PIRANG’O PIRE TIE TEK NITIMO KUMENO: Ka ju ma waponjo kugi Biblia giyikiri, gicopo ninyang’ cuu man nipoi yot yot i kum gin ma wabeponjo igi. Kinde ma gibenyang’ cuu man gibepoi i kum gin ma gibeponjo, gibitimo mediri de pio pio. Kadok i ng’ei batizo, bibekwayu giyikiri pi coko man pi tic mi rweyo lembanyong’a kara gimediri ‘nikiyo’. (Mt 25:13) Pieno, ka ging’eyo kite mi timo ponji man gitie ku ng’iyo ma ber mi ponji, eno bikonyogi i kwo migi zoo. Dong’ wang’ ma kwong’a ma wabecaku ponjo Biblia ku ng’atini, ubekwayu wakonye ndhu ndhu ebed ku ng’iyo ma ber mi yiko ponji mi Biblia.

KITE MA JUROMO TIMO KO:

• Bed lapor ma ber. (Rm 2:21) Yik ponji nimakere ku yeny pa ng’atuman m’ibeponjo kude Biblia. (km 11/15 mba. 3) Keth enen i buku peri m’idaru riedo ie

• Mii amora i kume ebed eyikere. Yor i acaki, keth ng’atu m’iponjo kude ung’ei nia niponjo Biblia uketho i ie bende nilar yiko ponjine, man nyuth ire bero mi yiko ponji. Nyuth ire kite m’ecopo nwang’u ko saa mi yiko ponji. Jurwei moko gibed gimio buku migi ma gidaru riedo ie ni ju ma giponjo kugi Biblia kara gitii kude i saa mi ponji pi nikonyogi ginen bero mi lar yiko ponji i wang’e. Ka ng’atu m’iponjo kude Biblia uyiko ponji, foye

• Nyuth ire kite m’ecopo yiko ko. Jurwei moko, kinde ma gibecaku ponjo Biblia acaka ku ng’atini, giyiko ponji karacelo ku ng’atune pi ninyutho ire kite m’ecopo beyiko ko ponji