MEDIRI NIKIYO!
Ceng’ m’uberieny akeca nikadhu mukero—Biblia uyero ang’o pire?
“Rapor m’uai i Chine unyutho nia, oro maeni piny utie lieth ‘nisagu,’ man eni utie liethone mir adege ma nang’ fodi jutundo ngo i iye.”—The Guardian, Nindo 7, dwi mir 9, 2022.
“I ng’om mi gud Afrika ma yo nyangu (Corne de l’Afrique), fodi ceng’ m’uberieny akeca bimedere asu pi oro abic.”—UN News, Nindo 26, dwi mir 8, 2022.
“Ng’om ma tung’ tung’ 2 iwi 3 i ng’om mir Europe, udaru nwang’u atwong’a pi rieny pa ceng’ ma kumeno, ma copere i kind oro 500, ebibedo ni lembe ma rac m’usagu.”—BBC News, Nindo 23, dwi mir 8, 2022.
Jururieko dupa ular unyutho nia kit rieny pa ceng’ ma kumeno bimedere kadok nidoko rac magwei. Nyo genogen utie nia lembe biyikere i nindo m’ubino? Biblia ke uyero ang’o pi lembene?
Biblia ular uweco pi ceng’ m’uberieny akeca
Biblia ular yero nia i nindo mwa eni:
“Ndru . . . bibedo nuti i kabedo ma tung’ tung’.”—Luka 21:11.
Wang’ ma pol ka ceng’ uberieny akeca, lembene bolo ndru. Ndru ku masendi man tho ma ceng’ m’uberienyne ubekelo, ubepong’o lembila mi Biblia.—Lembanyutha 6:6, 8.
Pirang’o ceng’ uberieny akeca?
Biblia unyutho thelembe m’uketho ceng’ uberieny nikadhu mukero. Ewacu kumae:
“Telo wi dakutielo [pa ng’atini] mbe ba dhanu ma wotho.”—Yeremia 10:23.
Eno ubenyutho nia dhanu e copo telo ngo “wi dakutielo” migi cuu, kunoke nibimo wigi gigi ma ber. Yub ma rac ma gibemaku, re ma wang’ ma pol utie thelembe m’uketho ceng’ uberieny nikadhu mukero man ebebolo can pii.
Jururieko ma pol mi sians de giyiyo nia, lembe ma dhanu ubetimo re m’uketho ng’om ubedoko lieth man m’uketho ceng’ uberieny nikadhu m’uketho i wang’ ng’om zoo.
Kethocwiny hai i kum piny ku koso neno anyim, uketho dhanu uberwombo luli, gibenyotho ng’om, man gibetiyo rac kadok ku piny mi the ng’om. Lembene uketho pii de ubejwik.
Re Biblia ubemiyo iwa genogen.
Nyo genogen utie pi nindo m’ubino?
Biblia ung’olo nia Mungu bidaru peko mi can pii. Nenedi?
1. Mungu ‘binyotho ju m’ubenyotho ng’om.’ (Lembanyutha 11:18) Ebikabu ukungu lembe m’ubenyolo can pii, niwacu dhanu ma reco ma timo migi ubenyotho cwic m’udhokowa.—2 Timoteo 3:1, 2.
2. “Kwio m’urieny bidoko ni kut.” (Isaya 35:1, 6, 7) Mungu biyiko lembe ma reco ma ceng’ m’uberieny unyayu, man ebidwoko pii bidok kakare calu mi paradizo.
3. “Iliewo ng’om, man ikwoyo wie pi, idwoke mio hai.” (Zaburi 65:9) Mungu bikonjo mugisa pare, e ng’om bipong’ ku cam i iye man pii ma leng’ ni dhanu ceke.