Ceng’ yenga, nindo 20, dwi mir 11, 2022, dikiri moko mi gavmenti ma tung’ tung’ ma julwong’o COP27, udaru coko ma gitimo iwi alokaloka mi yamu. Kadok nang’u giwinjiri nia mito jukony ng’om ma can n’i iye ku sente kara ginyeg ku peko maeno mir alokaloka mi yamu de, re ju ma pol ung’eyo nia timo kumeno de bikabu ngo gin m’ubenyayu pekone.

•   I nindo 19, mi dwi mir 11, 2022, António Guterres ma tie jagor ma dit mi ONU uwacu kumae: “Atie kud anyong’a nia dhogwa uripo nia waketh sente moko ang’et pi nikonyo ng’om ma gibenwang’iri ku peko mir alokaloka mi yamu. Re wang’eyo nia nitimo kumeno de bidaru ngo pekone zoo wi zoo . . . Ng’om mwa e fodi asu en’i hali ma rac.”

•   “Ng’om ni ceng’ini magwei mandha ku nyoth ma lee ma peko m’alokaloka mi yamu ubebino kelo i wiye.”​—Eno wec ma Mary Robinson uyero i nindo 20, mi dwi mir 11, 2022. Ebino prezida ma con mi ng’om mi Irelande man bende Komisioner ma dit mi ONU ma tiyo iwi lembe m’uneno twero pa dhanu.

 Akecane aradu, lworo ubenegogi lee mandha pi ng’om mwa mi nindo m’ubino. Re nyo andha dhanu copo diko cinggi karacelo pi nipong’o lembang’ola migi mi yiko alokaloka mi yamu? Biblia ke uyero ang’o?

 Biblia ubenyutho nia kadok nwang’u dhanu ubetimo tic ma tek man aketha cwinygi pi nidaru peko ma yamu m’ubelokere ubekelo de, re gibidaru ngo pekone ceke. Kenen thelembe ario m’uketho wayero kumeno:

•   “Gin m’ugom dwokre atira ngo.”​—Eklizia 1:15.

   Thelembene: Gavmenti umbe ku copo mi timo gin ceke ma gibemito gitim, pilembe ju cwiyo ngo dhanu kara gitel wigi gigi. (Yeremia 10:23) Kadok nwang’u dhanu romo dikiri de, re asu gibibedo mbe ku copo mi daru peko mi ng’om, nyiki nang’ gitim tego ma rukani.

•   “Pilembe dhanu bibedo ma ng’atuman bimarere gire, gibibedo jumar sente, . . . ju ma winjiri ngo nyanok de ku jumange.”​—2 Timoteo 3:2, 3.

   Thelembene: Biblia ular uyero cu nia dhanu ma pol mi rundi mwa bibedo ma gimariri gigi man gibimiyiri ngo nitimo lembe karacelo pi bero mi ju mange.

 Anyim mi ng’om mwa maeni ujengere ngo iwi lembang’ola ma gavmenti mi dhanu ubetimo. Mungu umiyo iwa ng’atu m’uromo nibimo wi ng’om niwacu Yesu Kristu. Biblia ukoro pire kumae:

•   “Bim bibedo wi goke: man jubilwong’o nyinge Wang’uic, Japorlembe, Mungu ma Jatego, Wego mi Nja, Jaditmawijo mi Kwiocwiny.”​—Isaya 9:6.

 Yesu tie Ubimo mi Ker pa Mungu niwacu bimobim mi polo. (Matayo 6:10) Etie ku copo, rieko man ava mi gwoko ng’om mwa ku dhanu ceke ma n’i iye. (Zaburi 72:12, 16) I the tela pare, bimobim maeno mi polo bikabu ju “m’ubenyotho ng’om” man ebidwoko ng’om bidoko ma ber.​—Lembanyutha 11:18; Isaya 35:1, 7.

 Pi ning’eye lembe lee iwi gin ma copo yiko peko mir alokaloka mi yamu, som thiwiwec m’uwacu: “Biblia uyero ang’o pi yamu m’ubelokere man pi nindo m’ubino.”