Juyiko nyathibuku Winj Mungu, pi nikonyo dhanu ma gitie ku peko mi somo piny, kara giponj lemandha mir ukungu mi Biblia nikadhu kud i cal (fotho). Kubang’ ponjiman umaku mbaya ario, man utie ku cal ma juyiko maber man ayi mir athero ma konyo jo i saa mi ponji mi Biblia nidak niai i cal acel nicidho i cal m’ulubo.

Nyathibuku Winj Mungu kara I Kwo Rondo ku Rondo utie kud ayi cal marom ku nyathibuku Winj Mungu, ento jukiewo lembe lee i ie man juromo tio kude pi dhanu moko ma gitie ku nyathi copo moko mi somo piny. Wang’ ma pol umego ku nyimego gibed gimaru nitio kude ma nwang’u ju ma gibeponjo kugi Biblia ubetio ku Winj Mungu. Mbaya ma pol utie ku sanduku man lembe mange dupa ma juromo tio ko i saa mi ponji mi Biblia, nimakere ku copo pa ng’atu ma wubeponjo kude Biblia.

Juromo mio ni dhanu nyithibuku ario eno saa ceke i lembanyong’a, kadok nwang’u julonde ngo ikind girasoma ma jubimio ni dhanu i kind dwi de. Kinde m’ibetelo wi ponji mi Biblia, tii ku cal ma tung’ tung’ pi niketho peko iwi lembe ma Biblia ukoro. Penj penji ma romo ketho ng’atu m’ibeponjo kude Biblia udikere bende i wec man ma romo ketho ineno nia ebenyang’. Wusom man wuwec iwi giragora ceke mi the mbaya. Ka wudaru nyathibukune, wucak ponjo buku Qu’enseigne réellement la Bible? kunoke Biblia ubeponjowa ku lembang’o? pi nikonye nitundo elim batizo.