MEDIRI NIKIYO!
Thelembe mi bedo ku genogen i oro 2023—Biblia ke uyero ang’o?
Calu ma oro 2023 ucaku, wan ceke watie ku genogen nia lembe biwotho ma ber iwa man ni juruot mwa. Pirang’o ukwayu wabed ku nen ma ber pi nindo m’ubino?
Biblia ubemiyo genogen
Biblia utie ku lembanyong’a ma nia lembe ceke ma wabenwang’ara ko tin eni, utie pi nindo moko kende, man ke ceng’ini eni gibithum. I andha, “Lembagora [niwacu Biblia] ukiewere pi ponji mwa, kara ni kum. . . jukojuk ma wanwang’u i Lembagora, wabed ku genogen.”—Jurumi 15:4.
Pi ning’eyo lembe dupa iwi lembe ma Biblia ung’olo, som thiwiwec m’uwacu “Une espérance réelle pour des jours meilleurs.”
Genogen ma copo konyi tin eni
Genogen ma Biblia umiyo ubedo ve “nanga pi kwo mwa.” (Juebrania 6:19, korolembe mi there) Genogen maeno ketho wacungo nging’ nging’. Ecopo konyowa ninyego ku peko mwa tin, nibedo ku nen ma ber, man ninwang’u anyong’a ma galu. Ku lapor:
Nen kite ma genogen mi Biblia ukonyo ko ng’atu moko m’ubino nyego ku kit kwo mi meth. Nen video ma thiwiye uwacu Aol ku kit kwo para.
Nen kite ma genogen mi Biblia copo konyo kowa kinde ma ka ng’atu moko ma wamaru utho. Nen video ma thiwiye uwacu Du réconfort pour les endeuillés.
Keth genogen peri udok tek
Dhanu dupa gitie ku genogen nia lembe ma ber bitimere, re ging’eyo ngo nia lembene copo timere andha. Lembe ma Biblia ung’olo lundo tie tung’. Pirang’o? Pilembe lembang’ola ma nwang’ere i Biblia uai i bang’ Yehova a Mungu en gire. Etie Mungu “ma copo cwayu ndra ki ngo.” (Tito 1:2) Yehova kende re m’utie ku copo mi pong’o lembang’ola pare ceke; ‘gin ma tek nyayu mutoro i iye, etimo maeno.’—Zaburi 135:5, 6.
Wakweyi ku yaw yaw mandha nia inwang’ bero i kum genogen mandha ma Biblia ubemiyo. Icopo tielo genogen perine tek icuku ‘beng’iyo i Lembagora cuu’ (Tic mi Jukwenda 17:11) Nwang’ iri ponji mi Biblia ma waponjo ko dhanu mi mananu, man cak oro 2023 m’itie ku nen ma ber iwi geno lembe mi nindo m’ubino!
a Yehova tie nying’ Mungu ma dhe.—Zaburi 83:18.