• ORO M’ENYOLERE I IYE: 1963

• NG’OM M’ENYOLERE I IYE: GRANDE BRETAGNE

• I WANG’E: EBED ENWANG’U ANYONG’A LEE DIT I TIC PARE MI SENTE MA LEE

KWO PARA MA CON:

Anyolara i Croydon ma nwang’ere yo piny mir adhura mi Londres. Ka fwa watie wan abung’wen; an ke atie nyathin mir abusiende. Jurunyodo para gibino anyoli mi Saint Vincent ma nwang’ere i cula mi Caraïbe. Mama bino i dini moko ma tie jang CECA. Kadok nwang’u abed amaru niponjo piny lee de, re abedo mbe nyanok de kud ava mi ponjo lembe iwi Mungu. Ka jumiyo iwa yom kud i somo ci agamu buku ma tung’ tung’ dupa man acidh asomogi i dhu wat moko ma ceng’ini ku yo fwa.

Kinde ma oro moko ukadhu i ng’ey ma adaru somo para, anwang’u nia umito akony ju m’utie ju yeny mi kony. E acaku timo tic pi nikonyo ju m’ukoso udi ma gibed i igi, ju ma goro, man ju m’utie ku peko mi ponjo lembe. Lembuno ucwala nidok i somo ma malu pi niponjo lembe iwi kite ma jucopo tiyo ko ku rieko ma tung’ tung’ pi nikonyo dhanu. I ng’ey oro adek, adaru thenge ma kwong’a mi somo parane. E acaku niwilo tic ma dongo swa dit man anwang’u anyong’a de lee i tijenegi. Kwo para doko ma ber mi tuko de ngo. Abed akonyo dhanu ku piny ma tung’ tung’ man abino jasaylembe iwi kiye ma dhanu gicikiri nikwo ko. Gin ma abino ku yenyne i tic parane ubino kende kende ordinater ma abed amondo ko i Internet saa moko ci m’amaru. Ebino ira lembe ma yot dit nicidho i ng’om ma woko man niyotimo yenga moko ario kumeni. Bende, ayokabedo de i i hotel m’amaru nisagu zoo, aneno wi ng’om, man atimo kit rieyokum ma tung’ tung’ pi nibedo ma kuma yot. Anwang’u nia kwo ma ber m’uloyo maeno ci umbe. Ento paru m’abedo ko mi konyo ju ma n’i can ma ngolongolo ca re asu uthum ungo kud i wiya.

KITE MA BIBLIA ULOKO KO KWO PARA:

Pi oro ma dupa abed apenjara kumae: ‘Pirang’o wabekwo man thelembe pa kwo ke utie ang’o?’ Apimo ngo nyanok de nisayu dwokowang’ penjine i Biblia. Nyamira ma nok ma nyinge Margaret ugam udoko Jamulembe pa Yehova. Nindo moko i oro 1999 gibin giliewa giku nyamego moko ma jarimbe. Jarimbe eno udieng’ kuda lee mandha. E apoy ma ayiyo nia ecak niponja ku Biblia. Mediri para re m’ubino yo akeca pilembe tic para ku kit kwo para ubed ucamu saa para ma pol.

I saa pa cir mi oro 2002, adok i ng’et Angleterre ma yo piny ku yo reto. Kuca, amondo kendo i somo ma malu pi ninwang’u karathasi ma tokcen i tic mi timo sayusac iwi lembe m’ugwaku kum kwo pa lwak. Bende, acaku cidho nja i coko wa ku woda i Ot Ker ma ceng’ini ku ka ma wabino kwo i iye. Somo ma malu ubed unyang’a lee; ento ponji para mi Biblia lundo ubed unyang’a nisagu kum ekony’a ninyang’ i kum peko ma tung’ tung’ ma dhanu gibenwang’iri ko man ekoro bende kite ma pekone bithum ko. Anyang’ bende i lemandha ma nwang’ere i Matayo 6:24 m’uyero nia ecopere ngo nitimo ni rwodhi ario. Ng’atini copo kende kende nitimo ni Mungu kunoke ni Lonyo. Ugam ukwayu nia anen lembe ma pigi tek i kwo para.

I oro m’i wang’e, abed adikara nja i ponji mi buku Y a-t-il un Créateur qui se soucie de vous? * karacelo kud ungu moko mi Jumulembe pa Yehova. Ponji maeno uketho ayiyo andhandha nia Yehova ma Jacwic mwa kende re ma copo daru peko mi dhanu. Lembe tie nia i somo ma malu jubeponjo nia jucikiri ngo niyiyo nia Jacwic utie pi ninwang’u thelembe pa kwo. Lembuno uton i iya mi tuko ngo. I ng’ey dwi ario kende ci, aweko somone cen man akeco nitimo lembe ceke m’acopo pi nicoro ceng’ini magwey i vut Mungu.

Verse mi Biblia m’ugam ucwala nitimo alokaloka i kwo para zoo ubino Lembrieko 3:5, 6, m’uyero kumae: “Gen Yehova kud adundeni ceke, man kud ijengri kum ng’eyothelembe peri giri: [poy pire] i yo peri ceke, man [ebidwoko yo peri atira].” Bero m’anwang’u kinde ma aponjo lembe iwi Mungu mwa ma jamer ukadhu swa dit bero ma nwang’u somo ma malu copo miyo ira. Calu m’abino medara ameda niponjo lembe dupa iwi lembakeca pa Yehova pi ng’om man iwi lembe ma Yesu utimo m’ethiero ko kwo pare piwa, ava thiero kwo para ni Mungu umaka. E alimo batizo i dwi mir 4, mi oro 2003. Nok nok, acaku ii nikwo ku piny ma nok.

BERO M’AGAM ANWANG’U: Piny ma rom ku mer para ku Yehova ci umbe acel de. Ng’eyo lembe iwi Yehova umiyo ira kwiyocwiny mir adunde man anyong’a mandha. Anwang’u bende anyong’a i bedo karacelo ku jurutic mandha pa Yehova.

Biblia man coko ukonya lee dit nipong’o ava para mi ponjo piny lee m’atie ko. Ninyutho pi yiyoyic para ni jumange nyayu anyong’a lee dit i iya. Eno re m’udoko tic para m’acopo timo pi nikonyo dhanu kara gikwo ma ber tin man kara ginwang’ genogen ma ber mi kwo i ng’om ma nyen. Adoko jaratic mi saa ceke niai i dwi mir 6 mi oro 2008. Bende, atie jamutoro man afoyo lee dit ku piny m’atie ko nisagu m’i wang’e. Afoanwang’u thelembe mandha m’uketho wabekwo iwi ng’om keni man eno uketho abefoyo Yehova kud adundena ceke.