Kepar pi wego moko m’ubeweco ku wode ma tie ku oro 7. Eyero ire kumae: “Yang’con, con mandha, Mungu ucwiyo ng’om man piny ceke m’i iye, ecwiyo ceng’, dwi man nyikaluku.” Nyathin ne uparu i lembe maeno pi dakika moko man epenjo won kumae: “Baba, ka ng’a m’ucwiyo Mungu ke?”

Won udwoko ire kumae: “Ng’atu moko mbe m’ucwiyo Mungu. En pare niai con enuti kwa.” Pi saa maeno, lembe ma nyanok maeno upong’o yeny pa nyathin ne. Ento kinde m’ebedongo, penji maeno umedere nisendo wiye. Ekwong’o nwang’u nia etie lembe ma winjere ngo nia ng’atu moko ubed nuti ma ke ecaku ngo. Kadok polo ku ng’om de gicaku. Ecaku penjere nia ‘ka dong’ Mungune ai kani?’

Biblia udwoko wang’ penji maeno nenedi? Edwoke de i ayi ma rom ku ma wego ma waweco pire i lapor mwa no udwoko. Musa ukiewo kumae: “E Yehova, . . . ma fodi icwiyo gudi ngo, man ma fodi icwiyo ng’om de ngo, man ugambere rondo ku rondo cil rondo ku rondo, in i Mungu.” (Zaburi 90:1, 2, NWT) Rom rom kumeno, jabila Isaya uyero kumae: “Ing’eyo ngo? Iwinjo ngo kumae? Mungu ma bedo rondo ku rondo, Yehova Jacwi tung ng’om, voc ungo.” (Isaya 40:28) Bende, barua pa Yuda uyero nia Mungu unuti “niai naka ku naka.”​—Yuda 25.

Giragora maeno ubenyutho iwa nia Mungu tie “Ubimo ma rondo ku rondo” calu ma jakwenda Paulo ukoro. (1 Timoteo 1:17) Eno nyutho nia Mungu unuti niai con, kadok nwang’u wiwa copo wojik ka waketho wakepar nia ebino nuti niai awene. Man ebibedo nuti bende pi rondo ku rondo. (Lembanyutha 1:8) Eyo, kite ma pire tek pa Jategokpo utie nia ebedo rondo ku rondo.

Pirang’o etie iwa tek ninyang’ i lembe maeno? Tie pilembe wabekwo pi oro ma nyanok, eno uketho watie ngo ku nen ma rom ku Yehova iwi saa. Calu Mungu bedo rondo ku rondo, i wang’e oro 1 000 utie ve nindo acel. (2 Pethro 3:8) Ku lapor: Kepar pir usene ma kwo pi nindo 50 kende, nyo ecopo bedo yot ire ninyang’ i oro 70 kunoke 80 ma watimo? Ungo! Bende, Biblia ukoro nia watie calu usene ka juporowa ku Jacwic ma dit. Kadok copo mwa mi paru i lembe de tie gin moko ngo ka jupore ku pare. (Isaya 40:22; 55:8, 9) Pieno, etie ngo lembe ma wang’u i jo nia koth Yehova moko nuti ma dhanu nyang’ ungo cuu cuu i igi.

Kadok nwang’u paru ma nia Mungu kwo rondo ku rondo tie lembe ma tek ninyang’ i iye de, re etie lembe ma winjere. Ka nwang’u ng’atu moko mange re m’ucwiyo Mungu, nwang’u ng’atu maeno ubecibedo Jacwic. Ento, calu ma Biblia ukoro, Yehova re ma tie ng’atu ‘m’ucwiyo piny ceke.’ (Lembanyutha 4:11) M’umedo maeno, wang’eyo nia nindo moko con, polo ku ng’om gikegibedo mbe. (Thangambere 1:1, 2) Giai kani ke? Ugam ukwayu nia Jacwic migi ular ubed unuti. Elar ebedo nuti bende i wang’e ma fodi gin moko ci ma kwo man ma riek umbe, calu be Wode m’acel kulong’ man jumalaika. (Yob 38:4, 7; Jukolosai 1:15) M’umbe jiji, i saa maeca, ebino en’i kende. Enne jucwiye ngo acwiya, kum nwang’u gin moko acel de mbe ma copo cwiye.

Bedonuti mwa man mi polo ku ng’om ubenyutho nia Mungu moko ma kwo rondo ku rondo unuti andha. Ng’atu m’uketho polo ku ng’om ubewotho, Ng’atu m’uketho cik ma telo wigi; elar ebedo nuti kwa. Tie kende kende en re m’etie ku copo mi miyo kwo ni piny mange ceke.​—Yob 33:4.