I ng’om zoo, dhanu dupa ma giwacu nia gibelubo Yesu gimondo ndruk i lemgamba ker. Jumoko gi ii niyungo yiyoyic man cik mi kurajo mi dini migi ma nwang’u gibediko ko cing’gi ku ju m’ucungo nia jubol kwir i wigi kunoke ku theng lemgamba ma tung’ tung’. I thenge mange, judong gamba gitiyo ku yeny pa dhanu mi dini kara ginwang’ ju ma cwakugi i kind dhanune. Wang’ ma pol, judong dinine giroyo nyinggi kara jubol kwir i wigi. Bende i ng’om moko, ng’atu ma julwong’o “Jakristu” copo bedo ku dito moko ma segi i ng’omne man i dini de.

 Iparu nenedi? Nyo ukwayu julub pa Yesu Kristu gimond i lemgamba? Waromo nwang’u dwoko wang’ lembene nikadhu kud i lapor pa Yesu. Eyero kumae: “Aweko iwu lapor kara tap calu m’atimo iwu, wun de wutim kumeno.” (Yohana 13:15) Yesu uweko lapor ma kani iwi lemgamba keri?

 Ungo. Yesu umondo ngo i lemgamba mi ng’om.

 Yesu uparu de ngo pi lemdito mi gamba ker. Ekwero nidoko ubimo iwi bimobim mi dhanu kinde ma Sitani Wonabali unyutho ire “ker ceke mi ng’om.” (Matayo 4:8-10) a I saa moko, dhanu uneno nia Yesu utie ku copo mi bedo jabim ma ber, e gipimo nidiye nia emond i lemgamba. Biblia uyero kumae: “Kinde ma Yesu ung’eyo nia gibemito bino nimake kara gikethe ni ubimo, eai kendo man ecidho iwi got en kende.” (Yohana 6:15) Yesu utimo ngo gin ma dhanu ubino diye nia etim. Tung’ ku maeno, emondo ngo i lemgamba.

 Yesu udiko ngo cinge ku thenge moko ci mi lemgamba. Ku lapor i rundi pa Yesu, juyahudi gibed gifoyo ngo niculo palatha ni gavmenti mi Roma man gibed gineno lembene ni ter igi. Kinde ma gibino ii nicwalu Yesu udik cinge i lemgamba, emondo ngo i wec migi pi ninyutho ka nyo culo palatha kunoke ngo utie ber. Eyero igi kumae: “Wumii piny pa Kaisari ni Kaisari, ma pa Mungu ke ni Mungu.” (Marko 12:13-17) Emondo ngo i lemgamba, ento enyutho kamaleng’ nia palatha ma Kaisari niwacu gavmenti mi Roma ubekwayu, jucikiri niculo. I saa ma rom eno, enyutho nia woro judong ng’om de utie ku mupaka pare. Ng’atini ucikere ngo nimiyo woro m’uromo ku Mungu ni gavmenti, m’uketh’i iye thieriri man rwo ni Mungu.​—Matayo 4:10; 22:37, 38.

 Yesu udiko cinge man eponjo jumange iwi bimobim mi polo niwacu Ker pa Mungu. (Luka 4:43) Edikere ngo i lemgamba ker pilembe eng’eyo nia Ker pa Mungu re ma biketho yeny pa Mungu utimere iwi ng’om, ento gavmenti mi dhanu re ngo. (Matayo 6:10) Enyang’ nia Ker pa Mungu bibimo ngo i kind gavmenti mi dhanu, ento ebikabugi cen.​—Daniel 2:44.

 Ungo. Julub pa Yesu giworo lembang’ola pare m’eyero nia “wu mi ng’om ungo.” (Yohana 15:19) Gilubo lapor pare man gikoc bor ku lemgamba mi ng’om. (Yohana 17:16; 18:36) Kakare nimondo i lemgamba, gitimo tic ma Yesu ung’olo igi mi rweyo lembanyong’a man mi ponjo dhanu iwi Ker pa Mungu.​—Matayo 28:18-20; Tic mi Jukwenda 10:42.

 I kwo mi Jukristu mi rundi ma kwong’a, niworo Mungu ubino gin ma pire tek lee ento ging’eyo bende nia ukwayu giwor judong ng’om mi kaka ma gibekwo i iye. (Tic mi Jukwenda 5:29; 1 Pethro 2:13, 17) Gibed giworo cik man giculo palatha. (Jurumi 13:1, 7) Kadok gibed gimondo ngo i lemgamba de, re cik pa gavmenti ubed ugwokogi man tic pa gavmenti de gibed gitimo.​—Tic mi Jukwenda 25:10, 11; Jufilipi 1:7.

 Biblia unyutho kamaleng’ nia kadok Yesu ku Jukristu mi rundi ma kwong’a de gimondo ngo i lemgamba. Pi thelembe maeno, i wang’ ng’om zoo wa Jumulembe pa Yehova calu ma wa Jukristu, wauro nimondo i lemgamba moko ci. Tap calu Jukristu mi rundi ma kwong’a, gin de gitimo tic ma Yesu ung’olo niwacu girweyo “lembanyong’a mi Ker.”​—Matayo 24:14.