Anyolara i Paddington, kabedo moko ma dhanu pong’ lee i iye i adhura mi Londres, i ng’om mir Angleterre. Wabed wakwo ku mama man nyimego para adek m’alubo ng’eigi. Nikum kong’o m’akeca ma baba ubed umadhu, wang’eye ber akeca ngo.

Kinde m’abino nyathin, mama uponja nia abed arwo kubang’ uthieno. Abino ku Biblia moko ma nyanok m’ubino ku buku pa Zaburi kende i iye, man abed apangu wer kara acopo wero lembe mi iye awera. I buku para moko, asomo lembe moko m’urwinyo ngo nyanok de kud i wiya, eyero kumae: “Nindo moko piny biru ngo.” Wec maeno ubed uketho anindo ngo, nwang’u abeparu kwa pi nindo m’ubino. Abed aparu nia ‘kwo mwa e copo bedo eni kende ngo.’ Bende, ‘Pirang’o an’i wi ng’omi?’ Abino mito ngo atho!

Agam amondo i lembe mir ajoga. Acaku pimo niweco ku ju m’utho, abed acidho iwi kabuli ku jurimba ma wasomo kugi man nineno filme ma nyayu lworo karacelo kugi. Wabed wanwang’u nia etie ber dit, re ebed enyayu bende lworo i iwa.

Adoko jajai nwang’u fodi oro para apar kende. Acaku madhu taba, i ng’eye edoko ira gin ma wekere ngo. I ng’ei kare, taba caku roma ngo, e acaku madhu njai. Kinde m’adoko ku oro 11, apodho bende i madhu kong’o. Kadok nwang’u abino mito ngo amadhe de, ento amare kende kende pilembe ebimera. Bende, amaru mizik man miel. Abed akoso ngo nambu man nicidho i nganda ku diewor. Abed akwalara nicidho i iye ku diewor man alar adwogo de nwang’u fodi piny ulero ngo. Calu urwonde kugweno nwang’u aol, wang’ ma pol abed acidho ngo i somo. Kan acidho de, kinde ma japonjo moko udaru ponji pare, nwang’u an abemadhu kong’o.

I oro m’adaru iye somo, anwang’u pwe ma kabang’e de mbe. Abino ng’eyo de ngo nia adoko jajai ma yerere ngo. Lembe maeno uturo cwiny mama ma rac mandha man ubed unyayu ng’eicwiny i iye. Nindo moko waloko dhogwa kude, e aweko yofwa cen. Pi nindo moko wabedo ku Tony ma tie jal m’abino weco ko man ebino rasta. Ebed etimo lembe dupa m’uturo cik, ebed elworo yath ma merojo man jung’eye nia etie ng’atu ma ng’oy ng’oy ma yerere ngo. Ndhundhu eca ci agam anwang’u mugisa, e kinde m’abino ku oro 16 kende ci, anyolo wodwa ma kayu.

Wang’ ma kwong’a m’arombo ku Jumulembe pa Yehova ubino i kabedo moko ma jucoko i iye dhu mego ma gibetungo awiya ma gigamiri ngo man awiya migine. Judongo m’i kabedo m’akwo i iye gimiyo ira kusika moko keca. Mego moko ario ma gitie Jumulembe pa Yehova gibed gibin giliewo nyaku moko de ma tie ku nyathin. Nindo acel an de amondo i wec migi. Abino mito ninyutho igi nia Jumulembe tie juvupo. Ento gidwoko wang’ penji para acel acel ma kumgi poto, gidwoke terere man gitiyo de ku Biblia. Bero ma ginyutho iwa, kite ma giweco ko kudwa yo utelo nen para lee dit. Pieno, an gira ayiyo niponjo Biblia kugi.

Ndhundhu nica, aponjo lembe moko kud Biblia m’uloko kwo para. Niai m’abino nyathin, abed alworo tho. Kawoni anwang’u lembe ma Yesu uponjo iwi cer! (Yohana 5:28, 29) Bende, aponjo nia Mungu dieng’ pira de. (1 Pethro 5:7) Wec ma nwang’ere i Yeremia 29:11 umulo adundena lee dit, giragorane yero kumae: “Kum ang’eyo pidoic m’aparu yor i beng’wu, Yehova wacu, pidoic mi kwiocwiny, man mi lem ma rac ungo, kara umi iwu genogen i kajik mu ma cen.” Acaku yiyo nia acopo bedo ku genogen mi kwo rondo ku rondo i Paradizo iwi ng’om.​—Zaburi 37:29.

Jumulembe pa Yehova ginyutho ira mer mandha. Kinde m’acidho wang’ ma kwong’a i coko migi, lembe ubino ber mandha man ve nia gin ceke gibelwong’a i bang’gi, gin ceke gibino dhanu ma ber mi tuko ngo! (Yohana 13:34, 35) Lembe maeno ukoc bor ku kite ma lembe ubed uwotho ko i kanisa m’abino i iye i wang’e. Jumulembe gijola m’umbe nidieng’ nia atie dhanu ma nenedi. Giweko ira saa, gidieng’ pira man gikonya bende ku lembe dupa. Acaku nwang’u nia atie i kind juruot moko ma dit man ma gimariri lee i kindgi.

Ponji para mi Biblia uketho anyang’ nia kwayu atim alokaloka lee i kwo para kara acak kwo nimakere ku cik mi kurajo ma Mungu uketho. Ebino ira lembe ma tek niweko madhu taba. Saa ma rom eno acaku nwang’u bende nia mizik moko medo ava mi madhu njai i kuma, pieno awilo mizik m’abed awinjo. Calu m’amito abed ma wiya lero, aweko nicidho i nambu man i ngandha ku diewor, kum kuca ebedo tek niceriri i kum mero. Acaku sayu jurimo ma nyen ma atelatela migi copo konya i kwo ma nyen m’acaku.​—Lembrieko 13:20.

Saa ma rom eno Tony bende ucaku ponjo Biblia ku Jumulembe pa Yehova. Kinde ma Jumulembe gibedwoko wang’ penji pare niai kud i Biblia, en de enwang’u nia gin m’eponjo tie lemandha. Etimo alokaloka ma lee i kwo pare: ewok kud i dilo mi rop m’ebino i iye, eweko nitimo lembe m’uturo cik man eweko nimadhu njai. Kara wanyay mutoro lee i Yehova, wanwang’u bende nia pire tie tek lee nia wawek kit kwo ma rac ma wabino ko man waketh wiwa i kum tungo wodwa. Wagamara i oro 1982.

Apoy pi kite m’abed akeyo ko i gazeti Otkur ma Wiw man Cew! (Réveillez-vous!) * pi nisayu thiwiwec m’ukoro pi dhanu ma gigam gitimo alokaloka ma an de abino mito nitimo. Lapor migi umiyo amora lee i kuma! Eno umiyo kero i kuma nia kwayu amedara ni ii m’umbe biweko cwinya utur. Abed akwayu Yehova nia timba kud eol kuda. Waku Tony walimo batizo pi nidoko Jumulembe pa Yehova i dwi mir abiro 1982.

Nitimo kero pi nibedo jarimb Yehova ubodho kwo para. Waku Tony waneno bende kite ma Yehova ukonyo kowa i saa mi peko. Waponjo ninjengara zoo iwi Mungu i saa mi peko, man wanwang’u nia saa ceke ebekonyowa man ebepong’o yeny mwa.​—Zaburi 55:22.

Abino ku mutoro lee nikonyo wodwa man nyaku mwa kara gin de ging’ey Yehova calu m’ang’eye. Kawoni atie bende ku mutoro ma rom kinde m’aneno awiya migi de gibedongo ma dong’ ging’eyo Mungu.

Dong’ apidacwiny pi nindo m’ubino man lworo pa tho lalu ngo nindo i wang’a ku diewor. Waku Tony kubang’ yenga nwang’u wabeliewo cokiri ma tung’ tung’ mi Jumulembe pa Yehova pi nimiyo amora i kum umego ku nyimego. Wabed warweyo kugi lembanyong’a ni dhanu nia ka gitie ku yiyoyic i Yesu, gin de gicopo nwang’u kwo ma rondo ku rondo.