Cameron: Atie kud anyong’a nineni kendo Jon. Abed amaru lee dit theng ponji mwa ma kubang’ yenga. * In ke idog ibedo nenedi?

Jon: An de abedo ma ber, afoyo.

Cameron: Atie kud anyong’a nia itie ma ber. Nindo m’ukadhu kinde m’abino keni, waneno nia pirang’o Jumulembe pa Yehova giyero nia Ker pa Mungu ucaku nibimo i oro 1914. * Kinde ma wabino weco, wanwang’u lembe moko ma pigi tek m’unyutho lembuno, i lembila ma n’i buku pa Daniel thek 4. Nyo ibepoy iwi lembe ma jukiewo i iye?

Jon: Ubino lek p’ubimo Nebukadnezar m’eleko pi yen moko ma dit.

Cameron: Eyo, tie eno tap. I lek ma Nebukadnezar uleko, eneno yen moko ma dit m’udongo nitundo i polo. Bende ewinjo jaor pa Mungu ung’olo nia jung’ond yen ne cen, ento juwek cudhone man ulage i ng’om. Man i ng’ei “nindo abiro” yen ne bidotwi kendo. * Waneno bende nia pirang’o lembilane upong’o i yo ario ma tung’ tung’. Nyo ipoy pi pong’o pa lembilane ma kwong’a?

Jon: Eyo, ubino lembe m’utimere ni Nebukadnezar en gire, kumeno ngo? Wiye ugam unyothere pi nindo abiro.

Cameron: Tap. Wi Nebukadnezar ukeunyothere pi kare moko; pieno, ker pare ukeujik. Ento i pong’o pa lembilane mir ario, bimobim pa Mungu de uke ukejik pi kare moko ma romo nindo abiro. Calu ma waneno, nindo abiro maeno ucaku i kum nyoth mi Yeruzalem i oro 607 W.N.Y. Niai eca ci, ker moko mbe ma dong’ ucungo iwi ng’om kakar bimobim pa Mungu iwi dhanu. Ento re, i ajiki mi nindo abiro eno, ukwayu Mungu uketh Jabim ma nyen iwi dhanu pare, niwacu ng’atu moko i polo. I ayi ma kucelo, wacopo yero nia, thum pa nindo abiro bibedo acaki mi bimobim mi Ker pa Mungu i polo. Dong’ wadaru weco nia, nindo abirone ucaku awene. Dong’ kawoni wakenen nia nindo abirone umaku oro ma rukani, kan ing’eye wabing’eyo nia Ker pa Mungu ucaku nibimo niai awene. Nyo nitundo keni inyang’ ma beri?

Jon: Eyo, nyathi lembe m’idog ikorono uketho wiya ubepoy ma ber.

Cameron: Ber dit. Dong’ wacaki wec mwa man wanen asagane nia nindo abiro utimo oro ma rukani. Nwang’u fodi aai adaru de ndhu adara nisomo lembe iwi paru maeni pi nipoyo wiya i kum lembe ma dongo dongo. Abi ii nikorogi i kadhiri m’acopo.

Jon: Ber.

Cameron: I pong’o pa lembila ma kwong’a m’ugwaku kum Nebukadnezar, nindo abiro utimo de oro abiro. Ento i pong’o pa lembilane mir ario m’ugwaku kum bimobim pa Mungu, nindo abiro ucikere nitimo oro ma lee nisagu oro abiro.

Jon: Pirang’o ecikere nikadhu ke?

Cameron: Pi thelembe mae: Poy nia nindo abiro ucaku kinde ma junyotho Yeruzalem i oro 607 W.N.Y. Pieno, ka wacaku kwanu oro abiro niai eca, eno bikelowa i 600 W.N.Y. Ento gin moko mbe m’utimere i oro maeno m’ugwaku kum Ker pa Mungu. Bende calu ma waneno i thenge mi wang’e, oro dak ma swa i ng’eye kinde ma Yesu ubino iwi ng’om, enyutho nia fodi nindo abirone uthum ungo.

Jon: Aa, eyo eyo. Kawoni abepoy iwi lembene.

Cameron: Pieno, kakare ma nia waweci iwi oro abiro kende, nindo abiro ucikere nimaku oro ma lee dit.

Jon: Emaku oro ma rukani ke?

Cameron: Buku mi Lembanyutha, ma de utie ku winjiri ma ceng’ini ku buku pa Daniel, bikonyowa ning’eyo ka nia nindo abirone umaku kare ma rukani tap. Eweco pi nindo adek ku nusu m’umaku nindo 1 260. * Niwacu nindo abiro bimondo wang’ ario i nindo adek ku nusu, ma eno ke bitimo nindo 2 520. Nyo wawinjara?

Jon: Eyo, abewinji ma ber. Re abeneno ngo ka lembuni ubenyutho nia Ker pa Mungu ucaku bimo i oro 1914.

Cameron: Oke, dong’ wakenen winjiri ma n’i kindgi. I lembila moko m’i Biblia, nindo acel utie oro acel. * Tek watiyo ku cik maeno, ma nia nindo acel utie oro acel, e nwang’u nindo abiro ucikere nibedo oro 2 520. Tek wakwanu oro 2 520 niai oro 607 W.N.Y, eno kelowa nitundo i oro 1914. * I ayi maeno re ma wanwang’u nia oro 1914 utie ajiki mi nindo abiro, man acaki ma Yesu ucaku nibimo i iye calu Ubimo mi Ker pa Mungu. Bende, de niai i oro 1914, lembe ma dongo m’ubetimere iwi ng’om ugam ucaku, etie lembe ma kadok Biblia de ular uyero nia bitimere i kajik ceng’.

Jon: Kit lembe ma nenedi?

Cameron: Kenen lembe ma Yesu uyero, calku m’ekiewere ko i Matayo 24:7. Iwi lembe m’uneno saa m’ebicaku bimo ko i iye i polo, eyero kumae: “Kum thek bikiedo i kum thek, ker de i kum ker, man ndru ku digidi bibedo nuti i kabedo ma tung’ tung’.” Aparu ineno Yesu uweco iwi ndru ku digidi ma bibedo nuti i saane. Nyo ng’om eni udaru nwang’ere ngo ku lembe ma kumeno i kind oro dak acel m’ukadhu?

Jon: Eno lemandha ba.

Cameron: I giragora maeno, Yesu ular uyero nia lwiny de bibedo nuti i saa mi bedonuti pare calu Ubimo mi Ker pa Mungu. Man buku mi lembanyutha bende ular unyutho nia lwinyne bimaku ng’om zoo i saa mi kajik ceng’. * Nyo ibepoy ka nia lwiny ma kwong’a mi ng’om zoo ucaku awene?

Jon: Ubino i oro 1914, Oro ma rom ku m’iyero nia Yesu ucaku nibimo i iye. Nwang’u fodi i wang’e aneno ngo winjiri maeno.

Cameron: Ka wacoko dhu paru maenogi zoo karacelo, niwacu lembila m’uweco iwi nindo abiro, man bende lembila mange mi Biblia m’uweco iwi nindo mi kajik ceng’, e egam enen kamaleng’. Pieno, Jumulembe pa Yehova giyiyo ma jiji mbe nia Yesu ukacu nibimo calu Ubimo mi Ker pa Mungu i oro 1914; man nia kajik ceng’ de ucaku i oro ma rom eno. *

Jon: Re fodi asu wiya lero ngo cuu i kum lembuni zoo ba.

Cameron: Abenyang’ kudi cuu mandha. Calu m’alar ayero, ira de ugam ukwayu kare moko pi ninyang’ cuu i lembene. Ento ageno nia wec mwa ukonyi nineno nia kadok nwang’u jukiewo ngo thwolo thwolo i Biblia pi oro 1914 de, re inyang’ nia Jumulembe pa Yehova gijengo andha yic migi iwi oro maeno i Lembangora.

Jon: Eyo, iya de ubewang’ lii i kumwu pi lembene; kum kadok nwang’u iyer ang’o de, inyuthe bende nimakere ku Lembagora. Tie ngo paru mwu. Ento abepenjara nia pirang’o lembe tie tek kumeni. Pirang’o ke Mungu ular unyutho ngo iwa ter ter i Biblia nia oro 1914 bibedo oro ma Yesu bicaku nibimo i iye i polo?

Cameron: Eno tie penji ma ber mandha Jon. I andha lembe tie dupa dit ma jukoro ngo pigi thwolo thwolo i Lembagora. Dong’ pirang’o Mungu uketho jukiewo Biblia i ayi ma bikwayu nia dhanu utim kero pi ninyang’ i iye? Wabiweco iwi paru maeno kinde m’abidwogo niliewi macen.

Jon: Abifoyo lee dit.