KWO MI JUKRISTU
Kud ipodh i uwic ma jukwanu e, kinde m’ibetelo wi ponji mi Biblia
Niweco lee akeca: Kud ipar nia icikiri nikoro lembe ceke acel acel. Yesu ubed utio ku penji pi nikonyo juwinj pare kara gipar i lembe, man gitund ninwang’u gin gigi dwokowang’ lembe ma tap. (Mat 17:24-27) Penji ketho ng’atu m’ibeponjo kude Biblia nyang’ maber, man ekonyi ning’eyo lembe m’ebenyang’ i ie man m’ebeyio. (be-F mba. 253 udu. 3-4) Kan ipenje ku penji moko, bed ku cirorocir man ikur edwok wang’ penjine. Kan edwoko lembe vii, penje i kite mange pi nitere enwang’ dwokowang’ lembe ma tap kakare nidwoko wang’ lembene in giri. (be-F mba. 238 udu. 1-2) Wec yoo maber i kite ma copo ketho ng’atu m’ibeponjo kude umak paru manyen.
Royo lembe dupa i ponji: Kud ikor lembe ceke m’ing’eyo iwi lembe ma wubeponjo. (Yoh 16:12) Keth peko iwi lembe ma pire tek ma nwang’ere i udukuwec. (be-F mba. 226 udu. 4-5) Nikoro lembe dupa, kadok nwang’u gitie lembe ma cuu de, copo ketho junyang’ ungo i lembe ma pigi tek. (be-F mba. 235 udu. 3) Ka japonj Biblia udaru ninyang’ i lembe ma pire tek, kadh i udukuwec m’ulubo.
Rewo ponji arewa: Lembakeca mwa tie niketho ponji umul adunde ng’atini, tie ngo nikadhu pio pio ku wi lembe. (Lk 24:32) Keth wii ikum lembagora ma pigi tek ma junyutho, pi nimio tego ni lembe pa Mungu. (2Kor 10:4; Ebr 4:12; be-F mba. 144 udu. 1-3) Tii ku lapor ma yot. (be-F mba. 245 udu. 2-4) Ng’ei lembe ma japonj Biblia utie ku peko mi nyang’ i ie, ku yioyic pare, man keth ponji uromb ku lembe parene. Penje ku penji ma calu ve: “Paru peri tie ang’o iwi lembe maeni m’ibeponjo?” “Lembuni ubeponji ku lembang’o iwi Yehova?” “Bero makani m’icopo ninwang’u kan ibetio ku juk maeni?”