Nyo ng’om ubecidho i ajikine?
Wec ma nia ng’om ubecidho i ajikine bemiyo iri paru ma kani? Saa moko nyo iparu pi lembe moko ma wok rek ma binyotho kwo ceke kud iwi ng’om. Jumoko paru nia ceng’ini eni ng’om binwang’ere ku kit lembe maeno, asagane ka gibesomo kit lembang’eya m’ulubo e:
“Lwiny mi bomb nucléaire—lwinyne jucopo tuge akakaka, i ayi ma rek, kunoke nikum winjiri m’umbe i kindjo.”—Bulletin of the Atomic Scientists.
“I kind oro apar m’ukadhu, lembe dupa ma nyotho ng’om utimere: Yamu ma tek, mac m’ubewang’u luli, ceng’ m’ubenyotho piny, uthwor m’ubenyothere i the pii, lietho ma tek, man pii m’ubepong’.”—National Geographic.
“Pi oro dupa, bonyo unyotho piny i ng’om mir Afrika.”—The Associated Press.
Nyo piny maeno re ma binyotho ng’om i nindo m’ubino? Biblia ke uyero ang’o?
Nyo ng’om maeni ma wawotho i wiye e re ma bijiki?
Ungo. Biblia Lembe pa Mungu uwacu kamaleng’ nia ng’om bibedo mi nja. (Eklizia 1:4) Kakare ma nia Mungu unyoth ng’om m’ecwiyo, ‘ebinyotho ju m’ubenyotho ng’om’—Lembanyutha 11:18.
Nyo ng’om ubecidho i ajikine?
Nimakere ku Biblia, “ng’om” ma bijik kunoke ma bithum utie dhanu ma giworo ngo telowic pa Mungu man ma gibetimo gin ma gimito gin gigi. Mungu binyotho ‘dhanu ma giwore ngo,’ tap calu m’egam etimo i rundi pa Noa.—2 Pethro 2:5; 3:7.
Calu ma 1 Yohana 2:17 uyero, “ng’om ubekadhu woko man awanya ma racne de.” Giragora eni ubenyutho kamaleng’ nia gin ma Mungu binyotho, utie ngo ng’om maeni ma wabedo i wiye, ento dhanu ma gibemediri nitimo lembe ma reco.
Ajikine bitundo awene?
Biblia unyutho ngo nindo ma tap m’ajiki bitundo i iye. (Matayo 24:36) Ento enyutho nia ajikine dong’ ni ceng’ni. Biblia ular uyero lembe ma e:
Lwiny, ndru, thong’om, man digidi ma dongo de bibedo nuti “i kabedo ma tung’ tung’.”—Matayo 24:3, 7, 14; Luka 21:10, 11; Lembanyutha 6:1-8.
Dhanu ma pol bidieng’ pigi gigi nisagu mukero. Ku lapor, gibibedo “jumar sente,” “ju ma dwoko ngo foyofoc,” man “ju ma kweriri gigi ngo.”—2 Timoteo 3:1-5.
Dhanu dupa giyiyo nia, niai i oro 1914, lembe m’ubetimere i ng’om urombo tap ku ma Biblia ular uweco pire man nia ajiki ni ceng’ini. Pi ninyang’ i lembe dupa, nen thiwiwec “Lembe ma Biblia uyero ubenyutho lembang’o iwi oro 1914?” man “Ang’o m’unyutho nia wabekwo i nindo mi ‘kajik ceng’i’”?
“Apocalypse” thelembene tie ang’o i Biblia?
I dhok mi Jugiriki, wec ma juloko nia “apocalypse” i Biblia mi dhok ma tung’ tung’, thelembene tie “niyabu wi piny ma juumo” kunoke “nigolo wiye.” Wang’ ma pol wec maeno nyutho pi lembe ma junwang’u ma nang’ upondo. Biblia uweco bende pi “lembanyutha [kunoke, apocalypse] pa Yesu Kristu” ma bitimere kinde Yesu binyotho jutim rac ceke ku wi ng’om man nimiyo mugisa ni ju ma gibeworo Mungu.—2 Juthesaloniki 1:6, 7; 1 Pethro 1:7, 13.
Buku ma tokcen mi Biblia julwong’o nia Apokalypsis (ku dhu Jugiriki), kunoke Lembanyutha, pilembe ebenyutho pi lembe mi nindo m’ubino. (Lembanyutha 1:1) Buku eno utie ku lembanyong’a man rwonglembe mi genogen. (Lembanyutha 1:3) Ebenyutho nia Mungu binyotho dhanu ceke ma reco man ebidwoko ng’om udok ni paradizo. Saa maeno dhanu biremo ngo, kadok masendi kadi tho de bibedo nuti kendo ngo.—Lembanyutha 21:3, 4.
Nyo imaru ing’ey lembe lee pi lembang’ola maeno ma wang’uijo mi Biblia? Jumulembe pa Yehova gitimo ponji mi Biblia ma copo konyi, ke ma nanu m’umbe cul. Nyo iromo nwang’ugi ngo kara gikonyi?