Surasak Suwanmake/Moment via Getty Images
MEDIDRI NIKIYO!
Piny udoko lieth akeca i ng’om zoo i oro 2023—Biblia ke uyero ang’o?
Dhanu ubeciro peko mi lietho ma wanga wanga ku peko mange dupa m’ebekelo, i mukero m’usagu m’i wang’e ceke. Kenen gin ma rapor dupa uyero pire:
“Dwi mir abusiel eni piny udoko lieth akeca i ng’om, nisagu m’ular utimere i ng’om zoo ma kawoni oro ukadhu 174.”—National Oceanic and Atmospheric Administration, U.S. Department of Commerce, Nindo 13, dwi mir 7, 2023.
“Italie, Espagne, France, Allemagne man Pologne ceke gibecur ku peko mi lietho ma dongo, ma i cula mi Sicile ku mi Sardaigne eromo idho degre 48°C. Eno utie degre mi lietho ma fodi nang’ utundo ngo i ng’om mir Europe.”—European Space Agency, Nindo 13, dwi mir 7, 2023.
“Calu ma ng’om ubemedere ameda nidoko lieth, ukwayu wang’ey nia koth de bimedere ameda thiri thiri nicwii, ke i kadhiri m’ukadhu m’ukero, man ebikelo bende pong’ pa pii nisagu.”—Eno wec pa Stefan Uhlenbrook, ng’atu ma dit ma neno lembe pa pii man pa yamu i ng’om zoo, Nindo 17, dwi mir 7, 2023.
Wabecuku winjo rapor mange de dupa thiri thiri m’uweco pi piny m’udoko lieth akeca i ng’om. Nyo lembene ubedieng’o cwinyi? Kenen gin ma Biblia uyero pi lembenegi.
Nyo piny m’ubedoko lieth akeca ubepong’o lembila mi Biblia?
Eyo. Lietho ma lake tek, ku ng’om m’ubedoko lieth urombo tap ku gin ma Biblia ular uweco pire pi rundi mwa eni. Ku lapor, Yesu ular uwacu nia wabineno “gin ma nyayu lworo ku giranyutha ma dongo” i rundi mwa. (Luka 21:11) Lietho m’ubemedere ameda i ng’om uketho ju dupa utie ku lworo nia dhanu copo nyotho ng’om eni dong’ ni uvuru.
Nyo ng’om bidong’ ni uvuru?
Ungo. Mungu ucwiyo ng’om kara ubed ni kabedo mwa pi nja; ebiyiyo ngo dhanu unyothe. (Zaburi 115:16; Eklizia 1:4) Eng’olo nia ‘ebinyotho ju m’ubenyotho ng’om.’—Lembanyutha 11:18.
Biblia unyutho nia Mungu utie ku copo man nia ebigwoko ng’om kud i kum peko ma romo nyothe.
“[Mungu] kwio wavuvu ti, ketho mukurane ginindo.” (Zaburi 107:29) Mungu utie ku tego mi bimo wi tego mi giracwiya m’udhokowa. Etie ku copo mi daru peko mi lietho ma lake tek m’uketho dhanu ubesendiri.
“Iliewo ng’om, man ikwoyo wie . . . , idwoke mio hai.” (Zaburi 65:9) Nikum mugisa pa Mungu, ng’om ceke bidoko ni paradizo.
Pi ning’eyo lembe dupa pi lembang’ola m’i Biblia m’uweco pir ayi ma ng’om biyikere ko, som thiwiwec “Qui sauvera la terre?”