MEDIRI NIKIYO!
Rop ma reco mir atum m’udaru romo ng’om zoo—Biblia uyero ang’o?
I kind dwi mir 7, oro 2022, rop ma reco mir atum utimere i ng’om zoo:
“Nek ma junego ko ng’atu moko mi lemgamba ma pire ng’eire lee i Japan [Premier ministre ma con, Shinzo Abe] unyayu yakini i ng’ombe, man utimo dhanu mi wang’ ng’om zoo rac; asagane pilembe ng’om mi Japan umbe ku cik lee iwi lembe m’uneno rop man erido de ngo i cik iwi tiyo kud atum.”—Nindo 10, dwi mir 7, 2022, The Japan Times.
“Saa ma won atum moko unego dhanu adek i ka ng’iew ma dit mi Copenhagen, lembene utimo dhanu mi Denmark rac.”—Nindo 4, dwi mir 7, 2022, Reuters.
“Afrique du Sud: Dhanu 15 utho i ng’ey ma jumaco moko ucaku kilo atum i bar mir adhura mi Soweto.”—Nindo 10, dwi mir 7, 2022, The Guardian.
“Junego dhanu ma kadhu 220 kud atum i États-Unis, i yom m’ithum pa yenga mi nindo 4, dwi mir 7.”—Nindo 5, dwi mir 7, 2022, CBS News.
Nyo watie ku thelembe moko mi bedo ku genogen nia rop ma kumeno bithumi? Biblia uyero ang’o?
Ajiki mi rop
Biblia ukoro nia nindo ma wabekwo i iye utie nindo mi “kajik ceng’,” ma i iye dhanu bibedo ju ma kwiny. (2 Timoteo 3:1, 3) Kit timo mi rop ma kumeno uketho dhanu gibekwo ku lworo. (Luka 21:11) Ento Biblia ung’olo nia nindo ma ceng’ini eni rop bithum man “dhanu . . . bibedo i kabedo mi kwiocwiny, man i udi ma museme, man i kayom ma ti.” (Isaya 32:18) Rop bithum nenedi?
Mungu bikabu jutim rac man ebinyotho jamnek ceke.
“Ento judubo jubikabu woko kud i ng’om.”—Lembrieko 2:22.
“[Mungu] kwio lwiny cil i kajik mi ng’om; eturo atum, man etong’o i tong’ bwa; ewang’u magali i mac.”—Zaburi 46:9.
Mungu biponjo dhanu nikwo ku kwiyocwiny, man i ayi maeno re m’ebijigo ko rop ceke.
“Gibitimo rac kadi nyotho de ngo kum got para ma leng’ ceke; kum ng’om bibedo pong’ ku ng’eyong’ec pa Yehova, calu pi umo ng’om.”—Isaya 11:9.
Kadok kawoni de, Mungu ubeponjo dhanu i wang’ ng’om zoo niuro rop man tiyo ku jamnek. Bende, ebeponjogi nithiedho “palamularu migi ni kwejdhiang’, man tong’ migi ni uligu.”—Mika 4:3.
Pi niponjo lembe lee iwi lembang’ola mi Biblia mi kwo i ng’om m’umbe lworo, som thiwiwec “Affranchis de la peur : est-ce possible ?”
Pi niponjo lembe lee iwi kite ma jubidaru ko rop pi nja, som thiwiwec “Enfin la paix sur la terre !”