nikadhu jumanyir. Buku mi cik mi Juyahudi umiyo paru ma e: “Mugisa ni ng’atu m’utie kud awiya ma co, man can iwi ng’atu m’utie kud awiya ma nyir.” Junyodo moko ginwang’u nia nyathin ma nyaku tie ter moko kumeni; ma gibinwang’u ire jal moko ci gijenge ko man gibibedo mbe ku yeny mi kony pare kadok i tiyo migi.

Yesu unyutho nia kwo pa nyathi nyaku pire tie tek rom ku kwo pa nyathi jalawobi; pieno ecero nyathi nyaku pa Yairo calu m’ecero wo dhatho moko i Nain. (Marko 5:35, 41, 42; Luka 7:11-15) I ng’ei ma Yesu ukeyo kum dhaku moko ma “tipo ma rac uketho eremo pi oro apar abora,” Yesu lwong’e nia “nyar Abraham,” kit lwong’o ma nwang’ere ngo i gor mi Juyahudi. (Luka 13:10-16) Kite m’etiyo ko ku lwong’o ma mit man mi woro, unyutho andha andha nia enene kende kende ngo ni ng’ati ma pire tek ku kind lwak ento enyang’ bende nia etie ku yiyoyic ma tek.​—Luka 19:9; Jugalatia 3:7.

Kite ma ponji pare nwang’u ko kaka tin: Ng’ati moko mi ng’om mir Azia uwacu kumae: “Nipidho nyathin ma nyaku tie ve nikwoyo pii i the thiwe pa jirani.” Ento wego ma Jukristu giweko ngo paru maeno uwing wigi; ento wego ma jamer dieng’ pi awiya pare ceke rom, nikebed co kunoke nyaku. Junyodo ma Jukristu giketho awiya migi ceke unwang’ ponji man tieth ma rom calu m’ukwayere.

Yesu ugeno dhanu ma mon. I lempido mi juyahudi, tucolembe ma ng’atu ma dhaku jubed juneno rom ku tucolembe pa ng’eca. Josephus, ma tie jakorlembe mi rundi ma kwong’a umiyo cik ma e: “Dong’ kud juwinj lembe ceke m’ubeai kud i dhu dhaku, ni kum lembe m’uai kud i dhu ng’ati ma dhaku jugeno ngo.”

Ento m’ukoc ku maeno, Yesu ung’iyo juma mon pi nitero kwenda mi cer pare. (Matayo 28:1, 8-10) Juma mon ma weg yiyoyic eno gineno ku wang’gi lembe ceke m’utimere i kum Rwoth migi, re asu Jukwenda gipiemo lembe ma gbibino korone. (Matayo 27:55, 56, 61; Luka 24:10, 11) Pieno, Yesu uwok wang’ ma kwong’a ni mon pi ninyutho nia gin de giromo tuco lembe calu Julub pare mange.​—Tic mi Jukwenda 1:8, 14.

Kite ma ponji pare nwang’u ko kaka tin: I cokiri mi Jumulembe pa Yehova, dhanu ma co ma gitie ku rwom gicayu ngo paru m’ubeai kud i bang’ juma mon. Bende weg udi ma gitie Jukristu, ‘gimiyo yung’ ni mondigi nwang’u gibewinjogi ku mukuni.​—1 Pethro 3:7; Thangambere 21:12.

Tek won ot ubelubo lapor pa Kristu, e dhaku de miyo ire woro tap calu ma Mungu ular upangu i acaki. (Thangambere 1:27, 28) Kakare nibedo ku paru ma nia en re m’e en, weg udi ma Jukristu giweko cik mir ukungu mi Biblia re m’utel wigi, man lembene miyo anyong’a i kwo migi mi juruot.​—Juefeso 5:28, 29.

Kinde ma Yelena ucaku ponjo Biblia, nwag’u won ot pare sende man tiyo kude rac mandha. Pilembe won ot parene udongo i kabedo moko ma kura mi dhanu tie rac i iye, kaka ma jumaku iye mon man ku kit timo ma reco mange. Yelena yero nia: “Lembe m’aponjo niai kud i Biblia umiyo ira tego. Anyang’ nia kara ng’atu moko nuti m’umara lee mandha man epira. Anyang’ bende nia tek won ot para biponjo Biblia, nen pare yor i bang’a romo lokere.” Lek pa Yelena udoko ni lembe mandha, won ot pare ucaku niponjo Biblia man edoko acel m’ikind Jumulembe pa Yehova. Yelena yero nia “Kawoni dong’ edoko ng’atu ma jwigere lee”. Nyo ing’eyo de lembe m’edog emedo? “Waponjo nitimo kisa man niweko lembe i kindwa. Cik mir ukungu mi Biblia ukonya niwinjara ni ng’atu ma tije tie man agwoka i gamiri para.”​—Jukolosai 3:13, 18, 19.

Yelena kende ngo m’ubewinjere kumeno. Mon milioni dupa ma Jukristu gitie kud anyong’a; pilembe gin karacelo ku coggi gibetiyo ku cik mir ukungu mi Biblia i gamiri migi. Gibedo agwoka man ginwang’u anyong’a ka gidikiri ku Jukristu wagi.​—Yohana 13:34, 35.

Dhanu ma co ku ma mon ma Jukristu ging’eyo nia calu gileng’ ungo man gilagu dubo, gitie acel m’i kind giracwiya pa Mungu ‘m’umaru ngo nibedo i the ng’ol mi kwo m’umbe genogen mi nindo m’ubino.’ Pieno, ka gibedo ku winjiri ma ceng’ini ku Mungu ma jamer man Wego, Yehova, “jubigonyo giracwiya kud i ng’eca mi top” man “ebinwang’u bedagonya mi dwong’ mi nyithindho pa Mungu.” Eno tie bero ma yawe mbe ni co ku mon mi the gwok pa Mungu.​—Jurumi 8:20, 21.