MEDIRI NIKIYO!
Pii m’upong’ m’ubenyotho piny—Biblia uyero ang’o pire?
Dhanu dupa i wang’ ng’om ubenyego ku peko mi pii m’ubepong’ m’ubenyotho piny. Kenen rapor ma tung’ tung’ m’ubeweco pi lembene:
“I kind nindo m’ukadhu eni, koth ma dit mandha ucwi i adhura ma dit mi ng’om mi Chine, m’ukadhu kadhiri koth m’ular ucwi i wang’e ma kawoni oro ukadhu ma romo 140. Epong’ ekadhu wi ng’om litre . . . 744.8 niai ceng’ soko nitundo kas’adek.”—AP News, Nindo 2, dwi mir 8, 2023.
“Yamu Typhoon Khanun ukelo koth ma pek ku wavuvu i iye i theng ng’om ma yo piny mi Japan ceng’ kas’ang’wen i nindone mir ario, man enego wend dhanu ma kadhu ario. . . . Ubenen nia wavuvune bikelo bende koth ma romo pong’o ng’om metre 0.6 i adhura mi gudi mi Taiwan.”—Deutsche Welle, Nindo 3, dwi mir 8, 2023.
“Gin m’uketho pii upong’ i thum pa yenga i adhura mi [Nouvelle-Écosse], ubino koth ma dit m’ugam ucwi uturo piny i Canada, i thengene mir atlantique, ma kawoni oro ukadhu udoko 50.”—BBC News, Nindo 24, dwi mir 7, 2023.
Biblia ke uyero ang’o i kum lembe ma kumeno?
Giranyutha mi “kajik ceng’”
Biblia unyutho kamaleng’ nia nindo ma wabekwo i iye utie rundi mi “kajik ceng’.” (2 Timoteo 3:1) Yesu ular uewo nia i rundi mwa eni, wabineno “gin ma nyayu lworo” kunoke ma nyayu ndiri. (Luka 21:11) Yamu m’ubelokere uketho lembe maeno ma nyayu ndiri ma jupangu pire ngo, ubetimere thiri thiri, man bende i kadhiri ma dongo.
Gin m’ubemiyo genogen
Biblia uwacu nia lembe dupa ma nyayu ndiri m’ubetimere i ng’om i nindo mwa tin, ubemiyo iwa thelembe mi bedo ku genogen. Pirang’o? Pilembe Yesu uwacu kumae: “Tek wuneno lembe maeni ubetimere, wung’ey nia Ker pa Mungu ni ceng’ini.”—Luka 21:31; Matayo 24:3.
Lembe ma wabeneno ubetimere, ubenyutho nia ceng’ini eni Ker pa Mungu bibedo ku tego iwi giracwiya m’udhokowa, uketho i iye koth m’ubewotho cwi.—Yob 36:27, 28; Zaburi 107:29.
Pi ning’eyo lembe lee iwi ayi ma Ker pa Mungu bidaru ko peko ma cwic m’udhokowa ubenyayu, nen thiwiwec “Qui sauvera la terre?”