MEDIRI NIKIYO!
Oro 2022: Oro mir ang’abacwiny—Biblia ke uyero ang’o?
I oro 2022, lembang’eya ma juweco akeca i wiye ubino asagane mi lwiny, peko mi sente, man mi nyoth mi cwic m’udhokowa. Biblia kende re m’ukoro thelembe m’anzilo m’uketho lembe enogi utimere.
Thelembe m’anzilo m’uketho lembe enogi utimere i 2022
Lembe m’utimere i oro maeni uketho wanyang’ andha nia wabekwo i nindo ma Biblia ulwong’o nia “kajik ceng’.” (2 Timoteo 3:1) Nindo maeno ucaku i oro 1914. Kenen ayi ma lembe m’utimere ceng’ini urombo ko ku gin ma Biblia ular uewo pire pi rundi mwa eni:
“Lwiny.”—Matayo 24:6.
“Oro 2022, ubino oro ma lwiny ukelo iye ndiri kendo i ng’om mir Europe.” a
Nen thiwiwec “Ng’om mi Russie umondo ma rac ku lwiny iwi ng’om mir Ukraine.”
“Ndru.”—Matayo 24:7.
“Oro 2022, utie oro ma kec upodho lee i iye nisagu m’i wang’e.” b
Nen thiwiwec “Lwiny i ng’om mir Ukraine unyayu peko mi cam i ng’om zoo.”
“Thong’om.”—Luka 21:11.
“Kinde ma twoyo mir arunga runga ubemedere man undier de ubemedere, korona de ulund ucaku jwero dhanu ma kisa mbe, uketho twoyo ma dak adaka unyay man tego mi dhanu tie nok i wang’e.” c
Nen thiwiwec “Dhanu milion 6 udaru tho ku korona.”
“Gin ma nyayu lworo.”—Luka 21:11.
“Lietho ma tek, oro m’uberieny, luli m’ubewang’, man pong’ pa pii. Jubiwil ungo kokoro i kum ceng’ m’urieny i oro 2022, pi nyoth dupa ma yamu ma tek m’uwotho lokere ukelo, m’uketho dhanu elufu swa utho, man m’uketho dhanu mange milioni dupa giweko kabedo migi i wang’ ng’om zoo.” d
Nen thiwiwec “Yamu m’udoko lieth nikadhu mukero i wang’ ng’om zoo.”
“Ali [kunoke “yakini,” kmt.].”—Luka 21:9.
“Yakini ma lwakdhanu unyayu pi peko mi sente, asagane pi bei piny m’uidho, uketho i oro 2022 junyutho jai lee nisagu i kum gavmenti.” e
Nen thiwiwec “Bei piny m’uidho i wang’ ng’om zoo.”
Oro macen ke bibino ku lembang’o?
Ng’atu moko mbe i kindwa ma copo yero tap tap gin ma bitimere iwa i oro 2023. Ento gin ma wang’eyo utie nia, ceng’ini eni Ker pa Mungu, niwacu bimobim m’i polo bikelo alokaloka iwi ng’om. (Daniel 2:44) Bimobim eno bikabu lembe ceke m’uketho dhanu ubeneno can, man ebiketho yeny pa Mungu re ma timere iwi ng’om.—Matayo 6:9, 10.
Wabekweyi iwor juk ma Yesu umiyo, man ‘ibed m’ibekiyo’ m’inen ko ayi ma lembe m’utimere i ng’om ubepong’o ko lembila m’i Biblia. (Marko 13:37) Pi ninyang’ lee iwi ayi ma Biblia copo konyi ko kawoni, man kite m’eromo miyo ko genogen mandha iri man ni juruot peri pi nindo m’ubino, wakweyi inwang’wa wa Jumulembe pa Yehova.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.