MEDIRI NIKIYO!
Kwaya mi mupira m’ucoko ng’om zoo, copo diko dhanu i acel andha?—Biblia ke uyero ang’o?
Ubenen nia dhanu ma romo neno kwaya mi mupira m’ucoko ng’om zoo (FIFA World Cup), niai i nindo 20, dwi mir 11, nitundo nindo 18, dwi mir 12, 2022, wendgi copo tundo miliar abic. Dhanu dupa ubeparu nia lemtuko ma kumeno copo timo lembe lee ni dhanu, nisagu nidiko kindgi kende kende calu junen tuko.
“Lemtuko utie ku tego mi loko ng’om. Etie ku tego mi miyo paru ma nyen. Etie ku tego mi diko kind dhanu i acel i ayi ma piny mange ma copo timo kumeno tie nok mandha.”—Eno wec pa Nelson Mandela, jawi ng’om ma con mir Afrique du Sud.
“Mupira . . . dikojo i genogen, edikojo i anyong’a, edikojo i gin ma jumaru, edikojo i mer man i lembe mange ma tung’ tung’.”—Eno wec pa Gianni Infantino, prezida mi FIFA. a
Nyo kwaya mi mupira m’ucoko ng’om zoo, kunoke lemtuko copo miyo adwogi ma ber maeno? Nyo genogen ku kwiyocwiny unuti?
Nyo andha tuko eno ubediko dhanu i aceli?
Kwaya mi mupira ma wang’uni uroyo paru mange bende iwi dhanu. Enyolo wec dupa i kusika mi weco ku dhanu i internet, enyayu lemgamba ku lembe m’umulo kum twero mi dhanu, akoyakoya mi rangi, man tung’ tung’ i kind ng’om m’ulony ku ma jucan.
Kadok kumeno de, dhanu dupa umaru nineno kwaya mi mupira m’ucoko ng’om zoo, pilembe ya etie galuwang’ ma nyayu anyong’a. Re kadok gimare de, tuko eno copo ketho ngo jubed i acel pi nja. Tung’ kumaeno, ebenyutho nia paru mi dhanu upokere, ma tie tap gin ma Biblia uyero nia bitimere i “kajk ceng’.”—2 Timoteo 3:1-5.
Genogen mandha ma ng’om zoo bibedo ko i acel
I Biblia junwang’u genogen mandha ma nindo moko ng’om zoo bibedo i acel. Eng’olo nia dhanu ceke bibedo i acel iwi ng’om i thebimobim m’i polo ma julwong’o nia “Ker pa Mungu.”—Luka 4:43; Matayo 6:10.
Yesu Kristu ma tie Ubimo mi Ker maeno, biketho ng’om zoo bibedo i kwiyocwiny. Biblia uwacu kumae:
“Lembe bibedo miero ni ng’atu ma pwe . . . man kwiyocwiny [bibedo] ma dit.”—Zaburi 72:7.
“Kum ebibodho jacanpiny kinde m’eywak, . . . Ebiwaru ng’eyong’ec migi ni dim ku rop.”— Zaburi 72:12, 14.
Kadok tin de ponji pa Yesu udaru diko dhanu milioni swa i acel, ke i ng’om 239. Ging’eyo kite ma gicopo kabu ko adegi cen kud i igi. Pi ninyang’ lee, som thiwiwec m’uwacu “Briser le cercle de la haine.”
a Fédération Internationale de Football Association, the international governing body for association football (soccer).