I kind dwi mir 7, 2022, jumiyo rapor ma nia yamu udoko lieth nikadhu mukero i wang’ ng’om zoo:

•   “Judongo mi ng’om mi Chine gipoyo dhanu wang’ mir arionde nia yamu bidoko lieth magwei i adhura ma romo 70.”​—Nindo 25, dwi mir 7, 2022, CNN Wire Service.

•   “Pilembe piny bebedo lieth wang’ ma pol i Europe zoo, eno re m’uketho kuca luli bewang’ i ng’om ma dupa.”​—Nindo 17, dwi mir 7, 2022, The Guardian.

•   “Calu ma theng ng’om mir États-Unis ma yo nyangu, ma yo piny man mi diere udoko lieth magwei; eno uketho ceng’ yenga, adhura ma dupa mi ng’ombe udoko lieth nisagu mi wang’e.”​—Nindo 24, dwi mir 7, 2022, The New York Times.

 Lembe maeno ceke ubenyutho ang’o? Nyo ng’om bidoko ni kabedo ma jucopo kwo ngo i iye? Biblia uyero ang’o?

 Eyo. Lietho m’ukadhu mukero i wang’ ng’om zoo ubepong’o lembe ma Biblia ular uewo pi rundi mwa eni. Ku lapor, Yesu ular uewo nia wabineno “gin ma nyayu lworo.” (Luka 21:11) Lietho m’ubemedere i wang’ ng’om zoo udaru nyayu lworo i ju ma pol nia lembe ma dhanu ubetimo biketho nikwo iwi ng’om bidoko tek.

 Ungo. Mungu ucwiyo ng’om ni kabedo ma dhanu gikwo i iye pi nja. (Zaburi 115:16; Eklizia 1:4) Pieno, ebiweko ngo dhanu ginyoth ng’om; ento eng’olo nia ebinyotho “ju m’ubenyotho ng’om.”​—Lembanyutha 11:18.

 Kenen lembila ario kende m’ubenyutho lembe mange ma Mungu ung’olo pi ng’om:

•   “Langa ku ng’om m’uthwo bibedo ku mutoro; anyong’a binego ng’om ngele, man ebithiwo calu thiuboko ma kume ju ukudho.” (Isaya 35:1) Mungu biweko ngo ng’om udok ni uvuru ma jukwo ngo i iye, ento ebiyiko theng ng’om ma junyotho.

•   “Iliewo ng’om, man ikwoyo wie pi, idwoke mio hai.” (Zaburi 65:9) Mungu bidwoko ng’om ni paradizo.

 Pi ninyang’ lee iwi kite m’alokaloka pa yamu ubepong’o ko lembila mi Biblia, som thiwiwec “Biblia uyero ang’o pi yamu m’ubelokere man pi nindo m’ubino.”

 Pi ning’eyo lembe lee iwi lembang’ola mi Biblia ma nia jubiyiko lembe m’unyothere iwi ng’om, som thiwiwec “Qui sauvera la terre ?”