Ceng’ kas’abic, nindo 24, dwi mir 2, 2023, bitwiyo oro acel ma lembe ubino rac i iye niai ma lwiny ucaku i ng’om mir Ukraine. Nimakere ku rapor ma tung’ tung’, juaskari mir Ukraine ku mi Russie ma romo 300000 utho kunoke unwang’u ret ma lee. Bende jubeparu nia lwak dhanu ma romo 30000 mi ng’om maeno de utho i lwinyne. Re welne copo kadhu maeno ka judikogi zoo.

 Lembe mi can utie nia, fodi gin moko mbe m’unyutho nia lwinyne copo thum nindo ma ceng’ini eni.

•   “Kago oro acel uthum niai ma juaskari mi Russie umondo ku lwiny i ng’om mir Ukraine, gin moko mbe m’unyutho nia lwinyne copo thum nindo ma ceng’ini eni. Ung’eyere ngo nia jukani ma romo loyo, man niweco i kindgi kara dhoggi urombi pi nijigo lwlinyne de ubenen ungo.”​—NPR (National Public Radio), Nindo 19, mi dwi mir 2, oro 2023.

 Ku lemandha, dhanu dupa gibewinjiri rac pi peko man masendi ma lwiny eno ku lwiny mange udaru kelo i kum dhanu mange ma kosa migi mbe. Dong’ Biblia ke ubemiyo genogen ma kani? Nyo nindo moko nuti ma lwiny bithum i iye?

 Biblia uweco pi lwiny moko ma bibodho dhanu, ento ungo ninegogi anega. Lwinyne nyinge Armagedon, etie “lwiny mi ceng’ ma dit pa Mungu ma Jategokpo.” (Lembanyutha 16:14, 16) Mungu bitiyo ku lwiny maeno pi nijigo bimobim mi dhanu, m’uketho dhanu dupa udaru tho i lwiny. Pi ning’eyo ayi ma Armagedon bikelo ko kwiyocwiny ma galu, wakweyi isom thiwiwec m’ulobo e:

•   “Lwiny mir Armagedon tie ang’o?”

•   “Armagedon utie lembe mi mutoro!”