MEDIRI NIKIYO!
Judong gavmenti gibepoyo dhanu nia ceng’ini eni Armagedon copo tuk—Biblia ke uyero ang’o?
Ceng’ kas’acel kugweno, nindo 10 mi dwi mir 10, 2022, ng’om mi Russie ubolo bomb unyotho adhura mir Ukraine pi niculo kwor i kum Ukraine pi bomb m’eciko nindo ario i wang’e m’unyutho bralo ma dit m’udiko kind ng’om mi Crimée ku Russie. Lembuno utimere nyanok i ng’ey ma judong gavmenti ular upoyo nia ceng’ini eni lwiny mi Armagedon copo tuk.
“Nwang’u fodi wanwang’ara ngo ku lembe m’unyutho nia wani ceng’ini ku Armagedon, niai i kum [Presida mir Amerika John F.] Kennedy nitundo i kum bomb ma jukilo i Cuba. . . . Ang’eyo nia atum moko mbe mi nucléaire ma jucopo tiyo ko ku rieko ma lembene copo tugo ngo lwiny mir Armagedon.”— Wec pa prezida mir Amerika, Joe Biden, nindo 6, dwi mir 10, 2022.
“Ang’eyo nia eni dong’ wabecimondo i Armagedon, ke ma biketho ng’om zoo i ariti.”—Eno wec ma prezida mir Ukraine Volodymyr Zelensky udwoko, kinde ma jupenje i lembang’eya mi radio BBC pir adwogi ma rac mi bomb nucléaire, nindo 8, dwi mir 10, 2022.
Nyo tiyo kud atum mi nucléaire copo tugo lwiny mi Armagedon? Biblia ke uyero ang’o?
Nyo atum mi nucléaire copo tugo lwiny mi Armagedon?
Ungo. Wec ma nia “Armagedon” nwang’ere wang’ acel kende i Biblia, ke i Lembanyutha 16:16. Juweco ngo pire pi lwiny m’i kind thek ma tung’ tung’, ento pi lwiny m’i kind Mungu ku “jubim m’i ng’om zoo.” (Lembanyutha 16:14) Mungu bitiyo ku lwiny mi Armagedon eno pi ninyotho bimobim mi dhanu.—Daniel 2:44.
Pi ning’eyo lembe dupa iwi gin ma Armagedon bitimo i ng’om, som thiwiwec Lwiny mir Armagedon tie ang’o?
Nyo lwiny mi bomb nucléaire binyotho ng’om ku piny m’i iye?
Ungo. Kadok nwang’u dhanu copo tiyo ku bomb nucléaire i nindo m’ubino de, re Mungu biweko ngo nia ng’om unyothere. Biblia uwacu kumae:
“Ng’om bedo mi nja.”—Eklizia 1:4.
“Won bedopwe bicamu ng’om ni aba, man ebibedo i ie mi nja.”—Zaburi 37:29.
Ento lembila mi Biblia ku lembe m’ubetimere wang’uni, ubenyutho nia ceng’ini eni alokaloka ma dit bitimere i kwo mi dhanu. (Matayo 24:3-7; 2 Timoteo 3:1-5) Nwang’ lembe ma Biblia uyero pi nindo m’ubino nikadhu kud i ponji mwa mi Biblia m’umbe cul.