“Dhanu ubetimo lembe dupa, ma biketho yamu binyothere ma gwei ceng’ini eni. Adhura ma dongo ubemwony ku pii. Piny udoko lieth nisagu m’i wang’e. Vira ma nyayu ndiri de usagu. Can pii ubenyay. Kit lum ku kit yedi ma dupa uberwinyo. Eno utie ngo lembe ma jubeparu apara, kadi ma jumedo kore ameda. Etie gin ma sians uyero nia bitimere, tek gavmenti uloko ngo ayi mi tiyo kud umeme.”​—Eno wec ma António Guterres, ma tie jagor ma dit mi Nations Unies uyero iwi rapor ma jururieko mi ng’om ma tung’ tung’ udwoko pir alokaloka mi yamu, ma juwodho lembene i nindo 4, dwi mir 4, 2022.

 “Jururieko gibetwong’o nia i oro ma bibino, park ma tung’ tung’ ma romo 423 i ng’om mir États-Unis binyothere nikum alokaloka mi yamu, asagane pilembe gimbe ku copo mi ceriri ni lietho m’ubemedere. Lembe ma reco ma copo timerene ma calu ve mac ma wang’u piny, pong’ pa pii, ng’eny pa pei m’umakere, nam m’ubepong’, man piny m’udoko lieth, urombo ku gin ma Biblia uweco pire.”​—“Pii m’upong’ i Yellowstone utie lanyuthne acel mi pekone ma copo wok,” nimakere ku rapor mi gazeti The New York Times mi nindo 15, dwi mir 6, 2022.

 Nyo peko ma cwic m’udhokowa ubenwang’ere ko bithum nindo moko de? Kan ebithum ke, ng’a ma bidare? Wakenen gin ma Biblia ubeyero.

 Biblia uyero nia Mungu ‘binyotho ju m’ubenyotho ng’om.’ (Lembanyutha 11:18) Giragora eni ubeponjowa ku lembe adek:

1.  1. Lembe ma dhanu ubetimo binyotho ng’om.

2.  2. Nyoth ma dhanu ubenyotho ko ng’om bijik.

3.  3. Mungu re ma bidaru peko ma jubemiyo i kum cwic m’udhokowa, ento dhanu ngo.

 Biblia uwacu nia “ng’om bedo mi nja.” (Eklizia 1:4) Jubikwo i wiye rondo ku rondo.

•   “Won bedopwe bicamu ng’om ni aba, man ebibedo i ie mi nja.”​—Zaburi 37:29.

 Ng’om mwa bidoko leng’ kendo kakare.

•   “Langa ku ng’om m’uthwo bibedo ku mutoro; anyong’a binego ng’om ngele, man ebithiwo calu thiuboko ma kume ju ukudho.”​—Isaya 35:1.