Nyo tung’ tung’ m’i kind lemandha ku vupo ubenen terere i weng’i? Gin ma dhanu ubeyenyo yiyo akeca utie kite ma giwinjiri ko man gin ma giparu, kakare nijengiri iwi lemandha man iwi lembe m’ubetimere. Ku lapor, wec ma nia “post-vérité” ma ku dhug Alur thelembene tie “i ng’ey lemandha,” utie wec ma juthungo nindo ma ceng’ini eni pi niweco iwi lembe maeno. a Wec eno ubenyutho kamaleng’ nia dhanu dupa gigeno nia lemadha mbe i ng’om.

 Paru maeno utie ngo lembe ma nyen. Kago oro 2000 udaru kadhu, Pontio Pilato ma jabim mi Roma ugam upenjo Yesu kumae: “Lemandha utie ang’o?” (Yohana 18:38) Kadok ekuro ngo nia Yesu udwok wang’ penji pare de, re pi penji eno ubino tek. Biblia umiyo dwokowang’ lembe ma copo nyeng’i man ma romo konyi ning’eyo nia lemandha utie ang’o vupo ke utie ang’o, ma tin wi dhanu ujebere pire i ng’om.

Nyo lemandha unuti?

 Eyo. Biblia utiyo ku wec “lemandha” pi niweco pi lembe m’unuti andha man ma cuu pi kurajo. Eponjo nia Yehova b Mungu utie Acaki mi lemandha, man elwong’e nia “Mungu mi lemandha.” (Zaburi 31:5) Biblia utie ku lemandha m’uai i bang’ Mungu, man eporo lemandhane ku der ma copo telo wiwa i ng’om ma tin wi dhanu unyothere i iye.​—Zaburi 43:3; Yohana 17:17.

Icopo nwang’u lemandha nenedi?

 Mungu ubemito ngo wayi lemandha m’i Biblia lima lima. Ento ebemito watii ku copo mwa mi paru i lembe pi ning’iyo i iye, kakare nijengara iwi kite ma wawinjara ko. (Jurumi 12:1) Mungu ubemito wang’eye man wamare ma watii ko ku ‘pidoic mwa ceke.’ Bende, ebemito wanwang’ wan giwa nia gin ma wabeponjo i Biblia utie lemandha.​—Matayo 22:37, 38; Tic mi Jukwenda 17:11.

Ka dong’ vupo ke uai kani?

 Biblia unyutho nia ng’atu m’ucaku the vupo utie Sitani Wonabali, jadegi pa Mungu ma julwong’e i Biblia nia “wego mi vupo.” (Yohana 8:44) Ecwayu vupo iwi Mungu ni dhanu ma kwong’a ma jular jucwiyo. (Thangambere 3:1-6, 13, 17-19; 5:5) Niai eca, ebemedere nimewo vupo man ebekanu lemandha iwi Mungu kara dhanu kud ung’ey.​—Lembanyutha 12:9.

Dong’ pirang’o vupo ulund unyay rukeni ke?

 Biblia ulwong’o rundi mwa eni nia “kajik ceng’,” nindo ma vupo pa Sitani unyay i iye i ng’om. Dhanu dupa cwayu vupa pi niwingo wi juwagi kara gikay ng’eygi. (2 Timoteo 3:1, 13) I dini ma pol bende vupo unyay nisagu. Biblia ular uyero nia i rundi mwa eni dhanu “bicoko juponji igi gigi kara ubed uyer igi lembe ma nyang’ugi,” man “gibiweko niwinjo lemandha.”​—2 Timoteo 4:3, 4.

Pirang’o lemandha pire tie teki?

 Lemandha utie ukungu ma ketho dhanu geniri i kindgi. Ka lemandha umbe, bedo jurimo man bedo ku winjiri i kindjo de bedo tek. Biblia uwacu nia Mungu ubemito wawore i ukungu mi lemandha. Ewacu nia “ju ma gibeworo [Mungu] gicikiri niwore ku tipo man lemandha.” (Yohana 4:24, kmt) Pi ning’eyo ayi ma lemandha m’i Biblia copo konyi ko ning’iyo vupo mi jurudini man niwok kud i vupone, som lembe m’i the thiwiwec: “Des mensonges qui empêchent d’aimer Dieu.”

Pirang’o Mungu ubemito ang’ey lemandha?

 Mungu ubemito ing’ey lemandha i wiye kara ibothi. (1 Timoteo 2:4) Tek iponjo cik mir ukungu pa Mungu iwi lembe ma ber ku lembe ma rac, man ibekwo nimakere ku ciknegi, ibibedo ku winjiri ma ceng’ini ku Mungune. (Zaburi 15:1, 2) Mungu uoro Yesu ubin iwi ng’om pi niponjo dhanu ung’ey lemandha. Ebemito wan de wawinj ponji pa Yesu.​—Matayo 17:5; Yohana 18:37.

Nyo Mungu bikabu vupo?

 Eyo. Mungu udagu ka dhanu ubekayu ng’ey juwagi nikum vupo ma gibecwayu. Eng’olo nia ebikabu cen ku wi ng’om ju ma gibemediri nicwayu vupo. (Zaburi 5:6) Kinde m’ebekabugi, ebipong’o bende lembang’ola ma e m’eng’olo: “Dendhok mi lemandha bicungo mi nja.”​—Lembrieko 12:19.