Junyola i Santo Domingo i République dominicaine, man atie nyathin ma tokcen i kind awiya mwa ang’wen. Junyodo para gigam gisomo lee man gimito wasom lee man wakwo i kind dhanu ma beco man ma cuu. Oro ang’wen i wang’ nyoliri para, junyodo para girombo ku jumisioner moko mi Mormon. Kite ma aradu ne gikendiri ko ma leng’ man woro migi utelo nen mi junyodo para lee, uketho ging’iyo nia juruot mwa ubed acel m’i kind juruot ma kwong’a m’udok i kanisa pa Yesu Kristu mi ju ma leng’ mi kajik ceng’ kunoke kanisa mi Mormon i cula keni.

Kinde m’abedongo, kit lembe ma tung’ tung’ ma jubed juyiko i kanisane ubed unyang’a lee, man agam amaru ayi ma gineno ko kwo mi juruot man kurajo ni gin ma pire tek. Nibedo Mormon ubedo ira ni anyong’a ma lee man akethe ni lembakeca nia abidoko Misioner.

Kinde m’adoko ku oro 18, wagam wadok i États-Unis kara amed somo ma malu. Oro acel i ng’eye, wayumira giku won ot pare ma gitie Jumulembe pa Yehova gibin giliewowa i Floride. Gilwong’owa nia wacidh kugi i coko ma dit. Kite ma gibino yabu ko Biblia man ma gibekiewo ko lembe utelo nen para lee. E akwayu kalamu ku karatasi man acaku kiewo bende.

I ng’ey coko ma ditne, wayumira giku won ot pare giyero ira nia kan amaru nidoko misioner gicopo konya niponjo lembe lee i Biblia. Aparu nia ebino paru ma ber kum saa nica unwang’u nang’ angeyo lembe lee i buku mi Mormon nisagu Biblia

Wabed waponjo Biblia kud i telefon, gibed gicego kuma nia apor yiyoyic para ku ponji ma nwang’ere i Biblia. Gimito anen an gira lembe ma Biblia ubeponjo.

Abed adikara i yiyoyic mi Mormon iwi lembe dupa ma nwang’u anyang’ de ngo ka nyo girombo ku lembe ma nwang’ere i Biblia. Wayumira ugam uoro ira Gazeti Cew! mi nindo 8, dwi mir 9, 1995 mi Jumulembe pa Yehova, ma i iye junwang’u bende korolembe iwi yiyoyic para mi Mormon. Lembe m’uwang’u iya ubino nia kara nang’ fodi ang’eyo ngo lembe dupa iwi ponji mi Mormon. Eno ketho acaku sayu lembe i kusika mir internet mi Mormon pi ninyang’ ka nyo lembe ma jukiewo i Cew! ne utie lembe mandha. E anwang’u nia etie lembe mandha karaman. Ayiyo lembene bende kinde ma acidh aliewo kakan piny ma con mi Mormon ma nwangere i Utah.

Abed ageno nia buku mi Mormon ku Biblia ceke ubeyero lembe ma rom. Ento kinde ma acaku somo Biblia i tuc ne, aneno tung’ tung’ m’utie i kind ponji mi Mormon ku lembe ma nwang’ere i Biblia. Ku lapor, i Ezekiel 18:4, Biblia uyero nia ng’eyong’ec tho. Ento i Alma 42:9, buku mi Mormon uyero nia, “ng’eyong’ec tho ngo.”

M’umedo tung’ tung’ maeno, ponji migi i kum maru ng’om ma thugijo de ubed unyotho wiya. Ku lapor, giponjo nia podho mir Eden ubino i teng ng’om mi Jackson, I Missouri, i États-Unis. Man jubila mi kanisane giyero nia kinde ma “Ker pa Mungu bicaku bimo, abera mir États-Unis bilepini kud anyong’a m’umbe cilo iwi yen mi bed’agonya man mi cik mi bedo rom rom.”

Acaku penjara iwi lembe ma binwang’u ng’om ma thuwa ku ku ng’om mange bende. Uthieno moko, kinde ma jalawobi moko mi Mormon m’ubeyikere pi nidoko misioner ulwong’a i telefon, awodho parune man apenje kamaleng’ kumae: “Kinde ma États-Unis bicaku lwiny i dhu ng’om mange, nyo in de ibibedo ayika pi nikiedo i dhu juyic mi Mormon ma nwang’iri i ng’ombe?” Iya wang’ lii kinde m’edwoko ira nia eyo! Asayu lembe lee iwi ponji mi yiyoyic para man apenjo judong dini mi Mormon. Giyero ira nia wang’ penji para utie lembpandi moko ma biwok kamaleng’ nang’ lero ubemedere niwok.

Korolembe migi uturo cwinya, e acaku paru lembe i wiya an gira man iwi thelembe m’uketho amito adok ni misioner. Anyang’ nia lembe m’ubino tela ubino nia amito akony dhanu mange, man woro ma jubimiyo ira. Ento iwi Mungu re ang’eyo lembe nyanok akeca. Kadok nang’ asomo Biblia wang’ ma pol dee, re anene ngo ni gin ma pire tek lee. Agam ang’eyo ngo lembakeca pa Mungu pi ng’om man pi dhanu.

Nikadhu kud i ponji para mi Biblia ku Jumulembe pa Yehova, aponjo lembe dupa ma i kind lembene, moko tie nying’ Yehova, lembe ma kadhu ka ng’atini utho, man tic pa Yesu lembakeca pa Mungu. Tokcen ne acaku ng’iyo ku Biblia man acaku weco ku dhanu iwi lemandha m’abino ponjo. Agam ang’eyo nia Mungu tie. Ento kawoni dong’ acopo weco i bang’e nikadhu kud i rwo calu jarimo ma ceng’ini. Alimo batizo calu Jamulembe pa Yehova nindo 12, dwi mir 7, 2014, man i ng’ei dwi 6, acaku timo tic mi saa ceke i rweyo lembanyong’a.

Pi oro abic, atimo tic i kabedo ma dit mi Jumulembe pa Yehova i Brooklyn, i New York. Anwang’u bende rwom mi konyo I tic mi wodho Biblia man girasoma mange m’ujengere iwi Biblia m’ubekonyo dhanu milion dupa i wang’ ng’om zoo man abemedara nikonyo dhanu mange kara ging’ey Mungu.