I wang’om zoo, lemgamba udaru poko kind dhanu dupa. Nimakere ku sayusac moko ma Pew Research Center utimo i oro 2022, unwang’ere nia “dhanu ma romo 65 iwi dak ma kwo i ng’om ma tung’ tung’ 19, giyero nia teliri utie lee mandha i ng’om migi i kind dhanu ma gicwaku theng lemgamba ma tung’ tung’.”

 Nyo kaka m’ikwo i iye de ibeneno lemgamba ubemedere nipoko kind dhanu? Pirang’o ebepoko kindgi? Dong’ juromo timo ang’o ke kara lembene uthum? Kenen gin ma Biblia uyero e.

 Biblia ular uewo nia i rundi mwa eni, niwacu i “kajik ceng’,” dhunu dupa gibibedo ku kit timo ma biketho nibedo i acel bidoko tek.

•   “I kajik ceng’ nindo mi can ma ciro tek bibedo nuti. Pilembe dhanu bibedo ma ng’atuman bimarere gire, . . . ju ma winjiri ngo nyanok de ku jumange.”​—2 Timoteo 3:1-3.

 Kadok nwang’u dhanu dupa gibeii kara gavmenti uketh jubed i acel de, re dhanu mange ku paru migi m’ukoc, ginwang’u nia etie lembe ma tek man ecopere ngo nia jutii karacelo pi niyiko lembuno. E adwogi mi lembene tie tap gin ma Biblia ular uyero yang’ con.

•   “Nindo nuti ma ng’atu acel bedo ie ku tego kum wadi m’etime ko rac.”​—Eklizia 8:9.

 Ento Biblia unyutho kite ma lembene bithum ko: Eyero nia gavmenti moko nuti ma ng’atu m’utelo wiye copo daru cen lembe m’ubesendo dhanu tin eni.

 Biblia unyutho nia jatela moko nuti acel kende ma copo yiko lembuni: En e Yesu Kristu. Yesu tie ku tego, ku dito, man kud ava mi ketho dhanu ceke ukwo i acel man i kwiyocwiny.

•   “Lembe bibedo miero ni ng’atu ma pwe i nindo pare, man kwiocwiny ma dit, cil i dwi ma bithum ko.”​—Zaburi 72:7.

•   “Thek ceke bitimo ire.”​—Zaburi 72:11.

 Yesu tie jatela m’anzilo, pilembe edieng’ pi dhanu man ebemito ekonygi, akecane dhanu ma jutimogi rac.

•   “Kum ebibodho jacanpiny kinde m’eywak, man jacan, ma jakonyne mbe. Ngisi binege kum ng’atu ma adhura ku jacanpiny, man ebibodho ng’eyong’ec mi jucanpiny. Ebiwaru ng’eyong’ec migi ni dim ku rop.”​—Zaburi 72:12-14.

 Ponj lembe dupa iwi Ker pa Mungu, ma tie bimobim mi polo ma Yesu re m’ubetelo wiye. Nen kite m’iromo nwang’u ko bero i kum bimobimne man kite m’iromo diko ko cingi i kume.

•   Nen video ma thiwiye tie Ker pa Mungu tie ang’o?

•   Som thiwiwec m’uwacu: “Le Royaume de Dieu : un gouvernement sans corruption.”