MEDIRI NIKIYO!
Biblia uyero ang’o pi dini man lwiny m’ubetimere i Ukraine?
Wakewec pi dini ma dongo mir Ukraine ku lwiny m’i ng’ombe:
“Patriarch Kirill ma tie jadit mi kanisa mi Orthodox i ng’om mi Russie uweco ngo rac pi lwiny ma Russie utugo. . . . Kanisa pare ubed umedere nimewo lembe mi vupo iwi ng’om mir Ukraine, man Putin de ubed utiyo ku vupo parene pi nicero bang’ lwiny.”—EUobserver, Nindo 7, dwi mir 3, 2022.
“Patriarch Kirill . . . ucero ku tego mandha ba lwiny ma Russie mondo ko i Ukraine, m’ewacu ko nia lwiny eno utie yo acel ma jubenyego ko i kum dubo.”—AP News, Nindo 8, dwi mir 3, 2022.
“Jatel wi kanisa mi Orthodox mir Ukraine, Métropolite Épiphane mi 1 mir adhura mi Kiev; umiyo mugisa iwi dhanu pare nia ‘gikied i dhu juaskari mi Russie m’umondo ku lwiny’ . . . Ekoro bende nia ninego juaskari mi Russie utie ngo dubo.”—Jerusalem Post, Nindo 16, dwi mir 3, 2022.
“Wan [UCCRO], wabediko cingwa i kum udul mony mir Ukraine karacelo ku ju ceke m’ubecwaku ng’om mwa, wabemiyo mugisa iwi monyne pi kero ma gibetimo pi nicero adui kud umondi i Ukraine man waberwo pigi.”—UCCRO a Statement, Nindo 24, dwi mir 2, 2022.
Iparu nenedi? Nyo andha dini m’uwacu nia gibelubo lapor pa Yesu copo cwalu Jukristu m’i iye nikiedo lwinyi? Biblia ke uyero ang’o?
Kpawa mi dini m’udikere i lwiny
Kpawa mi ng’om ubenyutho nia dini ucwaku nia kiedo lwiny utie lembe m’uyiyere, etie lembe ma cuu, kunoke nia pire tie tek ka jubenyego pi niketho kwiyocwiny. Jumulembe pa Yehova gidaru timo kero pi oro ma dupa pi nikonyo dhanu mange ginen nia eno tie lembe mir umbili. Wakewec pi lembene moko ma jukoro i girasoma mwa.
“Les croisades : une ‘illusion tragique’” unyutho kite ma kanisa mi Katholiki mi Roma unego ko dhanu dupa, ma giwacu ko nia gibetimo i nying’ Mungu man Kristu.
“L’Église catholique en Afrique” ukoro kite ma jigo lwiny m’i kind thek man nek (génocide) udaru voyo ko dini.
Thiwiwec ma tung’ tung’ ma calu ve “La religion est-elle responsable ?,” “Le rôle de la religion dans les guerres,” man “La religion prend parti” ukoro kite ma judong kanisa mi Katholiki, Orthodox, man mi Protestant gibed gidiko ko cing’gi i thenge ario zoo mi lwiny.
Nyo dini mi Jukristu gicikiri nidiko cing’gi i lemlwiny?
Gin ma Yesu uponjo: “Icikiri nimaru wedu calu in giri.” (Matayo 22:39) “Wumeduru nimaru judegi mwu.”—Matayo 5:44-47.
Kepar: Nyo dini m’ubeworo lembang’ola pa Yesu ma nia jumariri i kindjo, copo cwalu juyic m’i iye ucidh uneg dhanu mange i lwinyi? Pi ninwang’u wang’ penji eno, som thiwiwec “Les vrais chrétiens et la guerre” man “Est-il possible d’aimer ses ennemis ?”
Gin ma Yesu uyero: “Ker para tie ngo mi ng’om maeni. Ka nwang’u Ker para ubino mi ng’om maeni, nwang’u jutic para gikiedo kara kud jumiya.” (Yohana 18:36) “Dhanu ceke ma giting’o palamularu, gibitho de ku palamularu.”—Matayo 26:47-52.
Kepar: Kan uyiyere ngo nia Jukristu gikied lwiny pi nigwoko Yesu, nyo andha gicikiri niting’o atum pi nikiedo pi thelembe mange? Som thiwiwec “Peut-on concilier guerre et christianisme ?” pi nineno kite ma Jukristu mi rundi ma kwong’a gilubo ko cuu mandha lapor man ponji pa Yesu.
Lembang’o ma binwang’u dini m’ubecwaku lemlwiny?
Biblia uponjo nia Mungu jolo ngo dini m’uwacu nia gibelubo tok Yesu, ma ke gibeworo ngo ponji pare.—Matayo 7:21-23; Tito 1:16.
Buku mi Lembanyutha uwacu nia Mungu neno dini ma kumeno ni dini m’udikere i nek mi “dhanu ceke ma junego iwi ng’om.” (Lembanyutha 18:21, 24) Pi ning’eyo nia pirang’o, som thiwiwec “Qu’est-ce que Babylone la Grande ?”
Yesu uyero nia jubinyotho dini ceke ma Mungu jolo ngo, tap calu ma yen ma cego ngo nyinge ma cuu ‘jung’onde man jubole i mac.’ (Matayo 7:15-20) Som thiwiwec “La fin de la fausse religion est proche !” pi ning’eyo kite ma lembene bitimere ko.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a L’UCCRO, kunoke Conseil ukrainien des églises et des organisations religieuses, uketho i iye kanisa ma tung’ tung’ 15 m’ucungo kaka Orthodox, Katholiki mi Giriki ku mi Roma, Protestant, Juyic mi kanisa mir Injili ku mi Juyahudi man Juislam.