Anyolara i pacu moko mi Saxony, i ng’om ma con jubed julwong’o République démocratique allemande (RDA). Yofwa, lembe ceke ubino yaw yaw man ku mer; bende, junyodo para giponja nibedo ku kura ma ber. RDA ubino ng’om ma cik m’i iye ubino nia judik dhu piny ceke adika ma pa ng’atini gire umbe, eno uketho ni dhanu ma pol mi Saxony, pi dini ubino tek akeca ngo. Ira an lundo, ayiyo nia Mungu mbe. Niai m’anyathin nitundo m’adoko ku oro 18, lembe ario ubino kud atelatela lee iwi kwo para: yic ma nia Mungu mbe man paru mi bedo ku piny ceke adika.

Pirang’o paru mi bedo ku piny ceke adika uwok ber dit ira? Pilembe agam amaru dit paru ma nia dhanu ceke rom. M’umedo maeno, agam ayiyo nia ka nwang’u piny ceke ma jubedo ko jupoko iye i atira, eno copo cero nia jumoko kud ulony nisagu ma ke jumange lundo tie jucan. E agam aroyara ndruk i dikiri moko mir aradu ma cwaku bedo ku piny ceke adika. Kinde m’adoko ku oro 14, pi saa ma pol abed atimo tic m’uneno yiko karatasi m’unyothere pi nigwoko leng’o mi kabedo ma jukwo i iye. Calu abed amiyara lee i lembene, judongo mir adhura mir Aue gifoya lee dit uketho githena ku mic mi yung pi tic parane. Kadok nwang’u podi abino nyathin de, re agam ang’eyara ku judongo mi gamba ker mi RDA. Agam acaku nwang’u nia abelubo lembakeca m’atira man nia anyim para bibedo miero.

Re rek kumeni ci, genogen para zoo ugam upodho. I oro 1989, Gang’ mi Berlin ugam urwombere; i saa ma rom eno, ther ungu mi ju m’ubino ku paru mi bedo ku piny ceke adika mi theng Europe ma yo Nyangu de utho. Peko ubino wok wi wagi wi wagi. E ndhundhu eca, agam anyang’ nia kara lem ma reco uromo RDA ve nindo. Ku lapor, jubed jukwanu anyoli moko ci m’i ng’ombe m’ubino cwaku ngo paru mi bedo ku piny ceke adika ni dhanu ma swa man jubed jutime bende yangayanga. Abed apenjara nia pirang’o re kumeni? Si wan ma wayero nia jubed ku piny ceke adika wayiyo nia dhanu ceke romi? Paru mi bedo ku piny ceke adika e re utie ndhu lek kumeni? E ang’abacwiny ma lee ugam umondo i iya.

Pieno, agam awilo lembakeca para, e alund aroyo wiya zoo i kum lemb bodho mi mizik. Niai eca ci, amondo i somo mi mizik ku paru ma nia acopo cidho kadok i iniversite, abino paru nia abiketho bodho mi goyo mizik ni tic para ma zoo. M’umedo maeno, aweko kura ma beco ma juponja ko kinde ma nwang’u podi a nyathin. Kawoni, gin ma pire doko tek i iya nisagu ubino lembe ma royo mutoro i kwo pa ng’atini, m’uketho i iye niloko ju manyir aloka. Ento ebed mizik, kadok bodho m’aponjo, kadi kwo maeno mi bedagonya, ukwiyo ngo lak ang’abacwiny para nyanok de. Bir cal ma tung’ tung’ m’abed akubo de ubino nyutho kwa lworo ma yawe mbe. Acaku penjara kumae: Anyim para bibedo nenedi? Thelembe mi kwo utie ang’o?

Man i ng’eye, kinde m’anwang’u dwokowang’ penji m’abino besayu kpe, lembe ne uzunga zung mi tuko ngo. Nindo acel kud i iniversite, wabedo kud ungu mir awiya kalasi wada moko ma wabewo iwi anyim. Nyaku acel m’i kindgi ma nyinge Mandy *, ubino bende Jamulembe pa Yehova. Reto ma cing’ nica, emiyo ira juk moko ma ber mandha. Ewacu kumae: “Andreas, tek ibemito nwang’u jibu mi penji peri ma tung’ tung’ iwi kwo man iwi nindo m’ubino, keponj Biblia aketha cwinyi.”

Akeayiyo ngo lembene kud adundena ceke, ento pi penji para ma tung’ tung’, agam afoyo niponjo Biblia. Mandy utelo nen para iwi Daniel thek 2 man alund azungo zung mi tuko ngo gin m’asomo i iye. Lembibila maeni uyeko ayeka pi kwond bimobim ma dongo ma bibimo wi ng’om ngung’ nitundo i nindo mwa eni. Mandy unyutho ira lembila mange de dupa m’uweco iwi kwo mi nindo m’ubino. E acaku nwang’u jibu mi penji para ma tung’ tung’! I andha re, ng’a dhe m’ukiewo lembila maeni, man ke, ng’a dhe ma copo yero pi lembe mi nindo m’ubino tap tap kumeni? Eni to nyo Mungu unuti andha ba?

Pi nikonya anyang’ ma ber mandha i Lembe pa Mungu, Mandy ugam udwoko ponji para i cing Horst giku min ot pare Angelika, ma gitie Jumulembe pa Yehova. E m’umbe galu, anyang’ nia Jumulembe pa Yehova kendgi re ma gitie dini m’ubetiyo cuu mandha ku nying’ ma segi pa Mungu, niwacu Yehova man gibekonyo dhanu ung’eye (Zaburi 83:18; Matayo 6:9) Agam aponjo nia, Yehova Mungu umiyo genogen mi kwo rondo ku rondo i paradizo iwi ngom ni kwond dhanu ceke. Zaburi mi 37:9 uwacu kumae: “Ju m’ukuro Yehova, bicamu ng’om ni aba.” Gin m’ugam utelo nen para ubino nia, dhanu ceke ma gibetimo tego nikwo nimakere ku cik pa Mungu mi kurajo ma jukoro pire i Biblia re ma genogen maeni utiye migi.

Pieno, agam atimo kero niloko kit kwo para kara akwo nimakere ku lembe ma Biblia ubekwayu. Calu m’adwogi ma ber i lemb bodho mi mizik udwoka jakuhaya, pieno, mi kwong’o zoo, abino ku yeny mi ponjo nikwo ku jwigiri. M’umedo maeno, niweko kit kwo ma reco m’abino ko ubino yot ungo nyanok de. Abefoyo Yehova lee dit pilmbe enyutho cirocir, kisa, man enyang’ ku dhanu ceke ma gibetegiri nitiyo ku gin ma Biblia ubeponjo i kwo migi!

M’abedongo, pi oro 18 mi kwo para zoo, aponjara i yic ma nia Mungu mbe man paru mi bedo ku piny ceke adika; re niai eca, Biblia uloko kwo para. Gin m’aponjo ugam ukabu cen ang’abacwiny m’abino ko iwi kwo mi nindo m’ubino man umiyo ira genogen i kwo. I oro 1993, alimo batizo m’adoko ko Jamulembe pa Yehova; man i oro 2000, wagamara ku Tabitha ma jayic mada ma won amora. Pi nikonyo jumange kara gitund ninyag’ i Biblia, watiyo ku saa mwa i ayi moko ci ma wacopo. I tic mi lembanyong’a, wabed warombo ku dhanu dupa ma kit kwo migi ma con ubino ve para, moko ubino acel mi weg paru mi bedo ku piny ceke adika man yic ma nia Mungu mbe. Kinde m’akonyogi kara ging’eyo Yehova, lembene miyo ira mutoro lee mandha.

Kinde m’acaku dikara ku Jumulembe pa Yehova, lembene uwok rac magwei i junyodo para. Kadok kumeno de, niai eca, gigam gicaku neno nia dikiri ku Jumulembe pa Yehova ubemiyo adwogi ma ber i kwo para. Pi kawono, mutoro para dong utie nia, junyodo parane de, gibed gisomo Biblia man gicidho i coko ma tung’ tung’ Jumulembe pa Yehova.

Waku Tabitha wabekwo ku mutoro i gamiri mwa pilembe wabeii nilubo kilili mandha juk ma Biblia umiyo ni ju m’ugamiri. Ku lapor, gin m’ubemedere nimiyo tego i gamiri mwa utie nitiyo ku juk m’uneno gwokobedoleng’ i kind nico ku dhaku.​—Juebrania 13:4.

Dong’ ambe ku lworo i kwo para man ang’abacwiny ma pi nindo m’ubino. Abenwang’u nia, atie i kind juruot acel mi ng’om ngung’ mi juyic ma gitie ku kwiyocwiny mandha i kindgi man bedo i acel. I kind juruot maeni, ng’atu m’usagu wadi mbe. Eni tie gin m’agam amaru lee mandha man m’aii nia atund i kume i kwo para zoo.