Coko ma dit mir adhura mi oro 2020 ubino segi mi tuko ngo; kum ebino coko mwa ma kwong’a ma jumaku lembe m’i iye zoo amaka man jukethe i Internet! Kadok kumeno de, i ng’om mi Malawi man mi Mozambique, umego ku nyimego mwa ma dupa gilubo cokone m’umbe nitiyo kud Internet. Lembuno ucopere nenedi?

 I yore moko ma segi, Komite mi jutel wi tic man mi ponji mi Guriri m’utelowic uyiyo nia juketh cokone ukadhi i thelevizio man i radio m’i ng’om mi Malawi man mi Mozambique. Pirang’o yub ma segi maeno pire ubino teki? Malawi utie acel m’i kind ng’om ma bei mi mega mir Internet utie tek lee magwei i iye. M’umedo maeno, Jumulembe pa Yehova ma wendgi nok re ma gitiye ku kare mi tiyo kud Internet. William Chumbi, ma tie acel m’i kind umego ma timo i Komite mi Bethel mi Malawi, ukoro kumae: “Radio ku thelevizio kende re m’ubino yore m’umego ku nyimego mwa ginwang’u ko kare mi lubo coko ma dit maeno mir adhura.” Luka Sibeko, ma timo de i Komite mi Bethel mi Malawi ulund umedo kumae: “Ka nwang’u walubo ngo cokone kud i TV man radio, nwang’u wend umego ku nyimego ma nyanok kende re ma ginwang’u bero mi coko ma dit mir adhura maeno.” I ng’om mi Mozambique bende, m’uweko peko mir Internet, umego ku nyimego ma nyanok kende re ma gicopo ning’iewo jamtic mir elektronik m’ukwayere pi nilubo coko maeno.

 Nikum thong’om mi Korona, thelevizio ku radio moko nwang’u dong’ ucaku beketho program mi coko mwa ma kubang’ yenga ukadh i igi. a Umego mwa gicidh giweco ku weg cuma maeno man gikwayugi nia gimed igi saa mange pi niketho program mi coko ma dit mir adhura de ukadhi.

 I ng’om mi Malawi, umego mwa ginwang’iri i wang’ peko moko. Wang’ ma pol, ka dhanu moko gikwayu nia program migi ukadh i thelevizio kunoke i radio, jumiyo igi saa acel kende; pilembe weg cuma eno gibed gilworo nia program ma boco akeca binyang’u ngo juwinj migi. Ento umego gikoro nia tic mwa konyo lwak dhanu zoo. Kadok kinde ma dhanu ubed urombo ngo i kindgi de, watielo cwiny dhanu ku lembanyong’a mi Biblia ma romo konyogi gibed ni lwak ma ber man juruot m’utie kud anyong’a. Kinde ma giwinjo lembuno, weg cuma eno giyiyo nimedo saa mi program ni umego mwa.

 I ng’om mi Malawi, julubo coko ma dit mir adhura nikadhu kud i thelevizio acel man studio mi radio de acel; gin zoo gitie ku copo mi tundo i gund ng’ombe kpo; eno re m’uketho milioni mi dhanu ma kuca ceke romo lubo cokone. I ng’om mi Mozambique lundo, julubo coko ma dit mir adhura nikadhu kud i thelevizio acel man studio mi radio 85.

 I ng’om ario maeno zoo, pi niketho coko ma dit ukadhi ku yore mi thelevizio, jutiyo ku dolar 28227 b man kud i yore mi radio ke jutiyo ku dolar ma romo kago 20000. Kara programne ubed ukadh i radio ma thindho, beine ubed ucamu dolar ma niai 15, man ma pi radio ma winjere i ng’ombe zoo ke ubedo dolar 2777.

 Umego mwa gitimo tic ma tek mandha kara jutii ma ber ku giramiya maeno mi sente. Ku lapor, i ng’om mi Malawi, umego gibino ku copo mi piemo bei mi cuma maenogi kara elor nitundo i 30 wi dak. Bei maeno ma gipiemo ugwoko wend dolar 1711. I ng’om mi Mozambique lundo, weg cumane moko giyiyo nijwigo iwa bei pi rwongwa m’ubeyik ma ber kum watiyo i atira man wamiyo cul de i saa ma tap.

 Umego mwa gibino ku foyofoc ma lee dit pi nineno kunoke niwinjo coko ma dit mir adhura nikadhu kud i jamtic ma tung’ tung’. Jadit cokiri moko mi Malawi ma nyinge Patrick uyero kumae: “Wabedwoko foyofoc lee dit ni umego mi Guriri m’utelowic pir adieng’a m’athothi ma ginyutho iwa i saa mi thong’om maeni.” Bende, Isaac mi ng’om mi Malawi de uyero kumae: “Wabino mbe ku jamtic moko mange, pieno watie ku foyofoc ma lee dit pi cemo maeno ma segi mi dilo pa Yehova pi nilubo coko ma dit nikadhu kud i radio. Adwogi mi lembene ubino nia juruot para ceke ginwang’u bero mi coko ma dit maeno. Waneno kamaleng’ mer pa Yehova yor i bang’ dhanu pare.”

 Ni jarwey lembanyong’a moko acel mi ng’om mi Mozambique, coko ma dit mir adhura mi 2020 ubino ire coko ma kwong’a. Eyero kumae: “Yub mi neno coko ma dit nikadhu kud i TV upoyo wiya nia Yehova utie Mungu ma Jategokpo andha. Thong’om maeni ucere ngo nimiyo iwa cemo mi thenge mi tipo man emiye iwa de wang’ acel i ot mwa. Aneno andhandha mer i kind dhanu pa Yehova. Atie kud andha nia eni utie dini mandha.”

 Jadit cokiri moko ma nyinge Wyson uyero kumae: “Amito adwok foyofoc para ni jamiru mandha man ma riek pi kite m’egam edieng’ ko piwa i kind thong’om maeni. Yub maeno ma jumaku pi Kite ma Julubo ko coko ma dit mir adhura nikadhu kud i radio man TV ukonyo dhanu ma dupa m’i kindwa ma gibenyego ku peko mi nwang’u sente i theng ng’om maeni ma can lee i iye pi ninwang’u program man bero mi iye de.”

 I coko ma dit mir adhura mi oro 2021, Komite mi jutel wi tic ku Komite mi ponji gimaku kendo yub ma segi kara jucopo ketho cokone kadhu kud i thelevizio man kud i radio pi lwak dhanu moko. Dong’ watimo nenedi pi niculo pi programne kara ekadh i kite ma kumeno? Nikadhu kud i giramiya ma pi tic m’iwi ng’om zoo, ma m’i kindgi ma pol umiyere nikadhu kud i kite ma nwang’ere i donate.pr418.com. Wafoyo lee dit pi giramiya peri ma ku berocwiny.