Anyolara man adongo i theng pacu moko mi Roma, ma jurubedo mi iye tie akeca jurutic mi cing’. Kwo ubino tek. Ang’eyo de ngo mama m’unyola man wabed wawinjara de ngo waku baba. Adongo ku ponji mi ndaki.

Kinde m’adoko ku oro apar kumeni, nwang’u dong’ acaku bekwalu piny. Saa ma oro para udoko 12 ke, wang’ ma kwong’a i kwo para, apiey cen kud i pacu. Wang’ dupa baba ubed ucidh ugama kud i kabedo ma dit mi polisi man edok kuda i pacu. Abed adhaw ku dhanu saa ceke. Abino won’arwo man kwinyo nega i kum gin ma nyinge dhanu ci. Kinde m’adoko ku oro 14, afoweko pacu mi magwei. E acaku tiyo ku yath ma merojo man nikwo i ndaki. Calu abino mbe ku kaka m’aromo vuto i iye, abed aturo dhu mutukari e avuto i iye nitundo mombwa. Kugweno, asayu ka pii, e ajom.

Adoko jakwo m’anganga: abed ayudho malet kud i cing dhanu, aturo dhugola man akwalu piny ku diewor i udi ma beco mi dhanu. Rwonga ucaku yik ma rac mandha man nya sere e ci, ungu moko mi jutimrac ma pigi yik ulwong’a, eno uketho nivo mi kwo para “uidho”: acaku kwalu bank. Calu abino ngoy akeca, nyapio pio eca ci adoko ng’atu mir awora i ungu nica. Abed acidho ngo kaka moko acel de m’umbe atum para; pieno, kadok kinde m’abenindo, akethe i the wiya. Rop, yath ma merojo, kwalu kwo, wec ma reco, man lemmbsasa mi tarwang’ udoko kwo para. Saa moko ci, nwang’u bapolisi ubedwara. Jubed jutwiya wang’ ma pol man pi oro ma dupa, nimondo man niwok kud i kol udoko kwo para.

Nindo moko kinde ma juwodha kud i kol, apangu niciliewo nyaminmaa moko acel. M’umbe ng’eyo, en kud awiya pare ario gidoko Jumulembe pa Yehova. Gilwong’a nia akeacidh i coko mi Jumulembe pa Yehova. Ayiyo nicidho wakugi re pi nicineno lembene anena kende. Kinde ma watundo i Ot Ker kuca, arido lembe nia juketh abed ceng’ini ku dhugola kara awoth kaneno dhanu m’umondo man m’uwok. Atum para ke bino kuda goma!

Coko nica uloko kwo para. Acaku paru ve nia abenwang’ara i ng’om mange. Jumotha zoo ku yawyaw, ku wang’ mi vonjo man mer. Abepoy ve nia etie lembe m’utimere nyaworo eni i kum kite ma Jumulembe ginena ko kud ava man ku mer. Edog ebedo ve nia abino bor i kabedo mange m’uweko ng’om!

E acaku ponjo Biblia ku Jumulembe pa Yehova. Kinde m’abemedara ku ponjine, acaku neno kamaleng’ nia ukwayu alok kit kwo para zoo wi zoo. Wec ma nwang’ere i Lembrieko 13:20 m’uyero nia “woth ku jurieko, e ibibedo rien; ento wadi jukusegu bitur” umondo i thuc mir adundena. Agam anwang’u nia thaku akoyara cen kud ungu mi jutimrac m’abino i iye. Ebino lembe ma yot ungo, re ku kony pa Yehova, atuc nitime.

E ayiko bende kuma man ayina. Ku tegiri mi tuko ngo, aweko mazu taba man tiyo ku yath ma merojo. Yuk wiya m’ubino yukutu de anyaru cen, kilengethu mi itha de akabu kpo man wec ma both de aweko zoo. Wang’ ma kwong’a i kwo para, acaku ning’iyo i timo para.

Calu ma somo piny man ponjo piny ubed unyang’a ngo, nicungo thir i kum ponjo Biblia man niketho wiya i kume ubino lembe ma yot ungo. Kadok ebedo kumeno de, re awekara ngo, e nok nok ci atundo nimaru Yehova man i iya, lembe moko ucaku lokere; pidocwiny para ucaku besenda. Wang’ ma pol, abed abedo ku paru ma cuu ngo i wiya gira: abed aparu nia Yehova copo weko ngo ira lembe ceke ma reco m’atimo. I saa maeno, anwang’u tielocwiny ma lee kinde m’asomo pi kite ma Yehova uweko ko dubo ma pek m’ubimo Daudi utimo​—2 Samwil 11:1-12:13

Peko para mange ubino nirweyo lembanyong’a ot kubang’ ot ni jumange. (Matayo 28:19,20) Lworo para bino nia saa moko nyo wabirubara ku ng’atu moko ma con agam atime rac i ayi moko. Re, yoo yoo avoyo lworo nino de. Acaku nwang’u mutoro lee nikonyo dhanu gingey Wegwa m’i polo ma tie ng’atu ma yawe mbe, man ma weko dubo moko ci.

Niponjo lembe iwi Yehova ubodho kwo para! Ju ma pol m’i kind juwada ma con, gidaru tho kunoke gibeoco i kol; re an, abekwo ku mutoro man atie bende kud anyim ma ber. Aponjo nibebo dhanu ma mol, nibedo wor man nibimo wi mac ma tukini i iya. Matoke m’anwang’u tie e: abekwo ku winjiri ma ber mandhandha ku dhanu ceke. Agamu Carmen dhaku para mir amara man wabekwo kude ku mutoro. Karacelo kude, watie ku mutoro nikonyo jumange kara giponj lembe mi Biblia.

Ha! Kawono dong’ atimo tic mi kwo ngo, saa moko bekwayu nia acidh atim i bank, ento kakare nikwalu piny m’i iye, adoko jawey susu m’i iye!