Michelle: Jambu, Sofia. Atie kud anyong’a ninweng’i i pacu.

Sofia: An de.

Michelle: Nindo m’ukadhu m’abino keni, waweco iwi kite ma Mungu winjere ko ka wabesendara. * Iyero ira nia in de iparu iwi lembene pi nindo dupa, asagane i saa ma meru unwang’u ret kinde ma gitimo aksida ku mutukari. Kawoni ke merune tie nenedi?

Sofia: Saa moko ewinjere ma ber, saa mange ke ewinjere ma rac. Tin re nwang’u ebewinjere ma ber.

Michelle: Atie kud anyong’a niwinjo kumeno. Re lembe ma kumeno mito cirocir ma lee.

Sofia: Lemandha. Saa mange, apenjara ka nyo peko parene bithum awene.

Michelle: Dieng’ peri tie kakare. Nyo ibepoy i kum penji m’aweko cing’ m’abin aliewi ca de? Penjine bedo nia ka Mungu tie ku copo mi daru masendi mwa ceke, pirang’o elund eweko gibemediri asu?

Sofia: Eyo, abepoy.

Michelle: Iwang’ ninwang’u dwokowang’ penji maeno ma nwang’ere i Biblia, wakedok nyanok iwi lembe ma waponjo nindo m’ukadhu.

Sofia: Ber.

Michelle: Mi kwong’o, wanwang’u nia jaratic pa Mungu moko ma con de upenjere nia pirang’o Mungu beweko dhanu unen can. Kadok epenjere kumeno de, Mungu udhau ungo i wiye, kadok acaya de ecaye ngo nia yiyoyic pare re ma nok.

Sofia: Lembe meno wok ira nyen.

Michelle: Wanwang’u bende nia Yehova dagu ninenowa i masendi. Ku lapor, Biblia yero nia kinde m’eneno dhanu pare i masendi, “lembene bedo ire de ni masendi.” * Nyo, etie ngo lembe ma ber iwa ninyang’ i kite ma Mungu winjere ko kinde m’ebeneno wabesendara?

Sofia: Tie kumeno.

Michelle: Pi nidaru, wayiyo nia, calu ma Jacwic mwa tie ku tego ma dwong’ akeca, andhandha etie ku copo mi kabu man mi daru can mwa saa moko ci m’emaru.

Sofia: Eno tap lembe m’abenyang’ ungo i iye. Ka Mungu tie ku copo mi daru lembe ma reco ceke, pirang’o elund ebeweko gimediri asu?

Michelle: Pi ninwang’u dwokowang’ penji peri no, wakedok iwi lembe ma buku ma kwong’a mi Biblia, niwacu Thangambere, ukoro. Aparu nia ing’eyo cuu lembe m’ugorere iwi Adamu ku Eva man iwi nyingyen ma jukwero igi.

Sofia: Eyo, juponjowa kud uda meno i kalasi mi ceng’ yenga. Mungu yero nia kud gicam kum nyingyen moko, ento gikwero niwinjo man gicame.

Michelle: Iyero lemandha. Dong’ wakenyang’ nia ang’o dhe m’uketho Adamu giku Eva gituc nidubo. Tek wanyang’ i lembe maeno tap ci wabinyang’ bende i thelembe m’uketho wabesendara. Nyo icopo somo iwa Thangambere thek 3, verse 1 nitundo i 5?

Sofia: Ber. “Nwang’u thwol riek ma sagu yedi mange ceke m’i thim ma Yehova Mungu cwio. Man ewacu ni dhaku kumae, Meno te, Mungu wacu kumae, Kud wucam kum nying’ yen ceke m’i podho? Man dhakune wacu ni thwol kumae, Kum nying’ yen m’i podho wacopo camu: ento kum nying’ yen ma ni i die podho, Mungu wacu kumae, Kud wucam kume moko, kadok amula de kud wumul kume, wumaru tho. Man thwol uwacu ni dhakune kumae, Wubitho andha ngo: Kum Mungu ng’eyo nia i ceng’ ma wucamu kume moko, e weng’wu biyabre, man wubibedo calu Mungu, ma wung’eyo ko gin ma ber ku gin ma rac.”

Michelle: Afoyo. Wakeng’ii i verse maeni pi saa moko. Mi kwong’o, ubenen nia thwol moko uweco i ba dhaku, niwacu Eva. I verse mange, Biblia nyutho nia ubedo Sitani Wonabali re m’uweco i ba Eva nikadhu kud bang’ thwol. * Sitani upenjo Eva iwi cik ma Mungu miyo iwi yen moko. Nyo ineno lembe ma Mungu yero nia binwang’u Adamu giku Eva tek gicamu kum nying’ yen ne?

Sofia: Eyero nia gibitho.

Michelle: Tap. Ndhu ndhu i ng’eye, Sitani kelo adote moko ma pek iwi Mungu. Kenen lem m’eyero e: “Wubitho andha ngo.” Nimakere ku wec maeno ubenen kamaleng’ nia Sitani uyero nia Mungu tie javupo.

Sofia: Nwang’u podi awinjo ngo theng udane maeno.

Michelle: Bende, kinde ma Sitani yero nia Mungu tie javupo, ecaku the lembe m’ugam ukwayu saa ukeukadhi lee pi niyiko lembene. Iparu nia pirang’o?

Sofia: Hmm. Ungo.

Michelle: Ber, wake mak lapor moko. Kepar nia saa moko abino i beng’i, e acaku yero iri nia ifoda ngo. Icopo timo ang’o pi ninyutho nia acwayu vupo?

Sofia: Acopo kwayu nia wakepim kero mwa.

Michelle: Tie tap kumeno. Saa moko nyo wacopo sayu piny moko ma pek e waneno ka nyo ng’a ma copo ting’o there. E ci waneno kamaleng’ nia ng’a ma tek sagu wadi.

Sofia : Anyang’ i lem m’imito yero.

Michelle: Re, kakare niyero nia afodi, kan alund arido nia an re m’ayero lemandha ke? Eno tie lem m’ukoc, kumeno ngo nia?

Sofia: Ee, an de aneno kumeno.

Michelle: I andha, ayi ma jusayu ko nia ng’a ma yero lemandha ukoc kud ayi mi pimo kero.

Sofia: Kumeno.

Michelle: M’umedo maeno, ka wan ario wabepiemara i kindwa, ukwayu kende kende saa ma lee ukekadhi kara jumange ginyang’ i lembene cuu pi nineno ka nyo ng’a dhe ma yero lemandha.

Sofia: Paru meno rombo tap ku lem ma waweco i wiye.

Michelle: Kawoni, wakedok iwi lembe ma nwang’ere i Thangambere e kendo. Nyo Sitani yero nia etek nikadhu Mungu?

Sofia: Ungo.

Michelle: Nwang’u eyer kumeno, nwang’u Mungu benyutho ire saa meca nia e javupo. Kare niyero kumeno, Sitani yero pare nia en re m’eyero lemandha, Mungu re ngo. I andha, eyero ni Eva kumae, ‘Mungu bewondi, an re m’ayero lemandha.’

Sofia: Lembene nyang’a.

Michelle: Calu Mungu tie ku rieko, egam eng’eyo nia ketho piem m’i kindgi ku Sitani uthum, ukwayu saa moko ke ukadhi. E i ng’eye, jucopo neno kamaleng’ nia ng’a m’uyero lemandha man ng’a m’ucwayu vupo.

Sofia: Kinde ma Eva tho, si dong’ unyutho nia Mungu yero lemandha.

Michelle: I adundo tie kumeno. Re, lembe bedo kende kende ngo piem ma waay waweco i kume no. Wakedok iwi verse mir 5 e kendo. Nyo ibeneno lembe mange ma Sitani yero ni Eva?

Sofia: Eyero nia tek ecamu kum nying’ yen ne, wang’e bilund yabere.

Michelle: Tie kumeno, emedo bende nia ebilund doko “calu Mungu, m’ebing’eyo ko gin ma ber ku gin ma rac.” Unen nia Sitani yero nia Mungu betwono dhanu ku piny moko ma ber.

Sofia: Abeneno kawoni.

Michelle: Eno de bedo piem ma lee.

Sofia: Imito yero ang’o?

Michelle: I wec maeno, Sitani nyutho nia Eva, uketho i iye bende dhanu mange ceke, upe ku yeny mi bimobim pa Mungu pi nikwo ma ber. Pi nidaru piem meni de Yehova ng’eyo nia ukwayu ekewek Sitani ukeubim pi saa moko e ebinyutho ko bende nyo ecopo. Kawoni dong’ wanyang’ nia pirang’o masendi unyay lee. Utie pilembe ng’atu m’ubebimo wi ng’om tie Sitani, Mungu re ngo. * Re lembe ma ber unuti.

Sofia: Etie lembang’o?

Michelle: Biblia ubeponjo lemandha ma beco ario ma e iwi Mungu. Mi kwong’o, ka wabenwang’ara ku peko, Yehova ni kudwa. Ku lapor, wakenen lembe ma Ubimo Daudi yero ma nwang’ere i Zaburi 31:7. I andha, Daudi kadhu kud i peko lee akeca i kwo pare, re kenen lembe m’etuc niyero kinde m’eberwo i bang’ Mungu. Nyo icopo somo iwa verse maeno?

Sofia: Ber. Eyero kuwae: “Anyong’a binega pi mer mandha peri kum ineno masendi para; ing’eyo masendi para ceke.”

Michelle: Kadok nwang’u Daudi nwang’ere ku peko de, enwang’u jukocwiny kinde m’enyang’ nia Yehova neno lembe ceke m’ekadhu kud i iye. Nyo in de inwang’u jukocwiny moko, nimakere ku paru ma nia Yehova ung’eyo lembe ceke, kadok pidoic mwa m’upondo ma ju mange copo nyang’ ungo i igi de?

Sofia: Eyo, anwang’u jukocwiny maeno.

Michelle: Lemandha ma ber mir ario utie nia Mungu biweko ngo nia wasendara pi nja. Biblia ubeponjo nia ceng’ni eni ebijigo bimobim ma rac pa Sitani cen. M’umedo maeno, ebikabu lembe ma reco ceke m’utimere, uketh’i iye lembe ma wuku meru wubekadhu kud i igi. Nyo yenga ma cen acopo dwogo kendo kara anyuth iri thelembe m’uketho wayiyo nia andha Mungu bidaru masendi mwa ceke? *

Sofia: Abikuri kud ava ma lee.