Niai m’atie nyathin, amaru ng’om ku piny mi iye lee. Ku jufwa, wang’ ma pol wabed wamaru niciliewo luli man nam ma beco m’utwodo adhura mi Jyväskylä ma wanyolara i iye i die ng’om mi Finlande. Amaru bende lei lee. Kinde m’abino nyathin, kan arombo ku kajangu kunoke gwok moko, amito ating’e kokoro i kora! Kinde m’abedongo, wang’ ma pol ka dhanu ubetimo lei yanga yanga, lembene ton i iya lee. I ng’eye, agam amondo i dilo moko ma cero bang’ twero mi lei, kaka m’awok anwang’u iye dhanu moko ma paru migi urombo ku para.

Wabed wayawu dhanu ku kero mwa zoo pi twero mi lei. Wabed wapoko karatasi ni dhanu, wabed wapang’u pi woth mi cur cwiny i kum kuloka mi lworo adila lei man tiyo ku lei pi pima ma tung’ tung’ i odiyath. Wadog wapangu dilo mange ma nyen pi gwoko lei. Calu ma wabed wamiyara ku kwar cwinywa i lembe maeno, wang’ ma pol wabed wawinjara ngo ku judongo pa gavmenti. Jugam jutwiya wang’ dupa man acidho i wang’ kesi.

M’uweko adieng’a m’abino ko pi lei, lembe mange bende m’ubetimere i ng’om ubino nyang’a ngo. Agam amondo bende i dilo ma tung’ tung’, calu ve Amnesty International man Greenpeace. Amiyara ku tego para ceke pi nitielo tic migi. Amiyara bende zoo nicero bang’ jucan, ju ma kec ubenego man dhanu ma piny migi mbe.

Ento nok nok, acaku nyang’ nia karaman acopo loko ngo lembe mi ng’om. Kadok nwang’u dilo maeno gibed gikonyo pi nidaru peko ma thindho thindho, ento peko ma dongo ubedo doko rac nisagu. Edog ebedo ve nia lembe ma rac umwonyo ng’om yungu man ng’atu moko de mbe m’ubedieng’ i kume. Anwang’u nia gin m’acopo timo mbe.

Calu m’abino winjara rac mandha pilembe gin m’acopo timo mbe, acaku paru lembe iwi Mungu man iwi Biblia. I wang’e akeaponjo Biblia ku Jumulembe pa Yehova. Kadok nwang’u kite ma Jumulembe pa Yehova gibino ko dhanu ma ber man ayi ma gibed ginyutho ko ira mer ubed unyang’a de, ento abino ngo ayika niloko kit kwo para. Re kinde m’adog acaku ponjo Biblia kendo, lembe ubino tung’.

Ating’o Biblia para man acaku some. Eno ukonya lee dit. Anwang’u verse ma tung’ tung’ mi Biblia m’ubeponjowa nia wabed ma ber ku lei. Ku lapor, Lembrieko 12:10 uyero nia “ng’atu ma pwe ng’eyo bedo mi lim pare.” Anyang’ bende nia Mungu tie ngo ukungu mi lembe ma reco m’ubetimere i ng’om. Ento lembe mi ng’om udoko rac nisagu pilembe dhanu ma dupa gibelubo ngo telowic pa Mungu. Kinde m’aponjo lembe iwi mer pa Yehova man kite m’enyutho ko cirocir, lembe maeno uwang’u iya lii.​—Zaburi 103:8-14.

I saa ma rom eno, anwang’u karatasi moko ma jukwayu ko buku Qu’enseigne réellement la Bible ? e agam aore. Ndhundhu i ng’eye, jalwo moko giku dhanu pare ma gitie Jumulembe gibino i bang’a man gikwayu nia waponj kugi Biblia, e ayiyo. Bende acaku cidho i coko mi Jukristu ma bekadhu i Ot Ker. Eno ubino ku matoke ma kani? Acaku maru lemandha m’abeponjo i Biblia.

Ku kony mi Biblia, abino ku copo mi timo alokaloka ma pol i kwo para. Aweko nimadhu taba man nimer kong’o. Acaku yikara man bende aweko rac dhok. Aloko bende kit nen m’abino ko iwi judongo pa gavmenti. (Jurumi 13:1) Aweko kwo ma cuu ngo m’abino ko; lembe maeno ukwayu ira kero ma lee mandha.

Lembe m’ubino ira yot ungo ubino nen para iwi dilo ma cero bang’ twero mi dhanu man mi lei. Lembe maeno utimere ngo pi bang’ acel kende. Ku kwong’a, abino nwang’u nia kan awok kud i kindgi, bibedo ve nia acibogi aciba bu. Ento agam anyang’ nia Ker pa Mungu kende re ma bidaru lembe mi ng’om. Agam ang’iyo nia amiyara ku kero para ceke nitielo Ker maeno man nikonyo dhanu mange kara giponj lembe i wiye.​—Matayo 6:33.

Kinde m’abino kiedo pi lwak, abed aketho dhanu i ungu ario, dhanu ma ber man ma rac. Ju m’anwang’u nia gitie dhanu ma rac, aketho wang’a tingili i kumgi. Ento ku kony mi Biblia, dong’ anwang’u ngo nia adagu jumange. Atimo kero ninyutho mer mi Jukristu ni dhanu ceke. (Matayo 5:44) Yo mange m’anyutho ko mer maeno utie nirweyo lembanyong’a mi Ker pa Mungu ni dhanu. Atie kud anyong’a nineno kite ma tic maeni mi mananu umiyo ko kwiyocwiny man mutoro ni dhanu man eketho ginwang’u genogen mandha.

Anwang’u kwiocwiny mir adunde kinde m’aweko lembe i cing’ Yehova. Ambe ku jiji nia en m’etie Jacwic, ebiweko ngo jusend dhanu ku lei rondo ku rondo man ebiweko ngo nia junyoth ng’om mwa ma leng’ kumeni. Tung’ ku maeno, nikadhu kud i Ker pare, ceng’ini eni ebiweyo lembe ceke ma reco m’utimere. (Isaya 11:1-9) Atie ku mutoro lee ning’eyo lemanda maeni ang’eya kende ngo, ento nikonyo jumange bende kara gibed ku yiyoyic i iye. Kawoni dong’ anwang’u ngo nia kwayu alok ng’om.