Niai ma a nyathin, wakwo ku junyodo para ceng’ini kud adhura mi Leipzig, i Allemagne (niwacu Germany) ma yo Reto, bor ungo ku mupaka ku ng’om mi République tchèque man ke Pologne. Saa ma oro para doko abusiel, tic pa baba uketho wadok i ng’om mange; walar wadok i Brésil, i ng’eye ke i Équateur.

Kinde ma oro para tie 14, junyodo para gidwoka i Internat moko i Allemagne. Calu ma gibino i Amerika ma yo piny, bor ku kaka ma an’i iye, abed arembo kwo para gira. E acaku dieng’ kwa pira gira. Abed adieng’ ungo nyanok de pi matoke ma timo para copo bedo ko iwi jumange.

Saa m’adoko ku oro 17, junyodo para gidok i Allemagne. I acaki, wabed wakwo karacelo kugi. Re calu m’agam ang’iyo hai nikwo i wiya gira, anwang’u nia nibedo yofwa tie lembe ma tek dit ira. Saa ma oro para doko 18, apiey ku yofwa.

Acaku pimo kit lembe ma tung’ tung’, ma re zoo abeyenyo ko kwo mandha, ento lembe m’ubino rombo aromba ira de mbe. Apimo kit kwo dupa, man amondo bende i ungu ma tung’ tung’ mi dhanu, e anwang’u nia gin ma ber m’acopo timo i kwo para utie nikewotho i gund ng’om zoo, man nineno leng’o pa ng’ombe ma fodi dhanu unyothe ngo.

Pieno ang’iewo moto man aweko Allemagne, adhure i Afrika. Ento nindo ma nok i ng’eye, adwogo i Europe pi niyiko moto para. Awok agalu nindo ma nok kende ci, i ng’eye acidho i dhu wat moko i Portugal. Anwang’u nia kwayu awek moto keca, acak wotho ku meli.

Acidh amondo i kind ungu mir aradu moko ma gibino yikiri pi nikadhu nam Atlantik. I kindgi, awok arombo ku dhaku m’adog agamu, nyinge Laurie. Wacaku woth mwa i cula mir Antilles. Saa ma wawok i Porto Rico, wabedo nindo ma nok keca, i ng’eye ke wadwogo i Europe. Waku Laurie wamito wanwang’ nyathi yei moko ma tie ku bongune i wiye, ma wacopo dwoko ni yei mwa mi nambu. Re i ng’ei ma wasayu yei maeno pi dwi adek kende ci, lembene wang’; julwong’a i tic mir askari.

Atimo tic mir askari pi dwi 15; wabedo juaskari ma timo iwi nam. I kind nindo maeno, anyomo Laurie man wacaku yikara pi kwo mi wotho. Nwang’u nyanok i wang’ caku tic mir askari, walar wang’iewo yei moko ma jubed jutwiyo i the wadi. Kud i kind tic para mir askari, wawotho yike nok nok nitundo edoko nyathi yei ma jucopo twiyo bongu i wiye. Lembakeca mwa ubino nia wabikwo i yeine, nwang’u wawotho neno ko ng’om ku piny ma beco m’i iye. Tap i saa maeno re ma warombo ku Jumulembe pa Yehova man wacaku ponjo Biblia. Nwang’u fodi aai aweko tic mir askari aweka, man fodi wadaru de ngo tic i kum yei mwa.

Ku kwong’a, anwang’u nia gin moko ma hai umbe m’acopo loko i kwo para. Adaru gamu dhaku ma wabekwo kude, man aweko madhu taba de. (Juefeso 5:5) Pi wotho mwa ma wapangu nia waciliewo ng’om zoo ke, aparu nia eno ubino lembe ma cuu magwei, kum wabitiyo ku saa mwa ma lee zoo pi nineno giracwiya pa Mungu ma wang’u ijo.

Ento i andha, ugam ukwayu atim alokaloka, asagane i kura para. Kuhaya mi kuma ubino yiro, man abino atek akenda; ageno bodho m’atie ko lee dit, man abed aparu kwa pi gin m’adaru timo. Abed adieng’ kwa pira gira.

Nindo moko, abedo somo lembe ma Yesu uyero i ponji pare m’i wi got. (Matayo thek 5-7) I acaki, akeaparu kpe nia Yesu ubeweco iwi kit mutoro ma nenedi. Ku lapor, eyero nia ju ma kec ubenego ku ju ma rieu ubenego re ma gi jumutoro. (Matayo 5:6) E apenjara nia ng’atu ma tie ku yeny mi piny moko copo bedo jamutoro nenedi? Kinde m’abemedara ku ponji para, anyang’ nia karaman wan ceke watie ku yeny i thenge mi tipo, niwacu yeny mi lembe pa Mungu; re i wang’ nipong’o yeny maeno, ukwayu mi kwong’o walar wajwigara, man wayii nia andha watie ku yenyne. Yesu uyero kumae: “Mutoro ni ju ma ging’eyo yeny migi mi tipo.”​—Matayo 5:3.

Wacaku ponjo Biblia i Allemagne; i ng’eye, waku Laurie wadok i France, i ng’eye ke i Italie. Kakare ceke ma wadok i iye wawok wanwang’u Jumulembe pa Yehova. Kite ma gimer ko i kindgi man bedo i acel migi utelo nen para lee akeca. Aneno nia andha Jumulembe pa Yehova mi ng’om zoo gitie wat acel. (Yohana 13:34, 35) I ng’eye, waku Laurie zoo walimo batizo man wadoko Jumulembe pa Yehova.

I ng’ei batizo, amedara asu niloko kura para. Waku Laurie wang’iyo nia wamak yei walor ku dhu wat mir Afrika, i ng’eye ke wakadh nam Atlantik, man wadok i États-Unis. E wacidho; kinde ma wan’i die nam, ma watie wan ario nyang’wi i yei, pii ke tiekowa tingili gunde de ubenen ngo, saa maeno kan afonyang’ nia karaman atie gin moko de ngo i wang’ Jacwic mwa ma Dit. Calu ma wabino ku saa lee (kum iwi nam lembe ma hai ma wabino timo de mbe), amiyara zoo i somo Biblia. Gin m’umulo adundena akeca ubino lembe ma Biblia ukoro iwi kwo pa Yesu. Ebino ng’atu m’umbe ku dubo, man ebino ku copo m’usagu para swa, re eting’ere ngo iwi jumange. edieng’ ungo pi yeny pare gire, ento pa Won mi polo.

Saa m’abeparu lembe kilili iwi lapor pa Yesu, aneno nia ubekwayu aketh Ker pa Mungu i kabedo ma kwong’a i kwo para, kakare niketho lembe m’apangu re m’utel yo. (Matayo 6:33) E kinde ma waku Laurie wanyono États-Unis ci, wamaku yub nia kwayu wabed kuca man waketh timo ni Mungu i kabedo ma kwong’a.

Con ma nwang’u fodi atimo cwinya ca, abed amaku yub swa, ma saa moko ang’eyo ngo nia etie cuu kunoke ngo de. Re kawoni dong’ atie kud ukungu mandha mi rieko m’ubetelo wiya. (Isaya 48:17, 18) Anwang’u bende gin m’acikara nitimo i kwo para, niwacu timo ni Mungu man nikonyo dhanu mange ging’eye.

Calu ma waku Laurie wabetiyo ku cik mir ukungu mi Biblia i kwo mwa, gamiri mwa ucungo nging’ nging’. Mungu miyo iwa bende nyathi nyaku ma leng’, man wafoyo dit nineno nia emaru Yehova.

I andha re, kwo mwa upoto ngo kwa ve pambu. Ento ku kony pa Yehova, wakeco nia wabivoc ungo man wabiweko ngo nigene.​—Lembrieko 3:5, 6.